పీఠిక నుంచి సెక్యులర్, సోషలిస్ట్ పదాలు తొలగింపు.. సుప్రీంకోర్టు కీలక వ్యాఖ్యలు

రాజ్యాంగాన్ని అమోదించిన తేదీని మార్చకుండా ప్రవేశిక సవరించవచ్చా? సర్వోన్నత న్యాయస్థానం శుక్రవారం ప్రశ్నించింది. రాజ్యాంగ పీఠిక నుంచి 'సామ్యవాద (సోషలిస్ట్)', 'లౌకిక (సెక్యులర్)' పదాలను తొలగించాలని కోరుతూ మాజీ ఎంపీ, బీజేపీ నేత సుబ్రమణ్యస్మామి సుప్రీంకోర్టులో పిటిషన్ దాఖలు చేశారు. ఈ పిటిషన్పై విచారణ సందర్భంగా సుప్రీంకోర్టు ఈ మేరకు స్పందించింది. భారత రాజ్యాంగ పీఠిక నిర్దిష్ట తేదీతో వస్తుంది కాబట్టి చర్చ లేకుండా దానిని సవరించలేమని స్పష్టం చేసింది. ఈ అంశంపై తదుపరి విచారణను ఏప్రిల్ 29కి వాయిదా వేసింది.

రాజ్యాంగ ప్రవేశిక నుంచి 'సోషలిస్ట్', 'సెక్యులర్' పదాలను తొలగించాలని సుబ్రమణ్యస్వామి వేసిన ప్రజాప్రయోజన వ్యాజ్యంపై జస్టిస్ సంజీవ్ ఖన్నా, జస్టిస్ దీపాంకర్ దత్తాలతో కూడిన ద్విసభ్య ధర్మాసనం విచారణ చేపట్టింది. ధర్మాసనం ముందు సుబ్రమణ్యస్వామి, న్యాయవాది విష్ణుశంకర్ జైన్ వాదనలు వినిపించారు. ఈ సందర్భంగా రాజ్యాంగాన్ని అమోదించిన తేదీ 1949 నవంబర్ 26ను మార్చకుండా రాజ్యాంగ పీఠికను సవరించవచ్చా? అని ప్రాసిక్యూషన్ను ధర్మాసనం ప్రశ్నించింది. అకడమిక్ పర్పస్ కోసం తేదీని మార్చకుండా రాజ్యాంగ పీఠికను మార్చవచ్చు అని, అందులో సమస్య లేదని జస్టిస్ దీపాంకర్ దత్త అన్నారు.

దీనికి సుబ్రమణ్య స్వామి బదులిస్తూ ‘ఈ విషయంలో అదే అసలు సమస్య’ అని పేర్కొన్నారు. అనంతరం జస్టిస్ దత్త జోక్యం చేసుకుంటూ ‘బహుశా నేను చూసిన తేదీతో ఉన్న ఏకైక రాజ్యాంగ పీఠిక ఇదేనోమో.. ఇందులో పలానా తేదీ నాడు ఈ రాజ్యాంగాన్ని మాకు మేము ఇచ్చుకుంటున్నాము అని ఉంది.. వాస్తవానికి తొలుత రాజ్యాంగంలో రెండు పదాలు (సోషలిస్ట్, సెక్యులర్) లేవు’ అని పేర్కొన్నారు. భారత రాజ్యాంగం పీఠిక నిర్దిష్ట తేదీతో వస్తుంది కాబట్టి చర్చ లేకుండా దానిని సవరించలేమని న్యాయవాది విష్ణు జైన్ అన్నారు.

ఈ సమయంలో సుబ్రమణ్య స్వామి వాదిస్తూ.. దేశంలో ఎమర్జెన్సీ (1975-77) అమల్లో ఉన్నప్పుడు 42వ రాజ్యాంగ సవరణ ఆమోదించారని గుర్తు చేశారు. ఇరువురి వాదనలు విన్న సుప్రీంకోర్టు విచారణను ఏప్రిల్ 29కి వాయిదా వేసింది. సెప్టెంబరు 2, 2022లో సుబ్రమణ్యస్వామి దాఖలు చేసిన వ్యాజ్యాాన్ని ఇదే అంశంపై బలరాం సింగ్ అవే వ్యక్తి సహా ఇతరులు వేసిన పిటిషన్లతో ట్యాగ్ చేసింది బలరాం సింగ్ తరఫున సీనియర్ లాయర్ విష్ణు శంకర్ జైన్ వాదనలు వినిపించారు. కాగా, పిటిషన్ విచారణ ప్రారంభంలో జస్టిస్ ఖన్నా,.. న్యాయమూర్తులు కేసు ఫైళ్లను ఉదయాన్నే స్వీకరించారని, సమయం తక్కువగా ఉన్నందున వారు వాటిని పరిశీలించలేదని స్వామికి చెప్పారు.

1950 జనవరి 26న రాజ్యాంగం అమల్లోకి వచ్చిన సమయంలో సోషలిస్ట్, సెక్యులర్ అనే పదాలు పీఠికలో లేవు. 1976లో ఇందిరా గాంధీ ప్రభుత్వం ప్రవేశపెట్టిన 42వ రాజ్యాంగ సవరణ ద్వారా ఈ రెండింటిని చేర్చారు. దీంతో ‘సర్వసత్తాక, ప్రజాస్వామ్య, గణతంత్రం’ నుంచి ‘సర్వసత్తాక, సామ్యవాద, లౌకిక, ప్రజాస్వామ్య, గణతంత్రం’గా రాజ్యాంగ పీఠిక మారింది. ఉపోద్ఘాతం రాజ్యాంగంలోని ఆవశ్యక లక్షణాలను మాత్రమే కాకుండా ఏకీకృత సమీకృత సమాజాన్ని రూపొందించడానికి అనుసరించిన ప్రాథమిక పరిస్థితులను కూడా సూచించిందని ఆయన తన పిటిషన్‌లో పేర్కొన్నారు.