రాజకీయ జీవితాన్నే పణంగా పెట్టా,,,,మాజీ మంత్రి బాలినేని ఎమోషనల్

నిత్యం వార్తల్లో ఉండే వైసీపీ ఎమ్మెల్యే, మాజీ మంత్రి బాలినేని శ్రీనివాస రెడ్డి మరోసారి వార్తల్లో నిలిచారు. ఈసారి ఆయన తనదైన రీతిలో హాట్ కామెంట్స్ చేశారు. తనపై పదే పదే ఆరోపణలు రావటాన్ని ఖండించిన బాలినేని.. డబ్బులు తీసుకున్నట్లు తేలితే తనను చెప్పుతో కొట్టాలంటూ ఉద్వేగానికి గురయ్యారు. ఒంగోలులో 231 కోట్ల రూపాయల వ్యయంతో తలపెట్టిన 25 వేల మందికి పట్టాల పంపిణీ కార్యక్రమంపై అధికారులతో మంత్రి బాలినేని సమీక్షా సమావేశం నిర్వహించారు. అనంతరం మాట్లాడిన బాలినేని శ్రీనివాసరెడ్డి.. ఇళ్ల పట్టాల పంపిణీలో అవినీతి చేశారంటూ తనపై తప్పుడు ప్రచారం చేస్తున్నారని మండిపడ్డారు. పట్టాల పంపిణీలో అవినీతి జరిగినట్లు నిరూపిస్తే, తాను డబ్బులు తీసుకున్నట్లు తేలితే చెప్పుతో కొట్టాలంటూ భావోద్వేగానికి గురయ్యారు.

ఇదే సమయంలో ఒంగోలులో ఇళ్ల పట్టాల పంపిణీకి అడ్డురావాలని ప్రయత్నిస్తే వారి సంగతి తేలుస్తానంటూ బాలినేని శ్రీనివాసరెడ్డి ఆవేశంతో మాట్లాడారు, పట్టాలు పంపిణీ చేయలేకపోతే వచ్చే ఎన్నికల్లో పోటీచేయనని స్పష్టం చేశారు. పట్టాల పంపిణీ కోసం తన రాజకీయ జీవితాన్నే పణంగా పెట్టానంటున్న బాలినేని శ్రీనివాసరెడ్డి.. పట్టాల పంపిణీని అడ్డుకునేందుకు యత్నిస్తే వారి ఆఫీసును వేలమంది లబ్ధిదారులతో కలిసి ముట్టడిస్తామని హెచ్చరించారు. ఫిబ్రవరి 25లోపు సీఎం చేతుల మీదుగా పట్టాల పంపిణీ ఉంటుందని స్పష్టం చేశారు.

మరోవైపు ఒంగోలు జిల్లాలోని ఎన్. అగ్రహారం, చినమల్లేశ్వరపురం, వెంగముక్కపాలెం ప్రాంతాల్లోని స్థలాలను పేద ప్రజలకు పంపిణీ చేయాలని ప్రభుత్వం నిర్ణయించింది. ఆ భూములను చదును చేసి, హద్దురాళ్లు, రోడ్లు ఏర్పాటు చేసి చదును చేయాలని ఈ పనుల కోసం టెండర్లు పిలిచారు. అయితే ఈ టెండర్లను అర్హత లేని కంపెనీలకు అప్పగించారని, ఇందులో అవినీతి జరిగిందంటూ విపక్షాలు ఆరోపిస్తున్నాయి. ఈ నేపథ్యంలో తనపై వచ్చిన ఆరోపణలను నిరూపిస్తే చెప్పుతో కొట్టుకుంటానంటూ బాలినేని సవాల్ చేశారు. అనవసర ఆరోపణలు చేయడం మానుకోవాలని, ఇళ్ల పట్టాల పంపిణీకి అడ్డుపడితే ఊరుకునేది లేదని స్పష్టం చేశారు.

ఇక రాజకీయాల సంగతికి వస్తే మొన్నటి వరకూ వైసీపీ అధిష్ఠానం మీద బాలినేని అసంతృప్తితో ఉన్నారంటూ ప్రచారం జరిగింది. ఒంగోలు ఎంపీ టికెట్ విషయంలో బాలినేని అలిగారంటూ ప్రచారం జరిగింది. ఒంగోలు వైసీపీ ఎంపీ సీటును మాగుంట శ్రీనివాసుల రెడ్డికి కేటాయించాలని బాలినేని శ్రీనివాసరెడ్డి కోరుతూ వస్తున్నారు. అయితే ఈ విషయంలో ఒంగోలు పార్లమెంట్ పరిధిలోని నేతలెవ్వరూ తనతో కలిసి రాకపోవటంపై బాలినేని శ్రీనివాసరెడ్డి ఇటీవల అసంతృప్తి వ్యక్తం చేశారు. మాగుంట అయితే బాగుంటుంది అంటూనే ఎవరికీ పట్టనిది.. నాకేం పట్టిందంటూ వ్యాఖ్యానించారు. అనవసరంగా వైసీపీ అధిష్ఠానానికి శత్రువు కాబోనని.. తన నియోజకవర్గం సంగతి తాను చూసుకుంటానంటూ వ్యాఖ్యానించారు.