ఉభయ గోదావరి జిల్లాల పర్యటన వాయిదా.. పవన్ కీలక నిర్ణయం..

జనసేన అధినేత పవన్ కళ్యాణ్ ఉభయ గోదావరి జిల్లాల పర్యటన వాయిదా పడింది. ఈ విషయాన్ని జనసేన అధికారికంగా వెల్లడించింది. ఇప్పటికే బుధవారం జరగాల్సిన భీమవరం పర్యటన వాయిదా పడగా.. ఇప్పుడు మొత్తంగా ఉభయ గోదావరి జిల్లాల పర్యటనే వాయిదా పడింది. అయితే దీని వెనుక ప్రభుత్వ హస్తం ఉందని జనసైనికులు ఆరోపిస్తున్నారు. పవన్ కళ్యాణ్ ఉభయ గోదావరి జిల్లాల పర్యటనకు రాకుండా అధికారుల సాయంతో అడ్డుకుంటున్నారని మండిపడుతున్నారు.

ముందుగా నిర్ణయించిన షెడ్యూల్ ప్రకారం ఫిబ్రవరి 14 నుంచి 17 వరకూ నాలుగురోజుల పాటు ఉభయ గోదావరి జిల్లాలలో పవన్ కళ్యాణ్ పర్యటించాల్సి ఉంది. 14వ తేదీ భీమవరం, ఆ తర్వాత అమలాపురం, కాకినాడ, రాజమండ్రిలో పవన్ కళ్యాణ్ పర్యటించాల్సి ఉంది. అయితే భీమవరంలో పవన్ కళ్యాణ్ హెలికాప్టర్ ల్యాండింగ్‌కు స్థానిక అధికారులు అనుమతి ఇవ్వలేదు. దీంతో పవన్ కళ్యాణ్ భీమవరం పర్యటన వాయిదా పడింది. అయితే ఇలాంటి అడ్డంకులే మిగతా ప్రాంతాల్లోనూ వస్తుండటంతో ఉభయ గోదావరి జిల్లాల పర్యటనను వాయిదా వేస్తున్నట్లు జనసేన ప్రకటించింది.

" పవన్ కళ్యాణ్ ప్రయాణించే హెలికాప్టర్ దిగేందుకు అనుమతుల విషయంలో ప్రభుత్వ అధికారులు అడ్డంకులు సృష్టిస్తున్నారు. ఆర్ అండ్ బి అధికారుల ద్వారా అనుమతులకు సాకులు చూపిస్తున్నారు. భీమవరంలో ఇదే ఇబ్బందులు తీసుకురావడంతో పర్యటన వాయిదా వేశారు. కాకినాడలో సమావేశానికి ఆ నగరంలో ఉన్న హెలిపాడ్ కోసం అనుమతి కోరితే అంగీకరించలేదు. అక్కడికి 30 కి.మీ. దూరంలో ఉన్న గొల్లప్రోలులో దిగాల్సిన పరిస్థితి ఉంది. ఇలాంటి అవాంతరాలు కల్పిస్తుండటంతో పర్యటన వాయిదా వేయాలని నిర్ణయించారు. అనుమతుల విషయంలో ప్రభుత్వం కలిగిస్తున్న ఆటంకాలపై న్యాయపరంగా ముందుకు వెళ్లాలని పార్టీ లీగల్ సెల్‌కు పవన్ కళ్యాణ్ సూచించారు. ఉమ్మడి తూర్పు, పశ్చిమ గోదావరి జిల్లాల్లో పర్యటనలు చేసే తేదీలను త్వరలో వెల్లడిస్తారు"..అంటూ జనసేన పార్టీ ట్వీట్ చేసింది.

అయితే.. ఉభయ గోదావరి జిల్లాల పర్యటన వాయిదా పడిన నేపథ్యంలో పవన్ కళ్యాణ్ మరో నిర్ణయం తీసుకున్నారు. మూడంచెల వ్యూహంలో భాగంగా పర్యటనకు వెళ్లిన తొలిసారి ఆ ప్రాంతంలోని ముఖ్యనేతలతో పవన్ సమావేశం అవుతారు. రెండోసారి కార్యకర్తలతో, మూడోసారి ప్రజలతో మమేకం అవుతారు. అయితే గోదావరి జిల్లాల పర్యటనకు వెళ్తుంటే.. హెలికాప్టర్ ల్యాండింగ్‌కు అధికారుల నుంచి అనుమతులు రాకపోవటంతో పవన్ మరో కీలక నిర్ణయం తీసుకున్నారు. పర్యటనలో భీమవరం, అమలాపురం, కాకినాడ, రాజమండ్రిలోని ముఖ్యనేతలతో పవన్ సమావేశం కావాల్సి ఉంది. ఇప్పుడు పర్యటన వాయిదా పడటంతో వారినే మంగళగిరిలోని పార్టీ కేంద్ర కార్యాలయానికి తీసుకువచ్చి. సమావేశాలు నిర్వహించాలని నిర్ణయించారు. ఈ క్రమంలోనే పార్టీ ముఖ్య నాయకులతో భేటీకి ఏర్పాట్లు చేశారు. వాటిని పార్టీ కేంద్ర కార్యాలయంలో చేపడతారని జనసేన ఓ ప్రకటనలో పేర్కొంది.