ఆ సినిమా విడుదలను ఆపండి.. ఏపీ హైకోర్టులో వైసీపీ పిటిషన్

ఏపీలో పొలిటికల్ మూవీల ట్రెండ్ నడుస్తోంది. ఇప్పటికే యాత్ర 2 సినిమా విడుదల కాగా.. ఈ నెల 15న రాజధాని ఫైల్స్ సినిమా విడుదలకానుంది. అలాగే ఆర్జీవీ సినిమా వ్యూహం కూడా ఈ నెల 23న రిలీజ్ అవుతోంది. అయితే ఈ క్రమంలో రాజధాని ఫైల్స్‌ సినిమా విడుదలను నిలువరించాలంటూ వైఎస్సార్‌సీపీ రాష్ట్ర ప్రధాన కార్యదర్శి లేళ్ల అప్పిరెడ్డి ఏపీ హైకోర్టులో పిటిషన్ దాఖలు చేయగా విచారణ జరిగింది.

ముఖ్యమంత్రి జగన్‌మోహన్‌రెడ్డి, ప్రభుత్వ ప్రతిష్ఠను దిగజార్చేందుకు ఈ సినిమా తీశారని, సెన్సార్‌ బోర్డు జారీ చేసిన ధ్రువపత్రాన్ని రద్దు చేయాలని అప్పిరెడ్డి కోరారు. చిత్రంలోని పాత్రలు ముఖ్యమంత్రి జగన్‌, ఎమ్మెల్యే కొడాలి నాని, తదితరులను పోలి ఉన్నాయని పిటిషనర్‌ తరఫు లాయర్ వాదనలు వినిపించారు. . వైఎస్సార్‌సీపీని చులకన చేయాలనే ఉద్దేశంతో ఈ మూవీని నిర్మించారని ఆరోపించారు. ఎన్నికలను దృష్టిలో పెట్టుకొని దీన్ని నిర్మించారన్నారు. ఈనెల 15న విడుదల కాబోతుందని.. ప్రదర్శనను నిలువరిస్తూ మధ్యంతర ఉత్తర్వులివ్వాలని కోరారు.

ఈ సినిమాలో కించపరిచేలా సన్నివేశాలు లేవని సినిమా నిర్మాతల తరఫున లాయర్ వాదించారు. ఇప్పటికే ఈ మూవీ పరిశీలించిన కమిటీ కొన్ని సన్నివేశాల తొలగింపునకు సూచించగా, తాము రివిజన్‌ కమిటీని ఆశ్రయించామన్నారు. ఆ కమిటీ సూచించిన మేరకు కొన్ని సన్నివేశాలను తొలగించామని తెలిపారు. గతేడాది డిసెంబర్లో సెన్సార్‌ సర్టిఫికెట్‌ జారీ చేస్తే వైఎస్సార్‌సీపీ ఇప్పుడు పిటిషన్‌ దాఖలు చేయడంపై అభ్యంతరం తెలిపారు. వ్యూహం సినిమాలో చంద్రబాబు, పవన్‌ కల్యాణ్‌, సోనియాగాంధీ, రోశయ్య తదితర నేతల ప్రతిష్ఠ దెబ్బతినేలా సన్నివేశాలున్నాయని సీబీఎఫ్‌సీ పేర్కొందన్నారు.

రాజధాని ఫైల్స్‌ సినిమాలో ఎవరి ప్రతిష్ఠను దెబ్బతీసేలా, కించపరిచేలా సన్నివేశాలు లేవన్నారు. చిత్ర విడుదలపై మధ్యంతర ఉత్తర్వులు జారీ చేయాల్సిన అవసరం లేదన్నారు. నిబంధనల మేరకు ధ్రువపత్రం జారీ చేశారని, 13 సన్నివేశాలను తొలగించారని కేంద్ర సమాచార, ప్రసార మంత్రిత్వశాఖ తరఫున లాయర్ వాదనలు వినిపించారు. సినిమాపై మధ్యంతర ఉత్తర్వులిచ్చే విషయమై నిర్ణయాన్ని హైకోర్టు వాయిదా వేసింది.

రాజధాని ఫైల్స్‌ రాజకీయ సినిమా కాదని చెబుతున్నారు దర్శకుడు భానుప్రకాశ్‌. రాజధాని అమరావతికి భూములిచ్చిన రైతుల సంఘర్షణ అని.. ప్రజా ప్రయోజనం కోసం తీసిన రైతుల సినిమా అన్నారు. రైతులు రాజధాని కోసం స్వచ్ఛందంగా వేల ఎకరాల భూములు ఇస్తే.. దానిని హేళన చేసి, వారిని క్షోభపెట్టే పరిణామాలు ఉన్నాయన్నారు. అందుకే వారి కన్నీళ్లకు సమాధానంగా.. సమాజాన్ని చైతన్య పరుస్తూ ఓ సామాజిక బాధ్యతగా ఈ సినిమా చేశామన్నారు. రాజధాని రైతుల ఆవేదనను తెలియజేసే ప్రజల సినిమా ఇది. రాజధానికి భూములిచ్చిన రైతులంతా ఈ సినిమాలో నటించారన్నారు. ఈ సినిమాలో వినోద్‌ కుమార్‌, వాణీ విశ్వనాథ్‌, అఖిలన్‌, వీణ తదితరులు ప్రధాన పాత్రలు పోషించారు. కంఠంనేని రవిశంకర్‌ నిర్మించారు. ఈ నెల 15న విడుదలకానుంది.