వైసీపీ రెబల్ ఎమ్మెల్యేలకు లాస్ట్ ఛాన్స్.. ఆ రోజు విచరాణకు రాకపోతే, నోటీసుల్లో స్పీకర్ క్లారిటీ

వైఎస్సార్‌సీపీ రెబల్ ఎమ్మెల్యేలకు అసెంబ్లీ స్పీకర్ తమ్మినేని సీతారాం మరోసారి నోటీసులు పంపారు. నలుగురు ఎమ్మెల్యేలు వివరణ ఇచ్చేందుకు అసెంబ్లీ స్పీకర్‌ ఇంకో అవకాశం ఇచ్చారు. అనర్హత పిటిషన్‌ విచారణలో భాగంగా ఈ నెల 19న విచారణకు హాజరుకావాలని ఆయన నోటీసులు జారీ చేశారు. నోటీసుల్లో ఇదే తుది విచారణగా పేర్కొన్నారు. వైఎస్సార్‌సీపీ నుంచి వెళ్లి టీడీపీకి మద్దతు తెలిపిన ఆనం రామనారాయణరెడ్డి, మేకపాటి చంద్రశేఖర్‌రెడ్డి, కోటంరెడ్డి శ్రీధర్‌రెడ్డి, ఉండవల్లి శ్రీదేవీలకు ఇప్పటికే మూడుసార్లు విచారణకు హాజరుకావాలని నోటీసులు ఇచ్చారు.

సాంకేతిక, వ్యక్తిగత కారణాలతో విచారణకు హాజరుకాలేదు. దీంతో ఈ నెల 19వ తేదీన విచారణకు హాజరుకావాల్సిందేనని స్పీకర్‌ కార్యాలయం నోటీసులు జారీ చేసింది. అసెంబ్లీ స్పీకర్‌ కార్యాలయంలో 19వ తేదీన మధ్యాహ్నాం విచారణ ఉంటుందని.. హాజరు కాకపోతే ఇప్పటిదాకా జరిగిన విచారణ ఆధారంగా నిర్ణయం ఉంటుందని నోటీసుల్లో స్పష్టం చేశారు. అనర్హత పిటిషన్‌ వేసిన ప్రభుత్వ చీఫ్‌ విప్‌ ప్రసాదరాజు సమక్షంలోనే విచారణ జరగాలి గనుక ఆయనకు కూడా నోటీసులు జారీ చేసింది స్పీకర్‌ కార్యాలయం.

ఇటు వైఎస్సార్‌సీపీ రెబల్ ఎమ్మెల్సీలు సి రామచంద్రయ్య, వంశీకృష్ణ లకు శాసనమండలి ఛైర్మన్ కొయ్యే మోషేన్ నోటీసులు జారీ చేశారు. దీంతో విచారణకు హాజరయ్యే విషయంపై వీళ్లంతా నిపుణుల సలహాలు తీసుకుంటున్నట్లు సమాచారం.మరోవైపు టీడీపీ రెబల్‌ ఎమ్మెల్యేల విషయంలోనూ విచారణాంతరం నిర్ణయం ప్రకటించాల్సి ఉంటుంది. రాజ్యసభ ఎన్నికల వేళ.. రెబల్‌ ఎమ్మెల్యేల వ్యవహారం ఆసక్తికరంగా మారింది.