రాప్తాడు సిద్ధం సభకు పోటెత్తిన కార్యకర్తలు,,,,సభా ప్రాంగణం నిండిపోయి బయట ఎదురుచూపులు

రాప్తాడు సిద్ధం సభ సూపర్ హిట్ అయ్యింది. వైఎస్ఆర్‌సీపీ శ్రేణులు ఊహించని దానికంటే ఎక్కువ మంది కార్యకర్తలు, అభిమానులు సిద్ధం సభకు తరలివచ్చారు. రాప్తాడులో జరిగిన సిద్ధం సభకు సుమారు పదిలక్షల మంది జనం వచ్చినట్లు వైసీపీ శ్రేణులు చెబుతున్నాయి. ఇదో రికార్డుగా పేర్కొంటున్నాయి. మరోవైపు ఎండను సైతం లెక్కచేయక తరలివచ్చిన కార్యకర్తలను చూసి జగన్ సైతం.. కొత్త ఉత్సాహంతో కనిపించారు. కార్యకర్తలను, అభిమానులతో విజిల్స్ కొట్టించేలా ప్రత్యర్థి పార్టీలపై మాస్ పంచులేశారు. ఇదే సమయంలో..ఈరోజు రాయలసీమలో సముద్రం కనిపిస్తోందని జగన్ అన్నారు. జిల్లాల విభజన తర్వాత రాయలసీమకు జలసముద్రం వస్తే ఈరోజు రాప్తాడుకు జనసముద్రం వచ్చిందని అభివర్ణించారు. ఇక కార్యక్రమంలో సీఎం జగన్ ప్రసంగం ఆసాంతం.. ఈలలు, విజిల్స్‌తో కార్యకర్తలు మోతెక్కించారు.

ఇదే సభలో కుర్చీ మడతపెట్టి మాటను మరోసారి ప్రత్యర్థులపై జగన్ ప్రయోగించారు. ఏపీ ప్రజలు చొక్కా మడతేసి, కుర్చీలు మడతపెట్టి.. చీపుర్లతో టీడీపీ పార్టీని ఊడ్చేయాలంటూ జగన్ పిలుపునిచ్చారు.ఇంటి బయట సైకిల్.. ఇంట్లో ఎప్పుడూ ఫ్యాన్ అంటూ జగన్ వేసిన సెటైర్లకు కార్యకర్తల నుంచి విజిల్స్ వినిపించాయి. అలాగే ఎన్నికల కోసం సమరభేరి మోగిద్దామని .. అందుకు సిద్ధమైతే సెల్‌ఫోన్లో టార్చ్ వెలిగించాలంటూ జగన్ ఇచ్చిన పిలుపుతో.. సభా ప్రాంగణం మొత్తం టార్చిలైట్లు వెలిగిపోయాయి. సభ కోసం సుమారు పదిలక్షల మంది తరలిరాగా .. చాలామంది సభా ప్రాంగణం ఖాళీ లేక జాతీయ రహదారిపైనా నిల్చోవాల్సి వచ్చింది.

ఇక సిద్ధం సభ విజయవంతం కావటంతో వైసీపీ శ్రేణులు సైతం సంతోషపడుతున్నాయి.ఈ సభ కోసం రాప్తాడులోని ఆటోనగర్ వద్ద 110 ఎకరాల్లో ఏర్పాట్లు చేశారు నేతలు. అలాగే అధినేతను చూసేందుకు తరలివచ్చే అభిమాన గణానికి ఎలాంటి ఇబ్బందులు కలగకుండా ప్రత్యేక జాగ్రత్తలు తీసుకున్నారు. సభ పరిసర ప్రాంతాల్లో 16 చోట్ల వాహనాల పార్కింగ్ కోసం ఏర్పాట్లు చేశారు. రాప్తాడుతో కలిసి ఇప్పటికి మూడు సిద్ధం సభలు పూర్తికాగా.. నాలుగో సభ కోసం వైసీపీ ఏర్పాట్లు చేస్తోంది.