సారూ.. ప్రాసలు, పంచులు మీద పెట్టిన శ్రద్ధలో సగం అటు కూడా పెట్టుంటే బాగుండేది: నాగబాబు

అనంతపురం జిల్లా రాప్తాడు సిద్ధం సభలో ముఖ్యమంత్రి వైఎస్ జగన్.. టీడీపీ, జనసేన పార్టీలపై పంచ్‌లు పేల్చారు. ఫ్యాన్‌ ఇంట్లో ఉండాలి.. సైకిల్‌ను బయట పడేయండి.. తాగేసిన టీ గ్లాస్‌ సింక్‌లో పడేయండి అంటూ ఘాటుగా వ్యాఖ్యలు చేశారు. అయితే సీఎం చేసిన కామెంట్స్‌కు మెగా బ్రదర్, జనసేన పార్టీ నేత నాగబాబు ట్విట్టర్ వేదికగా కౌంటర్ ఇచ్చారు. ‘ 'గ్లాస్' సింక్ లో ఉన్నా తెల్లారితే మళ్లీ తేనేటి విందునిస్తుంది. కాని 'ఫ్యాన్' రెక్కలు విరిగితే విసనకర్ర ఇచ్చినంత గాలీ కూడా ఇవ్వదు.. అయిన సారూ మీరు పబ్లిక్ మీటింగ్స్ లో ప్రాసలు, పంచులు మీద పెట్టిన శ్రద్ధ లో సగం 'ప్రజాపరిపాలన' మీద పెట్టుంటే బాగుండేది’ అంటూ నాగబాబు కౌంటరిచ్చారు. నాగబాబు ట్వీట్‌‌‌పై జనసేన, వైఎస్సార్‌సీపీ కార్యకర్తల మధ్య వార్ జరుగుతోంది.

2024 ఎన్నికల్లో జరగబోతున్న ఈ యుద్ధం రెండు సిద్ధాంతాల మధ్య జరగబోతుందనర్నారు. ఈ యుద్ధంలో పేదలు ఒకవైపున ఉంటే, పెత్తందారులకు మరోవైపునకు ఉంటే ఇద్దరికీ యుద్ధం జరగబోతుందన్నారు. ఈ యుద్ధం విశ్వసనీయతకు, మోసానికి మధ్య జరగబోతోందన్నారు. ఈ యుద్ధం వేరే రాష్ట్రంలో ఉంటూ మోసం చేసేందుకు అప్పుడప్పుడూ ఆంధ్రప్రదేశ్ రాష్ట్రానికి వచ్చిపోతున్న నాన్‌ రెసిడెంట్స్‌ ఆంధ్రాస్‌కు... ఈ గడ్డమీదే పుట్టి ఈ గడ్డమీదే మమకారంతో ఇక్కడే ఇళ్లుకట్టుని, ఇక్కడే ప్రజల మధ్యే ఉన్న మనకూ మధ్య జరగబోతుందన్నారు.

14 ఏళ్లూ ముఖ్యమంత్రిగా పరిపాలన చేసిన చంద్రబాబు చెబితే గుర్తుకు వచ్చే ఒక్కటంటే ఒక్క పథకమైనా ఉందా? అని ప్రశ్నించారు. చంద్రబాబు పేరు చెబితే ఏ ఒక్కరికీ కూడా ఆయన ముఖ్యమంత్రిగా ఉండగా ఫలానా మంచి చేశారని, ఫలానా మంచి పథకం తీసుకువచ్చారని చెప్పుకునేందుకు ఒక్కటంటే ఒక్క పథకం గుర్తుకురాదన్నారు. ప్రతి సామాజికవర్గం కోసం ఎన్నికలప్పుడు మేనిఫెస్టోలో రంగురంగులగా రాయడం.. ఆ తర్వాత ఆ సామాజిక వర్గాన్ని మోసం చేయడం చంద్రబాబునాయుడు ఆనవాయితీగా పెట్టుకున్నారని విమర్శించారు.

చంద్రబాబు నడక కోసం అటో కర్రా, ఇటో కర్ర ఎందుకు..తన సైకిల్‌ తోయడానికి నీకొక ప్యాకేజీ స్టార్‌ ఎందుకని ప్రశ్నించారు. పొరపాటు చేశారంటే చంద్రముఖి మళ్లీ సైకిలెక్కుతుంది. టీ గ్లాస్‌ పట్టుకొని మీ ఇంటికొస్తుంది. పేదల రక్తం తాగేందుకు లకలకా అంటూ ఇంటి తలుపులు తడుతుందని ప్రతి అక్కకూ, ప్రతి చెల్లెమ్మకూ చెప్పాలన్నారు. దుష్ట చతుష్టయం బాణాలకు బలి కావడానికి, తలవంచడానికి ఇక్కడ ఉన్నది అభిమన్యుడు కాదు. ఇక్కడ ఉన్నది అర్జునుడు అన్నారు. ఆ అర్జునుడికి తోడు కృష్ణుడి రూపంలో ఉన్న ఇంత మంది.. ఇన్ని లక్షల గుండెలు, కోట్ల గుండెలు. ప్రతి పేదవాడి ఇంట్లో ఈ బిడ్డ మా బిడ్డ అంటూ తోడుగా ఉండే గుండెలు అన్నారు. కేవలం ఒకే ఒక్కడి మీద యుద్ధం చేయడానికి ఇంత మంది తోడేళ్లు ఏకం అవుతున్నారు.