అయోధ్య రామమందిరంపై కాంగ్రెస్ మంత్రి వివాదాస్పద వ్యాఖ్యలు

అయోధ్య దివ్య రామ మందిరంలో 5 ఏళ్ల వయసు ఉన్న బాల రాముడు కొలువుదీరాడు. గత నెలలో జరిగిన ప్రాణ ప్రతిష్ఠ కార్యక్రమం తర్వాత దేశ వ్యాప్తంగా లక్షలాది మంది రామ భక్తులు అయోధ్యకు పోటెత్తుతున్నారు. ఈ క్రమంలోనే అయోధ్య నగరం మొత్తం జై శ్రీరాం నినాదాలతో మారుమోగిపోతోంది. ఈ నేపథ్యంలోనే కర్ణాటకకు చెందిన ఓ మంత్రి చేసిన వ్యాఖ్యలు తీవ్ర దుమారం రేపుతున్నాయి. కాంగ్రెస్ నేత, కర్ణాటక రాష్ట్ర కార్మిక శాఖ మంత్రి సంతోష్ లాద్ ఈ వ్యాఖ్యలు చేశారు. సంతోష్ లాద్ చేసిన ఈ వ్యాఖ్యలపై బీజేపీ నాయకులు తీవ్ర విమర్శలు చేస్తున్నారు.

సోమవారం బెంగళూరులో మాట్లాడిన మంత్రి సంతోష్ లాద్.. రాజకీయ ఉద్దేశంతోనే బీజేపీ రామ మందిరాన్ని నిర్మించిందని తీవ్ర ఆరోపణలు చేశారు. ఈ క్రమంలోనే అయోధ్యలో రామ మందిర నిర్మాణం దేశంలోని పేదరికాన్ని నిర్మూలించగలిగిందా అని చేసిన వ్యాఖ్యలు తీవ్ర దుమారానికి కారణం అయ్యాయి. ఇప్పుడు ఈ వ్యాఖ్యలే కర్ణాటకలో మరోసారి రాజకీయ ఘర్షణను రేపింది. దీంతో అధికార కాంగ్రెస్, ప్రతిపక్ష బీజేపీ మధ్య తీవ్ర మాటల యుద్ధం చోటు చేసుకుంది.

అయోధ్య రామమందిరాన్ని బీజేపీ ఎన్నికల్లో లబ్ధి పొందడానికి నిర్మించింది. సుప్రీంకోర్టు సూచించిన ప్రదేశం కాకుండా వేరే ప్రాంతంలో ఆలయాన్ని నిర్మించారని మంత్రి సంతోష్ లాద్ పేర్కొన్నారు. అంతే కాకుండా అయోధ్య రామ మందిర నిర్మాణాన్ని కాంగ్రెస్ పార్టీ వ్యతిరేకించట్లేదని చెబుతూనే.. సుప్రీం కోర్టు సూచించిన స్థలంలో కేవలం 40 శాతం ఆలయాన్ని మాత్రమే నిర్మించారని తెలిపారు. మిగిలిన ఆలయాన్ని వేరే ప్రాంతంలో కట్టారని తీవ్ర వివాదాస్పద వ్యాఖ్యలు చేశారు.

ఇక ఓ వైపు రైతులు తమ డిమాండ్లు నెరవేర్చాలని దేశ రాజధాని ఢిల్లీలో నిరసనలు చేస్తుంటే.. నరేంద్ర మోదీ నేతృత్వంలోని కేంద్ర ప్రభుత్వం తమకేమీ పట్టనట్టు వ్యవహరిస్తోందని ఆరోపించారు. ఆలయాన్ని నిర్మించి బీజేపీ ఓట్లు అడగడమేంటి అని ప్రశ్నించారు. ఆలయం వల్ల రైతులు, పేద ప్రజలు లబ్ధి పొందారా.. రైతులపై బుల్డోజర్లు, టియర్ గ్యాస్‌లు ఎందుకు ప్రయోగిస్తున్నారని మంత్రి సంతోష్ లాద్ మండిపడ్డారు.

అయితే అయోధ్య రామ మందిరంపై కాంగ్రెస్ మంత్రి సంతోష్ లాద్ చేసిన వ్యాఖ్యలను బీజేపీ తీవ్రంగా ఖండించింది. 500 ఏళ్ల చరిత్ర కలిగిన రామమందిరంపై వివాదాస్పద వ్యాఖ్యలు చేయడం సరికాదని కర్ణాటక మాజీ సీఎం బసవరాజ్ బొమ్మై పేర్కొన్నారు. కర్ణాటకలో చేయాల్సిన పనులపై మంత్రి దృష్టి పెడితే బాగుంటుందని హితవు పలికారు. మంత్రి వ్యాఖ్యలను మాజీ ఉప ముఖ్యమంత్రి అశ్వత్ నారాయణ్ కూడా ఖండించారు. రామ మందిర చరిత్రను మంత్రి తెలుసుకోవాలని సూచించారు.