గుడివాడ వైసీపీ టికెట్‌ నానికి కాదా?.. తెరపైకి వైఎస్సార్‌కు విధేయుడి పేరు, ఫ్లెక్సీలు ఏర్పాటు

గుడివాడ వైఎస్సార్‌సీపీలో రాజకీయం ఆసక్తికరంగా మారింది. కొద్దిరోజులుగా నియోజకవర్గాల్లో మార్పులు, చేర్పులు చేస్తున్న అధిష్టానం గుడివాడ సీటుపై ఎలాంటి క్లారిటీ ఇవ్వలేదు. మాజీ మంత్రి కొడాలి నానికి మరోసారి పోటీ చేయడం ఖాయమని వైఎస్సార్‌సీపీ కేడర్ ధీమాతో ఉంది. నానికి తప్ప మరొకరికి అవకాశం ఉండదనే చర్చ జరుగుతోంది. ఈ క్రమంలో గుడివాడలో ఓ ఆసక్తికర పరిణామం జరిగింది. పట్టణంలో ఏర్పాటు చేసిన ఫ్లెక్సీలతో తెరపైకి కొత్త పేరు వచ్చింది.

ఎమ్మెల్యే కొడాలి నానికు షాకిస్తూ.. గుడివాడ వైఎస్సార్‌సీపీలో అసమ్మతి సెగను బయటపడేశారు. గుడివాడ వైఎస్సార్‌సీపీ అభ్యర్థి అంటూ మరో కొత్త వ్యక్తి పేరుతో ఫ్లెక్సీలను ఏర్పాటు చేశారు. వైఎస్సార్‌సీపీ గుడివాడ అభ్యర్థిగా ఎంపిక కాబోతున్న హనుమంతరావుకు శుభాకాంక్షలంటూ ప్రధాన కూడళ్లలో ఫ్లెక్సీలు వెలిశాయి. వైఎస్సార్‌సీపీ జిల్లా ఉపాధ్యక్షుడు మండలి హనుమంతరావుకు సీఎంవో నుంచి పిలుపు వచ్చిందంటు ఫోన్లలో వైఎస్సార్‌సీపీ నేతల గుసగుసలాడుకుంటున్నారు.

హనుమంతరావుకు శుభాకాంక్షలు చెబుతూ సోషల్ మీడియాలో ప్రచారం జరుగుతోంది. ఆయనకు దివంగత వైఎస్ఆర్ కుటుంబానికి వీర విధేయుడుగా గుర్తింపు ఉందని.. అది కలిసొచ్చే అంశంగా చెబుతున్నారు. పట్టణంలో ఏర్పాటైన బ్యానర్లతో రాజకీయ వర్గాల్లో నెలకొన్న చర్చ మొదలైంది. ఒకవేళ హనుమంతరావు వైపు అధిష్టానం మొగ్గు చూపితే కొడాలి నాని పరిస్థితి ఏంటనే ప్రశ్నలు వినిపిస్తున్నాయి.

గుడివాడ నియోజకవర్గం గతంలో టీడీపీకి కంచుకోటగా ఉంది.. కొడాలి నాని వైఎస్సార్‌సీపీకి వెళ్లిన తర్వాత సీన్ మారిపోయింది. కొడాలి నాని 2004, 2009లో టీడీపీ నుంచి విజయం సాధించారు.. అయితే 2014 ఎన్నికలకు ముందు అనూహ్యంగా వైఎస్సార్‌సీపీలోకి వెళ్లిపోయారు. దీంతో అక్కడి బాధ్యతల్ని మాజీ ఎమ్మెల్యే రావి వెంకటేశ్వరరావుకు అప్పగించారు. 2014, 2019 ఎన్నికల్లో టీడీపీకి ఓటమి ఎదురైంది.. అక్కడ నాని బలమైన నేతగా ఎదిగారు. 2014లో రావి వెంకటేశ్వరరావు, 2019లో దేవినేని అవినాష్‌లు టీడీపీ తరఫున పోటీచేసి నాని చేతిలో ఓడిపోయారు.

2019 ఎన్నికల్లో కొడాలి నాని విజయం సాధించి జగన్ కేబినెట్‌లో మంత్రి అయ్యారు. రెండో విడత మంత్రివర్గ విస్తరణలో నానికి పదవి దక్కలేదు. అయితే కొద్దిరోజులుగ వైఎస్సార్‌సీపీ అధిష్టానం నియోజకవర్గాలవారీగా సమన్వయకర్తల్ని మార్చే పనిలో ఉంది. ఈ క్రమంలో గుడివాడ టికెట్ ఎవరిది అనేది తేల్చలేదు.. ఇప్పటి వరకు అధికారికంగా ఎలాంటి ప్రకటన రాలేదు.. ఈ క్రమంలో కొత్తగా మండలి హనుమంతరావు పేరు తెరపైకి వచ్చింది. ఆయన కాపు సామాజిక వర్గానికి చెందిన నేతగా చెబుతున్నారు. ఈ తాజా పరిణామాలపై కొడాలి నాని స్పందించాల్సి ఉంది. మరి గుడివాడ సీటుపై వైఎస్సార్‌సీపీ అధిష్టానం ఏం తెలుస్తుందన్నది చూడాలి.