సీటు షేరింగ్, పవర్ షేరింగ్ అన్నావ్.. ముష్టి 24 సీట్లా?.. పవన్‌పై రోజా తీవ్ర వ్యాఖ్యలు

2024 అసెంబ్లీ ఎన్నికల కోసం టీడీపీ- జనసేన ఉమ్మడిగా అభ్యర్థుల జాబితా విడుదల చేశాయి. 99 మందితో ఫస్ట్ లిస్టు రిలీజ్ చేశాయి. ఇక పొత్తులో భాగంగా జనసేన కోసం 24 సీట్లు కేటాయించగా.. ఐదు స్థానాలకు పవన్ కళ్యాణ్ అభ్యర్థులను ప్రకటించారు. అయితే జనసేనకు కేవలం 24 సీట్లేనా అంటూ సోషల్ మీడియాలో పెద్దఎత్తున చర్చ జరుగుతోంది. జనసైనికులు, పవన్ కళ్యాణ్ ఫ్యా్న్స్ దీనిపై మండిపడుతున్నారు. ఇదే క్రమంలో అధికార వైసీపీ సైతం టీడీపీ, జనసేన ఉమ్మడి జాబితాపై విమర్శలు ప్రారంభించింది. మంత్రి రోజా, ఏపీ ప్రభుత్వ ప్రధాన సలహాదారు సజ్జల రామకృష్ణారెడ్డి.. టీడీపీ, జనసేన తొలి జాబితాపై కీలక వ్యాఖ్యలు చేశారు.

తిరుపతిలో జరిగిన విలేకర్ల సమావేశంలో మాట్లాడిన మంత్రి రోజా.. పవన్ కళ్యాణ్ మీద, జనసేన మీద సెటైర్లు వేశారు. పావలా సీట్లు కూడా తెచ్చుకోలేకపోయిన పవన్ కళ్యాణ్.. పార్టీ ఎందుకు పెట్టారో ఆయనకే తెలియాలంటూ ఎద్దేవా చేశారు. అభ్యర్థుల ప్రకటనపై టీడీపీ ,జనసేన కార్యకర్తలు ఏడుస్తున్నారన్న రోజా.. పవర్ షేరింగ్, సీట్ షేరింగ్ అని చెప్పిన పవన్ కళ్యాణ్.. పావలా షేర్ కూడా తెచ్చుకోలేకపోయాడంటూ ఎద్దేవా చేశారు. కుక్క బిస్కెట్లు వేస్తే తోక ఊపినట్లు..చంద్రబాబుతో పవన్ కళ్యాణ్ ప్రెస్ మీట్ పెట్టారని విమర్శలు చేశారు.

"24 సీట్లే చాలని పవన్ కళ్యాణ్ ఎందుకు తల ఊపారో? ఏ ప్యాకేజీ కోసం 24 సీట్లకు తల వంచారో ఆయనే చెప్పాలి. పవర్‌ స్టార్‌ కాస్తా పవర్‌ లేని స్టార్‌ అయ్యారు. ఎవరితో పొత్తుపెట్టుకోవాలో తెలియని గందరగోళంలో ఆ పార్టీలు ఉన్నాయి. 118 సీట్లు ప్రకటించినా ఇంకా గందరగోళం ఉంది. కనీసం పవన్ కళ్యాణ్ ఎక్కడి నుంచి పోటీ చేయాలనే విషయంలోనూ క్లారిటీ లేదు. రాష్ట్రం విడిపోయాక చంద్రబాబుకు అధికారం ఇస్తే రాష్ట్రాన్ని అప్పుల పాలు చేశారు. ఇప్పుడు రాష్ట్ర భవిష్యత్ కోసం పొత్తు అంటే ప్రజలు నవ్వుకుంటున్నారు".. అని రోజా అన్నారు.

మరోవైపు జనసేన అధినేత పవన్‌ కల్యాణ్‌ను చూస్తే జాలేస్తోందని ప్రభుత్వ ప్రధాన కార్యదర్శి సజ్జల రామకృష్ణారెడ్డి అన్నారు. జనసేన అభ్యర్థులను కూడా చంద్రబాబు డిసైడ్‌ చేస్తారా అంటూ సెటైర్లు వేశారు. ఎన్నికల్లో చంద్రబాబు పడేసే సీట్లు తీసుకునే స్థాయికి పవన్ కళ్యాణ్ పడిపోయారని.. టీడీపీ ఉపాధ్యక్ష పదవి తీసుకుంటే సరిపోతుందంటూ సెటైర్లు గుప్పించారు. జనసేన పోటీ చేసే 24 సీట్లలో కూడా టీడీపీ అభ్యర్థులే ఉంటారన్న సజ్జల.. 24 మందితో ఏం యుద్ధం చేస్తారని ప్రశ్నించారు. రాజకీయ పార్టీని నడిపే లక్షణాలు పవన్‌కు లేవని విమర్శలు గుప్పించారు.