‘రండి, కూర్చుని భోజనం చేద్దాం’.. ఆర్టీసీ వినూత్న ప్రయోగం

కాలం చెల్లిన బస్సులను వేలంలో విక్రయించడం లేదా వాటిని స్క్రాప్‌గా మార్చడం అమ్మడం చేస్తుంటారు. కానీ, కర్ణాటక రాష్ట్ర రోడ్డు రవాణా సంస్థ వినూత్నంగా ఆలోచించింది. ఇకపై వాటిని విక్రయించకుండా.. ‘హోటల్‌ ఆన్‌ వీల్స్‌’గా తీర్చి దిద్దాలని నిర్ణయించింది. ఇందులో భాగంగా ప్రయోగాత్మకంగా ఒక బస్సును రీమోడల్‌ చేశారు. బస్టాండ్‌, చుట్టుపక్కల ప్రదేశాల్లో ప్రయాణికులకు ఆహారాన్ని, అప్పటికప్పుడు టీ, కాఫీ తయారు చేసి విక్రయించేందుకు అనువైన మినీ హోటల్‌గా మార్చేశారు. టైనింగ్ టేబుల్, కుర్చీలతో పాటు ఫ్యాను, చేతులు కడుక్కోవడానికి ఓ సింకును ఉంచి.. దానికి అవసరమైన నీటి కోసం బస్సుపై ట్యాంకు అమర్చారు. తాగునీటికి కూడా ఏర్పాట్లు చేశారు.

సంస్థలో పనిచేసి పదవీ విరమణ చేసిన ఉద్యోగులు, స్వయం ఉపాధి కింద హోటల్‌ను నిర్వహించుకునే వారికి ఈ రీమోడల్ బస్సులు ఉపయోగపడతాయని అధికారులు తెలిపారు. ఆహారం బండి.. రండి, కూర్చుని భోజనం చేద్దాం అని పేరు పెట్టారు. వీటికి వచ్చే స్పందనకు అనుగుణంగా గ్యారేజ్‌కు పరిమితమైన బస్సులను సరికొత్త భోజన బళ్లుగా మార్చాలని అధికారులు భావిస్తున్నారు. తొలి విడతలో ఈ బస్సులను బెంగళూరులోని పీన్యా, యశ్వంతపూర్ డిపోల పరిధిలో అందుబాటులోకి తీసుకొస్తారు. హాస్పిటల్స్, బస్సు స్టేషన్లు, రైల్వే స్టేషన్ల వంటి బహిరంగ ప్రదేశాలలో వీటిని మొబైల్ క్యాంటీన్లుగా వినియోగించనున్నారు.

బెంగళూరు మెట్రోపాలిటిన్ ట్రాన్స్‌పోర్ట్ కార్పొరేషన్ (బీఎంటీసీ) అధికారులు మాట్లాడుతూ.. 10.64 లక్షల కిలోమీటర్లు తిరిగిన బస్సులను మొబైల్ క్యాంటీన్‌లుగా మార్చనున్నట్టు తెలిపారు. బీఎంటీసీ ఎండీ మార్గదర్శకంలో నలుగురు ఉద్యోగుల బృందం ఈ ప్రాజెక్ట్ బాధ్యతలను చూస్తోందని చెప్పారు. ఇక, ఈ బస్సులకు సహజసిద్ధంగా గాలి, వెలుతురు వచ్చేందుకు వీలుగా రూఫ్‌పై గ్లాస్ ప్యానెల్, వెంటిలేటర్లు అమర్చారు. ఈ క్యాంటిన్ల వల్ల ఉద్యోగాలు, ఇంటర్వ్యూలు, పోటీ పరీక్షల కోసం నగరాలకు వచ్చే విద్యార్థులతో పాటు పర్యాటకులకు ఎంతో ప్రయోజనం ఉంటుందని నెటిజన్లు అంటున్నారు.

కాగా, 2020లో కేరళ రాష్ట్ర రోడ్డు రవాణా సంస్థ డీలక్స్ బస్సులను డార్మెటరీలుగా మార్చి.. ప్రముఖ పర్యాటక కేంద్రం మున్నార్‌ హిల్ స్టేషన్‌లో పర్యాటకుల కోసం అందుబాటులోకి తెచ్చింది. కర్ణాటక రాష్ట్ర రోడ్డు రవాణా సంస్థ కూడా పాత స్లీపర్ బస్సులను అటువంటి సౌకర్యాన్ని కల్పించాలని, దీని వల్ల ఆదాయం వస్తుందని చాలా మంది సూచించారు.