అమెరికాలో అగ్ని ప్రమాదం.. భారతీయ యువ జర్నలిస్ట్ మృతి

అమెరికాలో జరిగిన అగ్ని ప్రమాదంలో ఓ భారతీయుడు ప్రాణాలు కోల్పోయాడు. న్యూయార్క్‌లోని హర్లేమ్ ప్రాంతంలోని ఓ అపార్ట్‌మెంట్‌లో అగ్ని ప్రమాదం సంభవించింది. పార్కింగ్‌లో ఉన్న ఎలక్ట్రిక్ బైక్ బ్యాటరీ పేలి మంటలు చెలరేగి భవనానికి వ్యాపించాయి. ఈ మంటల్లో చిక్కుకుని భారతీయ జర్నలిస్ట్ ఫాజిల్ ఖాన్ మృతి చెందగా.. మరో 17 మంది తీవ్రంగా గాయపడ్డారు. మంటలను గమనించిన కొందరు కిటికీల్లో నుంచి దూకి ప్రాణాలు దక్కించుకున్నారు. కానీ, 27 ఏళ్ల ఫాజిల్ ఖాన్ మాత్రం ఆ మంటల్లో చిక్కుకుని చనిపోయినట్టు ఈ మేరకు భారత రాయబార కార్యాలయానికి అక్కడి అధికారులు సమాచారం అందించారు.

ఈ విషయం గురించి ట్విట్టర్‌లో షేర్ చేసిన న్యూయార్క్ రాయబార కార్యాలయం ‘న్యూయార్క్‌లో జరిగిన అగ్ని ప్రమాదంలో భారతీయుడు ఫాజిల్ ఖాన్ మృతి దిగ్భ్రాంతికి గురి చేసింది.. ఇది చాలా దురదృష్టకరం.. న్యూయార్క్‌లోని ఎంబసీ అధికారులు ఫాజిల్ కుటుంబంతో ఎప్పటికప్పుడు మాట్లాడుతున్నారు. అతడి మృతదేహాన్ని స్వదేశానికి తరలించేందుకు అన్ని ప్రయత్నాలు చేస్తున్నాం. ఈ విషయంలో సహకరించేందుకు సిద్ధంగా ఉన్నాం’ అని తెలిపింది.

కొలంబియా జర్నలిజం స్కూల్‌లోని ఫాజిల్ ఖాన్ డేటా జర్నలిస్ట్‌గా పని చేస్తున్నాడు. అతడి లింక్డిన్ ప్రొఫైల్ ప్రకారం.. 2018లో కాపీ ఎడిటర్‌గా కెరీర్‌ని ప్రారంభించిన ఫాజిల్.. తర్వాత సీఎన్ఎన్ న్యూస్ 18లో ఢిల్లీ కరెస్పాండెంట్‌గా పనిచేశాడు. అనంతరం కొలంబియా యూనివర్సిటీలో గ్రాడ్యుయేషన్ కోసం 2020లో న్యూయార్క్‌కి వెళ్లాడు. దురదృష్టవశాత్తూ అగ్ని ప్రమాదంలో ప్రాణాలు కోల్పోయాడు. మంటలు చెలరేగిన వెంటనే తాళ్ల సాయంతో కొందరిని బయటకు తీసుకొచ్చారు. కొంత మంది పైనుంచి దూకి ప్రాణాలు కాపాడుకున్నారు.

గొప్ప సహచరుడ్ని కోల్పోయామని ఫాజిల్ మృతిపై కొలంబియా జర్నలిజం స్కూల్ తీవ్ర విచారం వ్యక్తం చేసింది. ‘హెచింగర్ డేటా రిపోర్టర్ ఫాజిల్ ఖాన్ నివసిస్తున్న న్యూయార్క్ సిటీ భవనంలో అగ్నిప్రమాదం చోటుచేసుకుని చనిపోయినట్టు శనివారం తెలిసింది.. అలాంటి మంచి వ్యక్తిని కోల్పోవడం చాలా బాధగా ఉంది.. ఒక గొప్ప సహోద్యోగి.. అద్భుతమైన వ్యక్తి.. ఆయన కుటుంబానికి ప్రగాఢ సానుభూతి తెలియజేస్తున్నాం..’ అని ట్వీట్ చేశారు.

మంటలను ఆర్పడానికి డజన్లు కొద్దీ ఫైర్ ఇంజిన్లు తీవ్రంగా శ్రమించాయని అధికారులు తెలిపారు. చాలా మంది చాలా మంది వ్యక్తులు తమ ప్రాణాలను కాపాడుకోవడానికి పై నుంచి దూకినట్టు చెప్పారు. భయకంరమైన ఈ ప్రమాదం గురించి స్థానికుడు మాట్లాడుతూ.. ‘మంటలు ఎగిసిపడుతుంటే ప్రజలు కిటికీల నుంచి దూకుతున్నారు.’ అని చెప్పారు. 18 మందిని కాపాడామని, వీరిలో 12 మంది ఆస్పత్రిలో చికిత్స పొందుతున్నారని అధికారులు పేర్కొన్నారు.