వైరల్ అవుతోన్న దివంగత జయలలిత ఆడియో సందేశం

సార్వత్రిక ఎన్నికల సమీపిస్తోన్న తరుణంలో తమిళనాడు దివంగత ముఖ్యమంత్రి, అన్నాడీఎంకే అధినేత్రి జయలలిత (Jayalalithaa) ఆడియో సందేశం ప్రస్తుతం సోషల్ మీడియాలో వైరల్‌గా మారింది. ఏడేళ్ల కిందట తీవ్ర అనారోగ్యంతో జయలలిత కన్నుమూసిన విషయం తెలిసిందే. అలాంటిది ఆమె ఆడియో సందేశం ఇవ్వడం ఏంటని అనుకోవద్దు. దీనిని ఆర్టిఫిషియల్ ఇంటెలిజెన్స్ మాయాజాలంతో ఆ పార్టీ తయారుచేసింది. జయలలిత 76వ జయంతిని పురస్కరించుకుని ‘కృత్రిమ మేధ’ సాయంతో రూపొందించిన జయలలిత ప్రసంగాన్ని అన్నాడీఎంకే శనివారం తన అధికారిక ట్విట్టర్ (ఎక్స్)లో విడుదల చేసింది.

అన్నాడీఎంకే అధికారంలో ఉన్నప్పుడు రాష్ట్రంలో చేపట్టిన సంక్షేమ కార్యక్రమాల గురించి ప్రస్తావిస్తూ.. ప్రజాపాలన స్థాపనలో భాగంగా ఎడప్పాడి పళనిస్వామికి మద్దతు ఇవ్వాలని ఆమె తమిళ ప్రజలను కోరుతున్న ఆడియో ఇప్పుడు హల్‌చల్ చేస్తోంది. అచ్చం అమ్మ మాట్లాడినట్టే ‘‘నేను ప్రజల వల్లే ఉన్నాను.. నేను ప్రజల కోసమే ఉన్నాను’’ అంటూ తనదైన ప్రసిద్ధ పదబంధాన్ని వినియోగించారు. ఈ సందర్భంగా పార్టీ ఎన్నికల నినాదం ‘‘తమిళ హక్కులను తిరిగి పొందుదాం- తమిళనాడును కాపాడుకుందాం’’ను మాజీ సీఎం పళనిస్వామి విడుదల చేశారు.

‘‘హలో. నేను మీ జె జయలలితను మాట్లాడుతున్నాను.. మీతో మాట్లాడే అవకాశాన్ని కల్పించిన ఈ సాంకేతికతకు నా కృతజ్ఞతలు తెలియజేస్తున్నాను.. మా పార్టీ ఎన్నో ఎత్తుపల్లాలు చూసింది. మేము అధికారంలో ఉన్నప్పుడు మహిళలు, విద్యార్థినుల కోసం అనేక సంక్షేమ పథకాలు అమలు చేశాం... ఇప్పుడు, ఒక వైపు, మనకు ద్రోహం చేస్తున్న కేంద్ర ప్రభుత్వం ఉంది, మరోవైపు, రాష్ట్రంలో అవినీతి ప్రభుత్వం.. నా పుట్టినరోజు సందర్భంగా, అన్నాడీఎంకే 'ప్రజా ప్రభుత్వం' మళ్లీ రావాలని నేను మిమ్మల్ని కోరుతున్నాను.. మా కార్యకర్తలు నా బాటలో నిలబడాలి.. సోదరుడు ఎడప్పాడి పళనిస్వామికి మద్దతుగా ఉండాలని మిమ్మల్ని అభ్యర్థిస్తున్నాను. నేను ప్రజల వల్ల, ప్రజల కోసమే ఉన్నాను’’ అని ఆడియోలో జయ గొంతును వినిపించారు.