బైడెన్‌కు షాక్.. డెమొక్రాట్ల అభ్యర్థిగా ఒబామా భార్య మిచెల్లీ!

ఈ ఏడాది జరగబోయే అమెరికా అధ్యక్ష ఎన్నికల్లో డెమొక్రాటిక్ పార్టీ అభ్యర్థిగా జో బైడెన్ కంటే మిచెల్లీ ఒబామా అయితే బాగుంటుందని ఓ పోల్‌లో వెల్లడయ్యింది. రాస్ముస్సేన్ రిపోర్ట్స్ పోల్‌లో దాదాపు సగం మంది డెమొక్రాట్లు బైడెన్‌కు బదులు మిచెల్లీ ఒబామావైపే మొగ్గుచూపారు. అధ్యక్ష ఎన్నికల్లో పోరాడటానికి ఆమె సరైన అభ్యర్థిని అభిప్రాయపడ్డారు. నవంబర్‌లో జరిగే ఎన్నికలకు జో బైడెన్ స్థానంలో మరొక అభ్యర్థిని పార్టీ గుర్తించే ప్రక్రియను తాము ఆమోదిస్తున్నట్లు ఓటింగ్‌లో పాల్గొన్న డెమొక్రాట్‌లలో 48% మంది అంగీకరించారు. అయితే, 38% మంది మాత్రం వ్యతిరేకించారు. కేవలం 33 శాతం మంది డెమొక్రాట్‌లు మాత్రమే బ్యాలెట్ షేకప్ ఉంటుందని విశ్వసిస్తున్నారు.

 బైడెన్ స్థానంలో ఇతర పోటీదారులు వైస్ ప్రెసిడెంట్ కమలా హ్యారిస్, మాజీ విదేశాంగ కార్యదర్శి హిల్లరీ క్లింటన్, కాలిఫోర్నియా గవర్నర్ గావిన్ న్యూసోమ్, మిచిగాన్ గవర్నర్ గ్రెట్చెన్ విట్మర్ కంటే అధికంగా మిచెల్ ఒబామాకు 20 శాతం ఓట్లు వచ్చాయి. కమలా హ్యారిస్‌కు 15 శాతం, హిల్లరీ క్లింటన్‌కు 12 శాతం ఓట్లు మాత్రమే రావడం గమనార్హం. అధ్యక్ష ఎన్నికలలో మిచెల్లీ ఒబామా పోటీ చేయాలని పదే పదే కోరుతున్నారు. రాబోయే ఎన్నికల గురించి ఇటీవల తీవ్ర భయాన్ని వ్యక్తం చేసిన ఆమె.. ఇదోరకం ‘వేటాడటం’ అని అన్నారు. ‘ప్రభుత్వం నిజంగా ఏమైనా చేస్తుందా?' మన కోసం ప్రతిదీ చేస్తుందా? అని ప్రజలు భావిస్తారు.. దీని గురించి నేను కొన్నిసార్లు ఆందోళన చెందుతాను’ అని వ్యాఖ్యానించారు.

ఈ ఏడాది అమెరికా అధ్యక్ష ఎన్నికల్లో పోటీపడే డెమొక్రాట్, రిపబ్లికన్ అభ్యర్థుల ఎంపిక దాదాపు తుది అంకానికి చేరుకుంది. జో బైడెన్, డొనాల్డ్ ట్రంప్‌ల మధ్య మళ్లీ పోటీ ఖచ్చితంగా కనిపిస్తుంది. బైడెన్ వయస్సు అడ్డంకిగా ఉందని సర్వేలు సూచించినప్పటికీ తాను ఉత్తమ అభ్యర్థినని నొక్కి చెబుతున్నారు. అటు, పలు కేసులు ఎదుర్కొంటున్న మాజీ అధ్యక్షుడు డొనాల్డ్ ట్రంప్ తిరిగి తాను పోటీకి సై అంటున్నారు.