గ్రామ, వార్డు వాలంటీర్లపై ఏపీ హైకోర్టులో పిల్

ఏపీ హైకోర్టులో గ్రామ, వార్డు వాలంటీర్లపై పిల్ దాఖలైంది. రాజకీయ పార్టీ కార్యకలాపాల్లో పాల్గొనకుండా గ్రామ, వార్డు సచివాలయాల వాలంటీర్లను నిలువరించాలని కోరుతూ కడప జిల్లా రాజంపేటకు చెందిన షేక్‌ అబుబాకర్‌ సిద్ధిఖి దీన్ని దాఖలు చేశారు. వచ్చే సార్వత్రిక ఎన్నికల్లో వాలంటీర్లను పోలింగ్‌ బూత్‌ ఏజెంట్లుగా వ్యవహరించకుండా అడ్డుకోవాలని కోరారు. ఈ విషయంలో కేంద్ర ఎన్నికల సంఘం, చీఫ్‌ ఎలక్టోరల్‌ అధికారి ఈ ఏడాది ఫిబ్రవరిలో జారీ చేసిన ఉత్తర్వులకు అనుగుణంగా వ్యవహరించేలా ఆదేశించాలని విజ్ఞప్తి చేశారు. వారు వైఎస్సార్‌సీపీ అభ్యర్థుల తరఫున ప్రచారం, ఓటరు స్లిప్పుల పంపిణీ చేయకుండా నిలువరించాలని కోరారు.

 సార్వత్రిక ఎన్నికలు ముగిసే వరకు ప్రభుత్వ ప్రథకాలను వారితో పంపిణీ చేయించకుండా అధికారులను ఆదేశించాలని విన్నవించారు. వైఎస్సార్‌సీపీ కార్యకర్తలనే వాలంటీర్లుగా నియమించినందున స్వేచ్ఛాయుత, నిష్పాక్షిక ఎన్నికలపై ప్రతికూల ప్రభావం చూపే అవకాశం ఉందని ఆందోళన వ్యక్తం చేశారు. రాబోయే ఎన్నికల్లో వాలంటీర్లు వైఎస్సార్‌సీపీ కోసం పని చేయాలని సీఎం జగన్‌ కోరడాన్ని చట్టవిరుద్ధమైన చర్యగా ప్రకటించాలని కోరారు.

రాష్ట్ర ప్రభుత్వం, సీఎం జగన్‌ వైఎస్సార్‌సీపీకి చెందిన 2.57 లక్షల మంది కార్యకర్తలను వాలంటీర్లుగా నియమించడాన్ని రాజ్యాంగ విరుద్ధమని ప్రకటించాలని కోరారు. గ్రామ వార్డు సచివాలయ శాఖ ఏర్పాటు చేశాక దానికోసం రూ.7,770 కోట్లు ఖర్చు చేశారని పిటిషనర్‌ పేర్కొన్నారు. గౌరవ వేతనం కింద ఒక్కో గ్రామ వాలంటీర్‌కు నెలకు రూ.5 వేల చొప్పున రూ.1,200 కోట్లు, శిక్షణ కోసం మరో రూ.13.5 కోట్లు ఖర్చు చేశారని వెల్లడించారు. వార్డు వాలంటీర్ల జీతాల కోసం రూ.243 కోట్లు, శిక్షణ కోసం మరో రూ.3.44 కోట్లు వెచ్చించారన్నారు. ఈ సొమ్మంతా ప్రజలు పన్నుల రూపంలో చెల్లించినవేనని వివరించారు.

ఈ పిల్‌కు సంబంధించి ప్రభుత్వ ప్రధాన కార్యదర్శి, సాధారణ పరిపాలన శాఖ ముఖ్య కార్యదర్శి, పంచాయతీరాజ్‌, పురపాలక, ఆర్థిక శాఖల ముఖ్య కార్యదర్శులు, వైద్య ఆరోగ్య శాఖ ప్రత్యేక ప్రధాన కార్యదర్శి, గ్రామ, వార్డు సచివాలయాల వాలంటీర్ల శాఖ ముఖ్య కార్యదర్శి, కేంద్ర ఎన్నికల సంఘం, చీఫ్‌ ఎలక్టోరల్‌ ఆఫీసర్‌, వైఎస్సార్‌సీపీ అధ్యక్షుడు జగన్‌, వ్యక్తిగత హోదాలో సీఎం జగన్‌, రెవెన్యూ మంత్రి ధర్మాన ప్రసాదరావులను ప్రతివాదులుగా పేర్కొన్నారు. వాలంటీర్లను ఎన్నికల విధులకు దూరంగా ఉంచాలని ఎన్నికల సంఘం ఇప్పటికే ఆదేశించింది.. అయితే వాలంటీర్లు మాత్రం వైఎస్సార్‌సీపీ అభ్యర్థుల తరఫున ప్రచారంలో పాల్గొంటున్నారనే ఆరోపణలు వచ్చాయి. అలాగే వాలంటీర్లు ఎన్నికల్లో పోలింగ్ ఏజెంట్లగా కూర్చోవాలంటూ మంత్రి ధర్మాన ప్రసాదరావు చేసిన వ్యాఖ్యలు కూడా దుమారం రేపాయి.. ఎన్నికల సంఘానికి టీడీపీ ఫిర్యాదు చేసింది.