రామేశ్వరం కేఫ్ పేలుడు నిందితుడి కోసం గాలింపు.. ఏఐ ద్వారా వ్యక్తిని గుర్తించే పనిలో పోలీసులు

కర్ణాటక రాజధాని బెంగళూరులో సంభవించిన బాంబ్ పేలుడుతో దేశవ్యాప్తంగా ఒక్కసారిగా తీవ్ర ప్రకంపనలు రేగాయి. బెంగళూరులో అత్యంత రద్దీగా ఉండే రామేశ్వరం కేఫ్‌లో శుక్రవారం మధ్యాహ్నం 12.30 గంటలకు సంభవించిన పేలుడులో దాదాపు 10 మంది తీవ్రంగా గాయపడ్డారు. ఈ ఘటనకు సంబంధించి సీసీటీవీ ఫుటేజీ వెలికి తీయగా.. అందులో ఓ వ్యక్తి బ్యాగుతో కేఫ్‌ లోపలికి వచ్చి.. ఫుడ్ ఆర్డర్ చేసి దాన్ని తినకుండానే బ్యాగ్‌ను అక్కడే వదిలేసి బయటికి వెళ్లినట్లు గుర్తించారు. బ్యాగుతో వచ్చిన వ్యక్తి ఆ బ్యాగు తీసుకోకుండానే వెళ్లడం, ఆర్డర్ చేసి ఫుడ్ కూడా తినకపోవడంతో అనుమానం వచ్చి అతడి కదలికలను గుర్తించగా.. అతనే నిందితుడు అని తేల్చారు. ఆ బ్యాగులో నుంచే బాంబు పేలినట్లు ధ్రువీకరించారు.

ఇక ఆ సీసీటీవీ ఫుటేజీ ఆధారంగా నిందితుడి వయసు 28 నుంచి 30 మధ్య ఉంటుందని అనుమానిస్తున్నారు. ఆ వ్యక్తి దక్షిణ కన్నడ జిల్లాకు చెందినవాడని గుర్తించారు. ఇక ఆ వ్యక్తి ముఖాన్ని పూర్తిగా గుర్తించేందుకు ఆర్టిఫిషియల్ ఇంటెలిజెన్స్‌ను బెంగళూరు పోలీసులు ఉపయోగిస్తున్నారు. ఆ నిందితుడు శుక్రవారం రోజున బస్సులో రామేశ్వరం కేఫ్ వద్దకు చేరుకున్నట్లు సీసీటీవీల ఆధారంగా గుర్తించారు. కేఫ్‌లోని క్యాష్ కౌంటర్ వద్ద రవ్వ ఇడ్లీని 11.30 కు తీసుకుని వెళ్లి టేబుల్ వద్ద కూర్చున్నాడని పేర్కొన్నారు. అయితే ఆర్డర్ చేసిన రవ్వ ఇడ్లీని మాత్రం నిందితుడు తినకుండానే తన వద్ద ఉన్న బ్యాగును అక్కడే వదిలేసి వెళ్లిపోయినట్లు వీడియోల్లో కనిపిస్తోంది.

నిందితుడు కేఫ్ నుంచి బయటికి వెళ్లిన తర్వాత సరిగ్గా గంట సేపటి తర్వాత బాంబు పేలుడు సంభవించింది. ఈ పేలుడు కారణంగా 10 మంది గాయపడ్డారు. ఈ క్రమంలోనే బెంగళూరు పోలీసులు, బాంబ్ స్క్వాడ్స్, నేషనల్ ఇన్వెస్టిగేషన్ ఏజెన్సీ-ఎన్ఐఏ, క్లూస్ టీం, ఫోరెన్సిక్ టీం సంఘటనా స్థలానికి చేరుకుని ముమ్మర శోధన చేశారు. ఘటనాస్థలంలో నట్లు, బోల్టులు, కరెంట్ వైర్లు గుర్తించారు. ఇక ఈ పేలుడుకు సంబంధించి బెంగళూరు హెచ్ఏఎల్ పోలీస్ స్టేషన్‌లో ఉపా చట్టం కింద కేసు నమోదు చేశారు. మరోవైపు.. బాంబు పేలుడు ఘటనకు సంబంధించి ఊహాగానాలను ప్రచారం చేయొద్దని మీడియాకు బెంగళూరు పోలీసు కమిషనర్ సూచించారు.

మరోవైపు.. ఈ ఘటనపై స్పందించిన కర్ణాటక సీఎం సిద్ధరామయ్య.. మాస్క్, క్యాప్‌ ధరించిన ఓ వ్యక్తి బస్సులో కేఫ్‌కు వచ్చాడని.. రవ్వ ఇడ్లీ ఆర్డర్ చేసుకొని ఒక దగ్గర కూర్చున్నాడని పేర్కొన్నారు. ఆ తర్వాత తన బ్యాగులో ఉన్న బాంబుకు టైమర్ సెట్‌ చేసి వెళ్లిపోయాడని వెల్లడించారు. సాధ్యమైనంత త్వరగా నిందితుడిని అదుపులోకి తీసుకుంటామని తెలిపారు. ఇక ఈ పేలుడు కోసం ప్రెజర్ కుక్కర్ బాంబును ఉపయోగించినట్లు సిద్ధరామయ్య స్పష్టం చేశారు.