సీసీటీవీలో రామేశ్వరం కేఫ్ పేలుడు నిందితుడు.. బ్యాగును వదిలేసి వెళ్లిన యువకుడు.. ఉపా కేసు నమోదు

కర్ణాటక రాజధాని బెంగళూరులో నిత్యం రద్దీగా ఉండే ఫేమస్ రామేశ్వరం కేఫ్‌లో శుక్రవారం మధ్యాహ్నం ఒంటి గంట సమయంలో పేలుడు చోటు చేసుకోవడం పెను సంచలనంగా మారింది. మొదట కేఫ్‌లోని సిలిండర్ పేలిందని అంతా భావించినా ఆ తర్వాత ఓ బ్యాగు నుంచి పేలుడు సంభవించిందని ధ్రువీకరించారు. ఈ నేపథ్యంలోనే బెంగళూరు పోలీసులతోపాటు దర్యాప్తు సంస్థలు కూడా రంగంలోకి దిగి ముమ్మర శోధన సాగిస్తున్నాయి. ఘటనా స్థలంలో లభించిన ఆధారాలను బట్టి ఇది ఖచ్చితంగా బాంబు పేలుడేనని స్పష్టం చేశారు. ఈ క్రమంలోనే రామేశ్వరం కేఫ్ సీసీటీవీ ఫుటేజీ పరిశీలించగా.. సంచలన విషయాలు వెలుగులోకి వచ్చాయి. బ్యాగు తీసుకుని రామేశ్వరం కేఫ్‌లోకి ప్రవేశించిన ఓ యువకుడు.. దాన్ని అక్కడే వదిలేసి వెళ్లాడని గుర్తించారు. ఆ తర్వాత పేలుడు జరిగినట్లు తేల్చారు.

సీసీటీవీ ఫుటేజీ పరిశీలించిన పోలీసులు.. 28 నుంచి 30 ఏళ్లు ఉన్న ఓ యువకుడు బ్యాగు పట్టుకుని రామేశ్వరం కేఫ్‌లోకి ఎంటర్ అయినట్లు గుర్తించారు. ఈ విషయాన్న కర్ణాటక డిప్యూటీ సీఎం డీకే శివ కుమార్ వెల్లడించారు. ఉదయం 11 గంటలకు ఆ బ్యాగును కేఫ్‌లోని సింక్ దగ్గర పెట్టిన నిందితుడు క్యాష్ కౌంటర్ దగ్గరికి వెళ్లి రవ్వ ఇడ్లీ ఆర్డర్ చేశాడని పేర్కొన్నారు. అయితే టిఫిన్ తినకుండానే బ్యాగు అక్కడే పెట్టి కేఫ్ నుంచి బయటికి వెళ్లిపోయినట్లు గుర్తించారు. ఈ నేపథ్యంలోనే ఆ క్యాషియర్‌ను ప్రశ్నిస్తున్నట్లు పోలీసులు తెలిపారు. ఇక ఆ నిందితుడు కేఫ్ నుంచి వెళ్లిపోయిన తర్వాత 12.30 గంటలకు పేలుడు సంభవించిందని సీఎం సిద్ధరామయ్య వెల్లడించారు. అయితే ఆ బ్యాగులో టైమ్ బాంబును పెట్టి దాన్ని సరిగ్గా గంటసేపటి తర్వాత పేలేలా టైమ్ సెట్ చేశాడని అనుమానిస్తున్నారు.

ఇక సీసీటీవీలో గుర్తించిన ఆ నిందితుడి గురించి పోలీసులు ముమ్మర గాలింపు చేపడుతున్నారు. ఆ నిందితుడి ఊహాచిత్రాన్ని అన్ని పోలీస్ స్టేషన్లకు పంపించి సెర్చ్ చేయాలని ఆదేశాలు జారీ చేశారు. ఎట్టి పరిస్థితుల్లో నిందితుడిని పట్టుకుని కఠిన శిక్ష విధిస్తామని సీఎం సిద్ధరామయ్య స్పష్టం చేశారు. ఈ రామేశ్వరం కేఫ్ బాంబు పేలుడు ఘటనపై బెంగళూరులోని హెచ్ఏఎల్ పోలీస్‌ స్టేషన్‌లో అన్‌లాఫుల్ యాక్టివిటీస్ ప్రివెన్షన్ యాక్ట్-ఉపా చట్టం కింద కేసు నమోదైంది.

సంఘటనా స్థలానికి నేషనల్ ఇన్వెస్టిగేషన్ ఏజెన్సీ-ఎన్ఐఏ, బాంబ్ స్క్వాడ్, ఫోరెన్సిక్ ఎక్స్‌పర్ట్స్ చేరుకుని ఆధారాలు సేకరిస్తున్నారు. ఇంప్రొవైజ్డ్ ఎక్స్‌ప్లోజివ్ డివైజ్-ఐఈడీ ఉపయోగించి బాంబు పేలుడు చేసినట్లు అనుమానం వ్యక్తం చేస్తున్నారు. గాయపడిన 9 మందిని కేఫ్ సిబ్బంది ఫారూక్(19).. అమెజాన్ కంపెనీ ఉద్యోగి దీపాన్షు (23), స్వర్ణాంబ (49), మోహన్ (41), మోమి(30), నాగ శ్రీ (35), బలరామ్ క్రిష్ణన్ (31), నవ్య (25), శ్రీనివాసన్ (67) గా గుర్తించారు.