ఉక్రెయిన్‌తో యుద్ధం.. రష్యా సైన్యంలో చేరిన హైదరాబాద్ యువకుడు మృతి

ఉక్రెయిన్‌పై రష్యా సాగిస్తోన్న దండయాత్రలో హైదరాబాద్ యువకుడు ప్రాణాలు కోల్పోయాడు. ఉద్యోగం కోసం రష్యా వెళ్లి, ఏజెంట్ చేతిలో మోసపోయిన 30 ఏళ్ల మహ్మద్ అఫ్సాన్.. బలవంతంగా మాస్కో సైన్యంలో చేరాల్సి వచ్చింది. గత ఏడాది డిసెంబర్‌లో హెల్పర్ ఉద్యోగం ఉందంటూ మాస్కోకు తీసుకెళ్లిన ఏజెంట్.. చివరకు చేతులెత్తేశాడు. దీంతో రష్యన్ సైన్యంలో చేరి, ఉక్రెయిన్ సరిహద్దుల్లో విధులు నిర్వర్తిస్తున్నాడు. ఈ క్రమంలో ఉక్రెయిన్ దళాల దాడిలో అఫ్సాన్ చనిపోయినట్టు కుటుంబసభ్యులకు సమాచారం అందింది. దీనిపై హైదరాబాద్ ఎంపీ అసదుద్దీన్ ఒవైసీ స్పందించారు. బలవంతంగా రష్యా ఆర్మీలో చేరుతోన్న భారతీయ యువకులను రక్షించాలని కేంద్రానికి ఒవైసీ విజ్ఞప్తి చేశారు.

అనంతరం మాస్కోలోని భారత రాయబార కార్యాలయం అతని మరణ వార్తను ధృవీకరించింది. అసదుద్దీన్ ఒవైసీ రాయబార కార్యాలయాన్ని సంప్రదించిన సమయంలో అఫ్సాన్ సోదరుడు ఇమ్రాన్ కూడా ఆయన వెంటే ఉన్నారు. మరోవైపు, అఫ్సాన్ కుటుంబం రష్యాలో ఉద్యోగం కోసం పంపిన ఏజెంట్‌ను సంప్రదించడానికి ప్రయత్నిస్తోంది, కానీ అతడు నుంచి సరైన సమాధానం రావడం లేదు. అఫ్సాన్‌లాగే మోసపోయిన రష్యన్ ఆర్మీలో చేరిన మరో హైదరాబాదీ 23 ఏళ్ల మొహమ్మద్ సుఫియాన్ సోదరుడు సయ్యద్ సల్మాన్ మాట్లాడుతూ.. అఫ్సాన్ ఉక్రెయిన్ సరిహద్దు వెంబడి చాలా దూరంలో ఉన్నాడని, ఏదైనా ధృవీకరించడం కష్టమని ఏజెంట్ చెప్పాడని అన్నారు.

‘హెల్పర్ ఉద్యోగం ఇప్పిస్తానంటూ అతడిని రష్యాకు తీసుకెళ్లిన ఏజెంట్‌ను సంప్రదించేందుకు కుటుంబసభ్యులు ప్రయత్నించినా ధ్రువీకరించలేదు. ఉక్రెయిన్ సరిహద్దు వెంబడి సైనిక పోస్ట్ చాలా దూరంలో ఉంది.. వారు దేనినీ ధ్రువీకరించలేరు’ అని సయ్యద్ సల్మాన్ చెప్పారు. పాతబస్తీ బజార్ ఘాట్‌లో నివాసముంటున్న మహ్మద్ అఫ్సాన్.. సరిహద్దులో తుపాకీ కాల్పులకు గురయ్యాడు.

ఉద్యోగాల పేరుతో మోసపోయిన భారతీయ యువకులు రష్యన్ సైన్యంలో బలవంతంగా చేరాల్సి వస్తోందని గతంలో ఒవైసీ ఆందోళన వ్యక్తం చేశారు. ప్రభుత్వం జోక్యం చేసుకుని వారిని రక్షించాలని కోరారు. తన సోదరుడిని వెతుక్కుంటూ మాస్కోకు వెళ్లి తిరిగి ఇంటికి తీసుకురావాలని భావిస్తున్నట్లు అఫ్సాన్ సోదరుడు ఇమ్రాన్ ఇటీవల ప్రకటించారు. కామర్స్ గ్రాడ్యుయేట్ అయిన అఫ్సాన్.. రష్యా వెళ్లడానికి ముందు ఓ మెన్స్ షోరూంలో పనిచేశాడు.