ప్లీజ్ అర్ధం చేసుకోండి.. టీడీపీ నేతలకు చంద్రబాబు ఫోన్ కాల్

టీడీపీ అధినేత చంద్రబాబు పార్టీలో సీనియర్లు, ముఖ్య నేతలతో మాట్లాడారు. ఒకవైపు పొత్తుపై చర్చిస్తూనే మరోవైపు ఏపీలో రాజకీయ పరిణామాలు, పరిస్థితులపై చంద్రబాబు ఎప్పటికప్పుడు ఆరా తీస్తున్నారు. వచ్చే ఎన్నికల్లో పొత్తులపై బీజేపీ అగ్రనేతలతో చర్చల నిమిత్తం ఢిల్లీలో ఉన్న ఆయన.. 18 నియోజకవర్గాలకు చెందిన టీడీపీ నేతలతో ఫోన్‌లో మాట్లాడారు. పొత్తులో భాగంగా ఇప్పటికే జనసేనకు కేటాయించిన, కేటాయించబోతున్న నియోజకవర్గాల్లోని పార్టీ ఇంఛార్జ్‌లు, టీడీపీ ఇప్పటికే ప్రకటించిన కొన్ని స్థానాల అభ్యర్థులతోనూ, అక్కడి ముఖ్య నాయకులతోనూ మాట్లాడారు.

విస్తృత ప్రయోజనాల్ని దృష్టిలో ఉంచుకుని పార్టీ నిర్ణయాల్ని నాయకులు అర్థం చేసుకుని ముందుకెళ్లాలన్నారు. జనసేన కేడర్‌తో విస్తృత సమన్వయంతో పనిచేయాలని సూచించారు. పార్టీ నాయకుల మధ్య చిన్న చిన్న సమస్యలున్నా పక్కనపెట్టి వచ్చే ఎన్నికల్లో గెలుపే లక్ష్యంగా పనిచేయాలని దిశానిర్దేశం చేశారు. ఆయా నియోజకవర్గాల్లో ఎవరికి టికెట్‌ ఇచ్చినా గెలిపించేందుకు కృషి చేయాలని సూచించారు.

టికెట్‌ దక్కని నేతలకు పార్టీ అండగా ఉంటుందని, భవిష్యత్తులో న్యాయం చేస్తుందని చంద్రబాబు హామీ ఇచ్చారు. పార్టీ అధినేత స్వయంగా ఫోన్‌ చేసి మాట్లాడటంతో.. గెలుపు కోసం పనిచేస్తామని నాయకులంతా చెప్పినట్టు తెలుస్తోంది. ప్రకాశం జిల్లా యర్రగొండపాలెం అభ్యర్థిగా ఎరిక్షన్‌బాబును టీడీపీ ఇప్పటికే ప్రకటించింది. ఆయనతో పాటు ఆ నియోజకవర్గానికి చెందిన మన్నె రవీంద్రతో మాట్లాడిన చంద్రబాబు.. ఇద్దరూ కలసి పనిచేయాలని సూచించారు. పార్వతీపురం అభ్యర్థి బోనెల విజయచంద్రతో పాటు మాజీ ఎమ్మెల్సీ జగదీశ్‌తో మాట్లాడారు.

ఇక నంద్యాల నియోజకవర్గంలో భూమా బ్రహ్మానంద రెడ్డి, సీనియర్ నేత ఫరూక్‌లతో చంద్రబాబు మాట్లాడారు. ఫరూక్‌కు సహకరించాలని బ్రహ్మానంద రెడ్డికి టీడీపీ అధిపతి సూచన చేశారు. కళ్యాణ దుర్గంలో సీటు దక్కించుకున్న సురేంద్ర బాబుకు పూర్తి సహకారం అందించాలని ఉమా మహేశ్వర నాయుడు, హనుమంత రాయ చౌదరీలను చంద్రబాబు కోరారు. కురుపాం నేత దత్తి లక్ష్మణరావుతో మాట్లాడిన చంద్రబాబు... పార్టీ అభ్యర్థి తోయక జగదీశ్వరి విజయమే లక్ష్యంగా పనిచేయాలన్నారు. చిత్తూరు జిల్లాకు చెందిన మాజీ ఎమ్మెల్యేలు సీకే బాబు, ఏఎస్‌ మనోహర్‌, ఉంగుటూరు, పిఠాపురం, పోలవరం ఇంఛార్జ్‌లు గన్ని వీరాంజనేయులు, వర్మ, బొరగం శ్రీనివాస్‌లతో పాటు, నరసాపురం, కాకినాడ రూరల్, తాడేపల్లిగూడెం నియోజకవర్గాలకు చెందిన పొత్తూరి రామరాజు, పిల్లి సత్యనారాయణమూర్తి, వలవల బాబ్జీలతోనూ చంద్రబాబు మాట్లాడారు.

అలాగే గండి బాబ్జీ (విశాఖ దక్షిణ), రెడ్డి సుబ్రహ్మణ్యం (రామచంద్రపురం), నిమ్మక జయకృష్ణ (పాలకొండ), ప్రభాకర్‌ చౌదరి (అనంతపురం), సుగుణమ్మ (తిరుపతి), పప్పల చలపతిరావు, ప్రగడ నాగేశ్వరరావు (యలమంచిలి)లు కూడా పార్టీ అధినేత మాట్లాడినవారిలో ఉన్నారు. నేతలందరూ అందర్నీ కలుపుకుని కూటమి విజయం కోసం పనిచేయాలని చంద్రబాబు సూచించారు.