ఏపీలోని ఈ జిల్లాల ప్రజలకు అలర్ట్.. హైవేపై ట్రాఫిక్ ఆంక్షలు, ఇబ్బంది పడొద్దు

ఏపీ ప్రజలకు ముఖ్యగమనిక ఈ నెల 10 (ఆదివారం)న బాపట్ల జిల్లా కొరిశపాడు మండలంలో జరగనున్న వైఎస్సార్‌సీపీ సిద్ధం సభకు ఆంధ్రప్రదేశ్ ముఖ్యమంత్రి వైఎస్ జగన్ హాజరవుతున్నారు. అలాగే భారీ సంఖ్యలో ప్రజలు సభకు విచ్చేసే అవకాశం ఉండటంతో ట్రాఫిక్ మళ్లిస్తున్నట్లు పోలీసులు తెలిపారు. ప్రయాణికులకు, వాహనదారులకు ఇబ్బందులు తలెత్తకుండా వాహనాలను దారి మళ్లిస్తున్నట్లు బాపట్ల జిల్లా ఎస్పీ వకుల్ జిందాల్ తెలిపారు. ఈ మార్పుల్ని గమనించి సహకరించాలని కోరారు.

నెల్లూరు వైపు నుంచి ఒంగోలు మీదుగా హైదరాబాదు వైపు వెళ్లే భారీ వాహనాలను ఒంగోలు సౌత్ బైపాస్ నుంచి సంఘమిత్ర హాస్పిటల్, కర్నూల్ రోడ్డు, చీమకుర్తి, పొదిలి దొనకొండ అడ్డరోడ్డు మీదుగా హైదరాబాద్‌కు దారి మళ్లించారు. హైదరాబాద్ వైపు నుంచి ఒంగోలు వైపునకు వచ్చు భారీ వాహనాలను సంతమాగులూరు అడ్డరోడ్డు, వినుకొండ, మార్కాపురం, పొదిలి, చీమకుర్తి మీదుగా దారి మళ్లించినట్లు తెలిపారు. నెల్లూరు వైపు నుంచి ఒంగోలు మీదుగా హైదరాబాదు వైపు వెళ్లే సాధారణ వాహనాలను మేదరమెట్ల వద్ద నుంచి నామ్ హైవేపై అద్దంకి, సంతమాగులూరు మీదుగా వెళ్లాలని సూచించారు.

ఒంగోలు వైపు నుంచి విశాఖపట్నం వైపు NH16పై వెళ్లే వాహనాలను త్రోవగుంట నుంచి NH 216పైకి దారి మళ్లించి త్రోవగుంట, చీరాల, బాపట్ల, మచిలీపట్నం మీదుగా దారి మళ్లించారు. ఒంగోలు వైపు నుంచి విజయవాడ, గుంటూరు వైపు NH16పై వెళ్లే వాహనాలను త్రోవగుంట, చీరాల, బాపట్ల, పొన్నూరు మీదుగా దారి మళ్లించారు. ఒంగోలు వైపు నుంచి చిలకలూరిపేట వైపు వెళ్లే వాహనాలను త్రోవగుంట, చీరాల, పర్చూరు మీదుగా దారి మళ్లించినట్లు తెలిపారు. విశాఖపట్నం నుంచి ఒంగోలు, చెన్నై వైపు వెళ్లే వాహనాలను నర్సాపురం, మచిలీపట్నం, బాపట్ల, చీరాల, త్రోవగుంట మీదుగా దారి మళ్లించినట్లు తెలియజేశారు. గుంటూరు నుంచి ఒంగోలు, చెన్నై వైపు వెళ్ళు వాహనాలను బుడంపాడు అడ్డరోడ్డు నుంచి పొన్నూరు, బాపట్ల, చీరాల, త్రోవగుంట మీదుగా దారి మళ్లించారు. చిలకలూరిపేట వైపు నుంచి ఒంగోలు, నెల్లూరు వైపు వెళ్లే వాహనాలను పర్చూరు, చీరాల, త్రోవగుంట మీదుగా దారి మళ్లించినట్లు తెలిపారు.

16వ నంబర్ జాతీయ రహదారిపై మేదరమెట్ల గ్రోత్ సెంటర్ నుంచి బొల్లాపల్లి టోల్ ప్లాజా వరకు ఎటువంటి వాహనాలను అనుమతించబడవని.. కేవలం సిద్ధం సభ ప్రాంగణానికి వచ్చు వాహనాలను మాత్రమే అనుమతిస్తారన్నారు. అద్దంకి నుంచి నాగులపాడు, వెంకటాపురం మీదుగా జాతీయ రహదారి పైకి ఎటువంటి వాహనాలను అనుమతించరు.. ఈ ఆంక్షలు మార్చి 10న ఆదివారం ఉదయం 10 గంటల నుంచి అమలులోకి వస్తాయని బాపట్ల జిల్లా పోలీసులు తెలిపారు.