సిద్ధం సభల కోసం రూ.600 కోట్లు!.. షర్మిల సంచలన ఆరోపణలు

శాసనసభ ఎన్నికల నేపథ్యంలో సిద్ధం పేరిట అధికార వైఎస్ఆర్ కాంగ్రెస్ పేరిట నిర్వహిస్తున్న సభల మీద ఏపీ కాంగ్రెస్ చీఫ్ వైఎస్ షర్మిల సంచలన ఆరోపణలు చేశారు. సిద్ధం సభల కోసం ప్రభుత్వ ధనాన్ని ఖర్చు చేస్తున్నారని ఆరోపించారు. ఒక్కో సిద్ధం సభకు రూ.90 కోట్ల వరకూ ఖర్చు చేస్తున్నారన్న వైఎస్ షర్మిల.. సిద్ధం సభల కోసం వైసీపీ ఏకంగా రూ.600 కోట్లు ఖర్చు పెట్టిందని విమర్శించారు. విజయవాడలోని కాంగ్రెస్ కార్యాలయంలో మాట్లాడిన షర్మిల అధికార వైసీపీ, విపక్ష టీడీపీలపై తీవ్రస్థాయిలో మండిపడ్డారు. సిద్ధం సభల కోసం రూ.600 కోట్లు ఖర్చు చేస్తున్నారని ఇదంతా ఎవరి డబ్బని ప్రశ్నించారు.

ఇదే సమయంలో వైసీపీ ప్రభుత్వంపై షర్మిల విమర్శలు కొనసాగించారు. గత ఎన్నికల సమయంలో జగన్ ఇచ్చిన మాట మరిచారన్న షర్మిల..2.30లక్షల ఉద్యోగాలు భర్తీ చేస్తామంటూ ఇచ్చిన హామీ ఏమైందని ప్రశ్నించారు. మెగా డీఎస్సీ అని మోసం చేశారని, కావాల్సిన వాళ్లకే వాలంటీర్ ఉద్యోగాలు ఇచ్చారని ఆరోపించారు. ఉద్యోగాలపై తాము ప్రశ్నిస్తే హౌస్ అరెస్ట్‌లు చేశారని మండిపడ్డారు. టీడీపీ, బీజేపీ పొత్తుపైనా షర్మిల విమర్శలు గుప్పించారు. టీడీపీది, బీజేపీదీ అనైతికమైన పొత్తుగా పేర్కొన్నారు.

"బీజేపీ రాష్ట్రానికి ఏం చేసింది అని పొత్తులు పెట్టుకుంటున్నారు ? చంద్రబాబు ఒక ఊసరవెల్లి. అవసరానికి రంగులు మారుస్తున్నారు. బీజేపీ మీద గౌరవం అంటున్నారు.. ఏంటి గౌరవం ? రాష్టానికి హోదా ఇవ్వలేదు అని బీజేపీ మీద గౌరవమా ? పోలవరం ప్రాజెక్ట్‌కు నిధులు ఇవ్వనందుకు గౌరవమా ? విభజన హామీలు నేరవెర్చనందుకు గౌరవమా ? చంద్రబాబు ,పవన్ ఆలోచన చేయాలి. మోసం చేసిన బీజేపీతో పొత్తులు ఎందుకో సమాధానం చెప్పాలి." అని షర్మిల ప్రశ్నించారు.

మరోవైపు పదేళ్లపాటు కేంద్రంలో అధికారంలో ఉన్న బీజేపీ.. యువత కోసం ఏం చేసిందని షర్మిల ప్రశ్నించారు. బీజేపీ వచ్చాక దేశంలో నిరుద్యోగం పెరిగిందని విమర్శించారు. హామీ ప్రకారం 20 కోట్ల ఉద్యోగాలు రావాలనీ, కానీ దేశంలోని ప్రతీ రాష్ట్రాన్ని బీజేపీ మోసం చేసిందని షర్మిల అన్నారు. ఇక తాను ఎన్నికల్లో ఎక్కడ నుంచి పోటీ చేయాలనే దానిపై చర్చ జరిగిందన్న షర్మిల.. అన్ని అంశాలను పరిశీలిస్తున్నట్లు చెప్పుకొచ్చారు.