సమాధులను తవ్వి.. ఎముకలు నోట్లో పెట్టుకుని.. కుప్పంలో వింత ఆచారం

భారతదేశం వివిధ జాతులు, మతాల సమ్మేళనం. మనదేశంలో ప్రతి వంద కిలోమీటర్లకూ సంస్కృతీ, సంప్రదాయాలు మారతాయని పెద్దలు చెప్పే మాట. అలాగే ఆచారాలు, కట్టుబాట్లు కూడా ఒక్కో ప్రాంతంలో ఒక్కోలా ఉంటాయి. ఒక ప్రాంత ప్రజలు అనుసరించే ఆచారాలు, మరో ప్రాంత ప్రజానీకానికి వింతగా, భిన్నంగా అనిపించవచ్చు. అలాంటి ఓ ఆచారమే చిత్తూరు జిల్లా కుప్పంలో తరాలుగా కొనసాగుతూ వస్తోంది. ప్రతి ఏటా మహాశివరాత్రి పర్వదినం తర్వాత వచ్చే అమావాస్య రోజు శ్మశాన కోళ్లు పేరిట ఆ ప్రాంత ప్రజలు ఘనంగా జాతర జరుపుతారు. ఈ జాతరను చూసేందుకు సరిహద్దు రాష్ట్రాలైన తమిళనాడు, కర్ణాటక నుంచి భారీ సంఖ్యలో భక్తులు తరలివస్తుంటారు.

శ్మశానకోళ్లు జాతరలో భాగంగా శ్మశానవాటికలోని మట్టితోనే అంకాళ పరమేశ్వరి దేవి శిలా ప్రతిమను తయారు చేస్తారు. అనంతరం భిన్న వేషధారణతో పూజలు చేస్తారు. ఆ తర్వాత పూనకం వచ్చిన యువకులు, మహిళలు ఈ ప్రతిమ చుట్టూ తిరుగుతూ పూజలు నిర్వహిస్తారు. జాతరలో మరో విశేషం ఏమిటంటే శ్మశానంలో ఉన్న సమాధులను తవ్వి, ఎముకలను నోట్లో పెట్టుకొని నమలడం. ఈ తంతు పూర్తైన తర్వాత జాతరకు వచ్చినవారు పూజారుల చేతిలో కొరడాలతో కొట్టించుకుంటారు. అయితే జాతరలో భాగంగా ఇలా కొరడాతో కొట్టించుకుంటే మంచి జరుగుతుందని స్థానికుల నమ్మకం. ఈ కొరడా దెబ్బలు తినేందుకు చుట్టుపక్కల ప్రాంతాల జనం పెద్దసంఖ్యలో తరలివస్తారు.

ఎవరికైనా భూత పిశాచి, గాలి, దయ్యాలు పట్టి ఉంటే.. ఇలా కొరడా దెబ్బలు తింటే పూర్తిగా వదిలిపెడతాయని స్థానికుల విశ్వాసం. ఇక పూజ ముగిసిన తర్వాత భక్తులు శ్మశానంలో ఏర్పాటుచేసిన శిలాదేవుని మట్టిను ఇళ్లకు తీసుకెళ్లారు. ఈ మట్టిని తమ ఇంటిలో పెట్టుకుంటే దయ్యాలు, భూత, పిశాచులు రావని ఇక్కడ వారి నమ్మకం. మొత్తంగా మహాశివరాత్రి తర్వాత వచ్చే ఈ జాతరను ఈ ఏడు కూడా కుప్పం వాసులు ఘనంగా జరుపుకున్నారు.