ఎన్నికల బాండ్లు దేశంలోనే అతిపెద్ద కుంభకోణం.. బీజేపీ బ్యాంక్ అకౌంట్లు ఫ్రీజ్ చేయాలి: కాంగ్రెస్

సార్వత్రిక ఎన్నికల ముందు దేశంలో ఎన్నికల బాండ్ల అంశం పెను సంచలనంగా మారింది. స్టేట్ బ్యాంక్ ఆఫ్ ఇండియా-ఎస్‌బీఐ ఇచ్చిన వివరాలను కేంద్ర ఎన్నికల సంఘం బయటపెట్టడంతో దేశంలో పెను దుమారం రేగుతోంది. అత్యధికంగా అధికార బీజేపీకి ఎన్నికల బాండ్ల ద్వారా విరాళాలు రావడంతో తీవ్ర వివాదానికి దారి తీసింది. ఈ నేపథ్యంలోనే బీజేపీపై కాంగ్రెస్ పార్టీ తీవ్ర విమర్శలు గుప్పిస్తోంది. సుప్రీంకోర్టు ఆదేశాలతో కేంద్ర ఎన్నికల సంఘం బయటపెట్టిన ఎలక్టోరల్‌ బాండ్ల వివరాలు.. బీజేపీ అనుసరిస్తున్న అవినీతి వ్యూహాలను బహిర్గతం చేస్తున్నాయని కాంగ్రెస్‌ పార్టీ మండిపడింది. స్వాతంత్ర్యం వచ్చిన తర్వాత దేశంలో సంభవించిన అతిపెద్ద కుంభకోణం అని కాంగ్రెస్‌ పార్టీ ఆరోపించింది. ఈ వ్యవహారంపై ప్రత్యేక దర్యాప్తు బృందంతో విచారణ జరిపించాలని డిమాండ్ చేసింది. అప్పటివరకు బీజేపీకి చెందిన బ్యాంకు ఖాతాలను నిలిపివేయాలని కోరింది.

ఈ వ్యవహారంపై కాంగ్రెస్ పార్టీ జాతీయ అధ్యక్షుడు మల్లిఖార్జున ఖర్గే తీవ్ర విమర్శలు చేశారు. అవినీతికి చేయం, చేయనియ్యం అంటూ ప్రధాని నరేంద్ర మోదీ చెబుతారు కానీ.. ఎన్నికల బాండ్ల పేరుతో బీజేపీ నిధులను ఎలా సేకరిస్తోంది అనే విషయం సుప్రీంకోర్టు బయటపెట్టిందని పేర్కొన్నారు. ఎన్నికల బాండ్ల ద్వారా బీజేపీ 50 శాతం విరాళాలు పొందిందని.. పెద్ద పెద్ద బిజినెస్‌మెన్‌లు ఆ పార్టీకి భారీగా నిధులు ఎలా సమకూర్చారని ప్రశ్నించారు. ఇక విరాళాలు ఇచ్చిన వారిలో ఎక్కువగా ఈడీ, ఐటీ అధికారుల దాడులను ఎదుర్కొన్నవారే మల్లిఖార్జున ఖర్గే పేర్కొన్నారు. కాంగ్రెస్‌ పార్టీకి కేవలం 11 శాతం విరాళాలు మాత్రమే వచ్చినట్లు ఎస్‌బీఐ ఇచ్చిన సమాచారంతో వెల్లడైందని చెప్పారు.

ఇక కాంగ్రెస్‌ పార్టీ బ్యాంక్ ఖాతాలను నిలిపివేయడాన్ని ప్రస్తావించిన మల్లిఖార్జున ఖర్గే.. తాము ఎలా ఎన్నికలకు వెళ్లాలని ప్రశ్నించారు. ఎన్నికల బాండ్ల పేరుతో బీజేపీ కోట్ల రూపాయాలు సేకరించిందని విమర్శించారు. బీజేపీకి రూ.6 వేల కోట్లు విరాళాలు రావడంపై తీవ్ర అనుమానాలు వ్యక్తం అవుతున్నాయని మల్లిఖార్జున ఖర్గే అనుమానం వ్యక్తం చేశారు. ఈ విరాళాలపై ఉన్నతస్థాయి దర్యాప్తు జరిపించాలని.. అప్పటివరకు బీజేపీ బ్యాంకు ఖాతాలు ఫ్రీజ్ చేయాలని డిమాండ్ చేశారు.

స్వతంత్ర భారత దేశంలోనే ఇది అతిపెద్ద కుంభకోణమని కాంగ్రెస్‌ పార్టీ జనరల్‌ సెక్రటరీ జైరాం రమేశ్‌ తెలిపారు. సుప్రీంకోర్టుకు వెళ్లే అవకాశం తమకు ఉందని.. తాము ప్రజా కోర్టుకు వెళ్తామని స్పష్టం చేశారు. ఈవీఎంలకు కాంగ్రెస్‌ వ్యతిరేకం కాదని తెలిపిన జైరాం రమేశ్.. వీవీప్యాట్‌ల స్లిప్పుల అంశంపై తమ విజ్ఞప్తిని తెలియజేసేందుకు ఏడాదిగా ప్రధాన ఎన్నికల కమిషనర్‌ అపాయింట్‌మెంట్‌ కోరుతున్నా కేంద్ర ప్రభుత్వం నుంచి ఎలాంటి స్పందన లేదని ఆరోపించారు. ప్రతిపక్ష పార్టీలను కలవడానికి ఎన్నికల సంఘం ఎందుకు భయపడుతోందని జైరాం రమేశ్ ప్రశ్నించారు.

ఎన్నికల బాండ్ల ముసుగులో చోటుచేసుకున్న అవినీతి కార్యకలాపాలపై కోర్టు నియమించిన అధికారులతో విచారణ జరిపించాలని రాజ్యసభ సభ్యుడు కపిల్‌ సిబల్‌ తెలిపారు. ఎన్నికల బాండ్లు చట్టవిరుద్ధమైందని.. క్విడ్ ప్రో కో కోసమే చేసినట్లు అర్థం అవుతోందని కపిల్‌ సిబల్‌ ఆరోపించారు. బాండ్ల ఐడీ నంబర్లను వెల్లడించాలని.. అలా చేస్తే.. ఏ రాజకీయ పార్టీకి ఎవరు ఎంత విరాళం ఇచ్చారనే విషయంపై విచారణ జరపాలని డిమాండ్ చేశారు. అవినీతి నిరోధక చట్టం కింద దీనిపై దర్యాప్తు జరపాల్సి ఉందని.. కానీ ఈ సమయంలో ఈడీ తీసుకునే చర్యలపై అనుమానం వ్యక్తం చేశారు. ఎన్నికల బాండ్ల మోసాలకు సంబంధించిన అంశాలపై ప్రత్యేక బృందంతో దర్యాప్తు జరిపించాలని కపిల్‌ సిబల్‌ డిమాండ్‌ చేశారు.