సగం ముద్రించిన కరెన్సీ నోట్లు.. మరోవైపు ఖాళీ.. వీడియో వైరల్

తీవ్ర ఆర్ధిక సంక్షోభంతో కొట్టుమిట్టాడుతోన్న దాయాది పాకిస్థాన్‌లో కరెన్సీ నోట్ల ముద్రణా లోపం వెలుగులోకి వచ్చింది. ఒకవైపు మాత్రమే ముద్రించిన రూ. 1000, రూ.500 (పాకిస్థాన్‌ రూపాయి) నోట్లు చెలామణిలోకి రాగా.. వీటికి సంబంధించిన వీడియోలు ప్రస్తుతం సోషల్ మీడియాలో వైరల్‌గా మారాయి. సగం ముద్రించిన నోట్లను చూసి ఆ దేశ ప్రజలు షాకయ్యారు. దీనిపై ఫిర్యాదు పౌరులు చేయడంతో పాకిస్థాన్‌ సెంట్రల్‌ బ్యాంకు స్పందించింది. ఈ ఘటనపై విచారణకు ఆదేశించిన సెంట్రల్ బ్యాంకు.. , వాటిని స్థానిక బ్యాంకులో మార్చుకోవాలని ప్రజలకు సూచించింది.

కొద్దిరోజుల కిందట పాకిస్థాన్‌లో సగం ముద్రించిన నోట్లు అంటూ స్థానిక మీడియాలో వీడియోలు ప్రసారమయ్యాయి. వాటిలో బ్యాంకు నుంచి డ్రా చేసిన కొత్త నోట్లలో కొన్నింటిపై ముందు నగదు విలువ తెలియజేసేలా ఉండగా.. వెనుకవైపు తెల్లగా ఉండటంతో జనాలు బిత్తరపోయారు. వాటిని తిరిగి బ్యాంకు అధికారులకు అందజేశారు. బ్యాంకు మేనేజర్ మరికొన్ని సగం ముద్రించిన నోట్లను చూపించాడు. ‘ఇప్పటికే ఎన్ని బండిల్స్ ఖాతాదారులకు ఇచ్చామో నాకు తెలియదు. ఇవి ఒక కస్టమర్ తిరిగి ఇచ్చాం.. ఆ తర్వాతే మేము ఈ విషయాన్ని తెలుసుకున్నాం.. ప్రతి బండిల్‌లో సగం ముద్రించిన నోట్లు కనీసం రెండు ఉన్నాయి ’ అని టేబుల్‌పై ఉన్న కరెన్సీ నోట్లను ఆయన చూపించిన వీడియో వైరల్ అయ్యింది.

దీనిపై స్పందించిన పాక్‌ సెంట్రల్‌ బ్యాంక్‌ ప్రకటన చేసింది. ‘‘నేషనల్‌ బ్యాంక్‌ ఆఫ్‌ పాకిస్థాన్‌కు పంపిన కొన్ని నోట్ల కట్టల్లో సగం ముద్రించిన నోట్లు వచ్చాయి.. ఒకవేళ బ్యాంకు నుంచి వాటిని ఎవరైనా తీసుకుంటే స్థానిక బ్రాంచ్‌లో మార్చుకోవాలి’ అని కోరింది. ఈ సంఘటనతో సెంట్రల్‌ బ్యాంక్‌ పనితీరుపై పాక్ ప్రజలు తీవ్ర విమర్శలు గుప్పిస్తున్నారు. బ్యాంకులు, ఏటీఎంల నుంచి నగదు డ్రా చేసేటప్పుడు చాలా అప్రమత్తంగా ఉండాలని, ప్రతి నోట్‌ను పరిశీలించాలని ఎక్స్‌లో ఓ యూజర్ కామెంట్ పెట్టాడు. ఇది పాకిస్థాన్ సెక్యూరిటీ ప్రింటింగ్ ప్రెస్ బాధ్యాతారాహిత్యమని మరో నెటిజన్ ధ్వజమెత్తాడు.

గత రెండేళ్లుగా పాక్‌ ఆర్థిక వ్యవస్థ తీవ్ర సంక్షోభాన్ని ఎదుర్కొంటోంది. ఈ సంక్షోభం నుంచి గట్టేక్కేందుకు అంతర్జాతీయ సంస్థల వద్ద రుణాల కోసం తీవ్ర ప్రయత్నాలు చేస్తోంది. తాజాగా, ఘటనపై నేషనల్ బ్యాంక్ ఆఫ్ పాకిస్థాన్ అధికార ప్రతినిధిని మీడియా సంప్రదించగా ఆయన స్పందించడానికి నిరాకరించారు.