పవన్ కళ్యాణ్ కంటే ముందే రంగంలోకి టీడీపీ మాజీ ఎమ్మెల్యే.. చంద్రబాబుకిచ్చిన మాట కోసం

టీడీపీ మాజీ ఎమ్మెల్యే రూటు మార్చారు.. అధినేతకు ఇచ్చిన మాట కోసం రంగంలోకి దిగారు. పవన్ కళ్యాణ్ నియోజకవర్గంలో అడుగు పెట్టకముందే ప్రచారంలోకి దిగి అందరికి ట్విస్ట్ ఇచ్చారు. ఇంతకీ ఎవరా మాజీ ఎమ్మెల్యే.. ఏదీ ఆ నియోజకవర్గం అని ఆలోచిస్తున్నారా. జనసేనాని స్వయంగా బరిలోకి దిగబోతున్న పిఠాపురం కాగా.. ఆ మాజీ ఎమ్మెల్యే వర్మ. రెండు రోజుల క్రితం వరకు భగ్గుమన్న వర్మ వర్గం మొత్తానికి శాంతించింది. అధినేత చంద్రబాబు ఎమ్మెల్సీ భరోసా ఇవ్వడంతో వర్మ తన వర్గానికి సర్థిచెప్పారు. పవన్ కళ్యాణ్ కంటే ముందే నియోజకవర్గంలో ప్రచారం మొదలు పెట్టారు.

 పవన్ కళ్యాణ్‌ పోటీచేస్తే ఓడిస్తామన్ని నేతలకు వర్మ హితభోద చేశారు. జనసేనానిని పిఠాపురంలో భారీ మెజార్టీతో గెలిపించాలని ప్రచారం మొదలు పెట్టారు. టీడీపీ కార్యాలయంలో పిఠాపురం జనసేన ముఖ్య నాయకులు, కార్యకర్తలు వర్మను కలిసి అభినందించారు. ఆ వెంటనే తన టీడీపీ కార్యాలయంలో నియోజవర్గ కార్యకర్తలతో సమావేశం నిర్వహించారు వర్మ. అధినేత చంద్రబాబు ఆదేశాలను తాను శిరసావహిస్తానని.. పవన్ కళ్యాణ్‌ను అందరం కలిసి గెలిపించుకోవాలని తన కేడర్‌కు పిలుపునిచ్చారు. తన పదవుల కోసం కాదు.. నియోజకవర్గ ప్రజలు, రైతంగ సమస్యల పరిష్కారం తనకు ముఖ్యమన్నారు.

వర్మ ఇండిపెండెంట్‌గా పోటీచేస్తే బావుంటుందని వైఎస్సార్‌సీపీ నేతలు సంబరపడ్డారన్న వర్మ.. పవన్ కళ్యాణ్‌ను పిఠాపురంలో గెలిపించి తమ సత్తా చూపిస్తామన్నారు. టీడీపీ నేతలు, కార్యకర్తల్ని గౌరవిస్తే.. తాము కూడా సహకరించి భారీ మెజార్టీ అందించే దిశగా పనిచేస్తామన్నారు. తాను ఉదయం 6 గంటల నుంచే ప్రచారం ప్రారంభిస్తానంటున్నారు. చంద్రబాబు చెప్పిన మాట తనకు ముఖ్యమని.. పవన్ గెలుపే లక్ష్యంగా తాను పనిచేస్తానన్నారు. దీంతో పిఠాపురం రాజకీయాలు ఆసక్తికరంగా మారాయి.

రాష్ట్రాన్ని రాక్షస పాలన నుంచి రక్షించుకునేందుకు పొత్తు ధర్మంలో భాగంగా పిఠాపురం పోటీ నుంచి తప్పుకుంటున్నట్లు వర్మ సోషల్ మీడియా ద్వారా తెలిపారు. తాను ఎంతగానో అభిమానించే చంద్రబాబు మాట మేరకు ఈ నిర్ణయం తీసుకున్నానని.. తన అభిమానులు, కార్యకర్తలంతా పవన్ కళ్యాణ్ గెలుపునకు సహకరించాలని విజ్ఞప్తి చేశారు. పవన్ కళ్యాణ్ ప్రతీ ఒక్కరం కృషి చేద్దామని.. ప్రజా పాలనను తీసుకురావడంలో మనవంతు పాత్ర పోషిద్ధామన్నారు.

మరోవైపు జనసేన అధినేత పవన్ కళ్యాణ్ వచ్చేవారం పిఠాపురం వెళ్లాలని భావిస్తున్నారట. నియోజకవర్గంలోనేతలు, ముఖ్య కార్యకర్తలతో భేటీకాబోతున్నట్లు చెబుతున్నారు. ఆ తర్వాత పర్యటనలో భాగంగా టీడీపీ, బీజేపీ, జనసేన పార్టీల నేతలు, కార్యకర్తలతో కలిసి ఉమ్మడి సమావేశం నిర్వహించనున్నారు. త్వరలోనే పవన్ కళ్యాణ్ పర్యటనపై అధికారికంగా ప్రకటన వచ్చే అవకాశం ఉందుంటున్నారు. జనసేనాని పార్టీ అభ్యర్థుల ఎంపికపై కసరత్తు చేస్తున్నారు. అది పూర్తికాగానే పిఠాపురం వెళతారని చెబుతున్నారు.