పవన్ కళ్యాణ్ ‘ఉస్తాద్ భగత్ సింగ్‌’ టీజర్‌పై ఏపీ సీఈవో స్పందన

జనసేన అధినేత, పవర్ స్టార్ పవన్ కళ్యాణ్ హీరోగా నటించిన ఉస్తాద్ భగత్ సింగ్ సినిమాకు ఇబ్బందులు తప్పవా? ఎన్నికల వేళ ఉస్తాద్ భగత్ సింగ్ టీజర్లో చూపించిన సీన్లు, పవన్ మాట్లాడిన పదాలతో.. సమస్యలు ఎదురుకానున్నాయా? ఇప్పుడు ఇలాంటి డౌటనుమానాలే తలెత్తతున్నాయి. బుధవారం విలేకర్ల సమావేశంలో ఏపీ ఎన్నికల ప్రధానాధికారి చేసిన వ్యాఖ్యలు ఈ అంశమై డౌట్లు రేకెత్తిస్తున్నాయి.

ఉస్తాద్ భగత్ సింగ్ మూవీ నుంచి భగత్స్ బ్లేజ్ పేరుతో చిత్ర యూనిట్ బుధవారం ఓ టీజర్ విడుదల చేసింది. అయితే టీజర్‌లో గాజు గ్లాస్ చూపించడంతో పాటు పవన్ కళ్యాణ్ వ్యాఖ్యలు ఉన్నాయి. ఇది నీ రేంజ్ అంటూ ఓ వ్యక్తి టీ గ్లాస్ కిందపడేస్తాడు. అయితే గ్లాసు ముక్కను చేతిలోకి తీసుకున్న పవన్ కళ్యాణ్..గాజు పగిలేకొద్ది పదునెక్కుద్ది… ఖచ్చితంగా గుర్తుపెట్టుకో.. గ్లాస్ అంటే సైజు కాదు.. సైన్యం.. కనిపించని సైన్యం అంటూ పవర్ ఫుల్ డైలాగులు చెప్తారు. అయితే ఏపీలో ఇప్పుడు ఎన్నికలు జరుగుతుండటం.. అందులోనూ జనసేన పార్టీ గుర్తు అయిన గాజు గ్లాసును ఉపయోగించడంతో దీనిపై ఈసీ ఎలా స్పందిస్తుందనే ఆసక్తి అందరిలోనూ కలిగింది.

ఈ నేపథ్యంలోనే ఉస్తాద్ భగత్ సింగ్ టీజర్ మీద ఎన్నికల సంఘం స్పందించింది. ఏపీ ఎన్నికల ప్రధానాధికారి ముకేష్ కుమార్ మీనా బుధవారం విలేకర్లతో సమావేశం ఏర్పాటు చేశారు. ఈ సందర్భంగా ఓ విలేకరి ఉస్తాద్ భగత్ సింగ్ టీజర్ గురించి, అందులోని అంశాల గురించి ప్రస్తావించారు. టీజర్‌లో అలా వాడొచ్చా అంటూ సీఈవోను ప్రశ్నించారు . దీనికి స్పందించిన సీఈవో ముకేష్ కుమార్ మీనా.. తామింకా ఆ టీజర్ చూడలేదన్నారు. చూస్తే అందులో ఏమైనా అనుమతి తీసుకోవాల్సిన అంశాలు ఉంటే తప్పకుండా నోటీసులు ఇస్తామని స్పష్టం చేశారు.

" నేనింకా అది చూడలేదు. అందుకే ఏమీ మాట్లాడలేను. అయితే గ్లాస్ చూపించి పబ్లిషిటీ చేస్తే పొలిటికల్ యాడ్‌ కిందకు వస్తుంది . రాజకీయ ప్రకటన ఇవ్వడం తప్పేమీ కాదు. కానీ.. పొలిటికల్ యాడ్ చేయాలంటే పర్మిషన్ తప్పనిసరి. ముందస్తు అనుమతి తీసుకోవాల్సి ఉంటుంది. ఒకవేళ అది పొలిటికల్ యాడ్ అయితే వారికి నోటీసులు ఇస్తాం. ఆ తర్వాత రీసర్టిఫికేషన్ కోసం వాళ్లు దరఖాస్తు చేసుకోవాల్సి ఉంటుంది" అని ఏపీ సీఈవో అన్నారు.

"అయితే ఇప్పటిదాకా దానిపై మాకెలాంటి ఫిర్యాదులు అందలేదు. ఎవరైనా కంప్లైంట్ చేసినా, చేయకపోయినా మేమైతే దానిని పరిశీలిస్తాం. పొలిటికల్ విషయాలు ఉంటే నోటీస్ ఇస్తాం. ఎందుకంటే ఫ్యాన్, సైకిల్, టీ గ్లాస్ అన్నీ మామూలుగా వాడేవే. అయితే రాజకీయ కోణంలో వాడితేనే స్పందించాల్సి ఉంటుంది" అని సీఈవో ముకేష్ కుమార్ మీనా చెప్పారు.