జనసేనానికి జ్వరం.. ఎన్నికల ప్రచారానికి ఇబ్బందులు

జనసేన అధినేత పవన్ కళ్యాణ్ ఎన్నికల ప్రచారానికి ఇబ్బందులు తలెత్తుతున్నాయి. తాను బరిలో ఉన్న కాకినాడ జిల్లా పిఠాపురం నుంచి ఎన్నికల ప్రచారం ప్రారంభించారు పవన్. పిఠాపురంలో మూడురోజుల పాటు పర్యటించిన తర్వాత ఉత్తరాంధ్ర జిల్లాల పర్యటనకు వెళ్లాలని భావించారు. అయితే పవన్ కళ్యాణ్ ప్రచారానికి మరోసారి ఇబ్బంది తలెత్తింది. పవన్ కళ్యాణ్ తీవ్రమైన జ్వరంతో బాధపడుతున్న నేపథ్యంలో.. తెనాలిలో బుధవారం జరగాల్సిన ర్యాలీ, సభను రద్దు చేస్తున్నట్లు జనసేన ప్రకటించింది. జ్వరం తీవ్రత ఎక్కువగా ఉన్నందున విశ్రాంతి అవసరమని వైద్యులు సూచించినట్లు జనసేన అధికారిక ఎక్స్ ఖాతాలో పోస్ట్ చేసింది.

" జనసేన పార్టీ అధ్యక్షులు పవన్ కళ్యాణ్ గారు తీవ్ర జ్వరంతో బాధపడుతున్నారు. జ్వరం తీవ్రత ఎక్కువగా ఉన్నందున విశ్రాంతి అవసరమని వైద్యులు సూచించారు. దీంతో ఈ రోజు తెనాలిలో చేపట్టాల్సిన వారాహి విజయ భేరి కార్యక్రమంతో పాటు ఉత్తరాంధ్ర పర్యటన వాయిదా వేశారు. కనీసం రెండు, మూడు రోజుల విశ్రాంతి అవసరం అని వైద్యులు తెలిపారు. ఈ నేపథ్యంలో రీ షెడ్యూల్ చేసి పర్యటన పునః ప్రారంభిస్తారు. రీ షెడ్యూల్ చేసిన కార్యక్రమాన్ని త్వరలో ప్రకటిస్తారు" అంటూ జనసేన ట్వీట్ చేసింది.

మరోవైపు పిఠాపురం నియోజకవర్గంలోని యు. కొత్తపల్లి, పిఠాపురం రూరల్ మండలాల్లో పవన్ కళ్యాణ్ మంగళవారం పర్యటించారు.

సుమారు 20 కిలోమీటర్ల దూరం పాదయాత్ర చేసిన పవన్ కళ్యాణ్.. మహిళలు, రైతులు, యువతను పలకరిస్తూ ఎన్నికల ప్రచారం నిర్వహించారు. ఎండలోనే ఎన్నికల ప్రచారం నిర్వహించడంతో జనసేనాని అస్వస్థతకు గురైనట్లు జనసేన వర్గాలు చెప్తున్నాయి. అప్పటికే జ్వరంతో బాధపడుతున్న పవన్.. ఎండలో తిరగటంతో మరింత అస్వస్థతకు లోనైనట్లు పేర్కొంటున్నాయి. జ్వరం తీవ్రత పెరగటంతో తెనాలి పర్యటన, ఉత్తరాంధ్ర టూర్ రద్దైనట్లు చెబుతున్నాయి.

మరోవైపు పవన్ కళ్యాణ్ తిరిగి హైదరాబాద్ రానున్నట్లు తెలిసింది. వైద్యులు కొన్నిరోజులు విశ్రాంతి అవసరమని సూచించిన నేపథ్యంలో తిరిగి హైదరాబాద్ వస్తున్నట్లు సమాచారం. కోలుకున్న తర్వాత పవన్ కళ్యాణ్ మళ్లీ ఎప్పుడు ప్రచారం నిర్వహించేదీ జనసేన తెలియజేయనుంది.