ఢిల్లీ సీఎం కేజ్రీవాల్‌కు హైకోర్టులో భారీ ఊరట.. ఆప్ నేతల ఉత్కంఠకు తెర

ఢిల్లీ ముఖ్యమంత్రి పదవి నుంచి అరవింద్ కేజ్రీవాల్‌ను తొలగించాలని దాఖలైన పిటిషన్లను విచారణ జరిపేందుకు ఢిల్లీ హైకోర్టు నిరాకరించింది. దీంతో ఢిల్లీ ప్రభుత్వానికి, ఆప్ నేతలకు.. మరీ ముఖ్యంగా కేజ్రీవాల్‌కు భారీ ఉపశమనం లభించింది. అరెస్ట్ అయి జైలుకు వెళ్లినా.. జైలు నుంచే ఢిల్లీ పరిపాలనను కేజ్రీవాలే చూస్తారని ఇప్పటికే ఆమ్ ఆద్మీ పార్టీ నేతలు ముక్త కంఠంతో చెబుతుండగా.. అలా కుదరదు అనే వాదనలు వినిపించాయి. ఈ క్రమంలోనే కొందరు వ్యక్తులు ఏకంగా ఢిల్లీ హైకోర్టులోనే పిటిషన్ దాఖలు చేశారు. ఆ పిటిషన్లను విచారణ చేసేందుకు అంగీకరించని ఢిల్లీ హైకోర్టు.. అలాంటి విషయాల్లో జోక్యం చేసుకోలేమని పేర్కొంది. దీంతో ఢిల్లీ సీఎంగా కేజ్రీవాల్ కొనసాగుతారా లేదా అనే ప్రశ్నకు తాజాగా సమాధానం దొరికింది. ఢిల్లీ హైకోర్టు నిర్ణయంతో ఆప్ కార్యకర్తల్లోని ఉత్కంఠకు తెరపడింది.

ఢిల్లీ మద్యం కేసులో విచారణ జరుపుతున్న ఈడీ అధికారులు.. మార్చి 21 వ తేదీన ఢిల్లీ సీఎం కేజ్రీవాల్‌ను అరెస్ట్‌ చేసింది. అనంతరం ఢిల్లీ రౌస్ అవెన్యూ కోర్టులో ప్రవేశపెట్టగా.. ఈడీ కస్టడీకి ఇచ్చింది. అవినీతి ఆరోపణలతో ముఖ్యమంత్రి అరెస్ట్ అయి జైలుకు వెళ్లడంతో దేశ రాజధాని ఢిల్లీలో ప్రభుత్వ పాలన కొరవడిందని హిందూ సేన జాతీయ అధ్యక్షుడు, సామాజిక కార్యకర్త విష్ణు గుప్తా.. ఢిల్లీ హైకోర్టులో ప్రజా ప్రయోజన వ్యాజ్యాన్ని దాఖలు చేశారు. ఈ పిల్‌పై విచారణ జరిపేందుకు ఢిల్లీ హైకోర్టు తిరస్కరించింది. జస్టిస్‌ మన్మోహన్‌, జస్టిస్‌ మన్మీత్‌ ప్రీతమ్‌ సింగ్‌ అరోరాలతో కూడిన ఢిల్లీ హైకోర్టు డివిజన్‌ బెంచ్‌ గురువారం ఆ పిల్‌ను కొట్టేసింది.

 అరెస్ట్ అయిన తర్వాత కూడా సీఎం పదవిలో కొనసాగాలా వద్దా అనే అంశం పూర్తిగా కేజ్రీవాల్‌ వ్యక్తిగత నిర్ణయంపై ఆధారపడి ఉంటుందని కోర్టు స్పష్టం చేసింది. ఇక ఈ అంశంపై రాష్ట్రపతి లేదా గవర్నర్‌లను సంప్రదించాలని హైకోర్టు పిటిషనర్‌కు సూచించింది. కొన్నిసార్లు వ్యక్తిగత ప్రయోజనం జాతీయ ప్రయోజనాలకు లోబడి ఉండాలని.. కానీ అది కేజ్రీవాల్ వ్యక్తిగత నిర్ణయమని కోర్టు తెలిపింది. ఇది న్యాయస్థానం అని.. కోర్టులు ఎప్పుడైనా రాష్ట్రపతి పాలన గానీ.. గవర్నర్‌ పాలన గానీ విధించిన సందర్భాలు ఉన్నాయా అని పిటిషనర్‌ను ప్రశ్నించింది. దీనిపై ఢిల్లీ లెఫ్టినెంట్‌ గవర్నర్‌ లేదా రాష్ట్రపతి నిర్ణయం తీసుకోవాల్సి ఉంటుందని పిటిషనర్‌కు చెప్పింది.

ఢిల్లీ సీఎం అరెస్ట్ కావడంతో రాష్ట్రంలో ప్రభుత్వం పనిచేయడం లేదని తాము ఎలా చెప్పగలం అంటూ ఢిల్లీ హైకోర్టు ప్రశ్నించింది. అది నిర్ణయించడానికి లెఫ్ట్‌నెంట్‌ గవర్నర్‌కు పూర్తి సామర్థ్యం ఉందని.. అలాంటి లెఫ్టినెంట్ గవర్నర్‌కు తాము మార్గదర్శకాలు సూచించాల్సిన అవసరం లేదని వెల్లడించింది. చట్టం ప్రకారం ఏం చేయాలో ఢిల్లీ లెఫ్టినెంట్ గవర్నర్ చేస్తారని పేర్కొంది. కోర్టు పిటిషన్‌ను కొట్టి వేయడంతో.. పిటిషనర్ విష్ణు గుప్తా.. తన పిల్‌ను ఉపసంహరించుకుంటున్నట్లు కోర్టుకు తెలిపారు. ఈ వ్యవహారాన్ని ఢిల్లీ లెఫ్టినెంట్ గవర్నర్ ముందు ప్రస్తావించనున్నట్లు వెల్లడించారు. ఇక ఇప్పటికే అరవింద్‌ కేజ్రీవాల్‌ను సీఎం పదవి నుంచి తొలగించాలంటూ మార్చి 28 వ తేదీన సుర్జిత్ సింగ్ యాదవ్ అనే వ్యక్తి దాఖలు చేసిన పిల్‌ను ఢిల్లీ హైకోర్టు కొట్టివేసింది.