తనిఖీల్లో భారీగా పట్టుబడుతున్న నగదు.. ఇప్పటి వరకూ ఎంతంటే.. వామ్మో

 ఎన్నికల వేళ ఏపీలో అధికారులు తనిఖీలు ముమ్మురం చేశారు. స్థానిక పోలీసులతో పాటుగా ఎన్నికల సంఘం స్పెషల్ స్క్వాడ్‍‌లు సైతం రంగంలోకి దిగి తనిఖీలు జరుపుతున్నాయి. ఎన్నికల కోడ్ అమల్లో ఉన్న నేపథ్యంలో నిబంధనలకు వ్యతిరేకంగా తరలిస్తున్న నగదు, మద్యం, అభరణాలను పోలీసులు స్వాధీనం చేసుకుంటున్నారు. ఈ క్రమంలోనే ఇప్పటివరకూ ఎంత మొత్తం స్వాధీనం చేసుకున్నారనే వివరాలను ఏపీ సీఈవో ముకేష్ కుమార్ మీనా బుధవారం వెల్లడించారు.

ఏపీలో ఎన్నికలకు సంబంధించి షెడ్యూల్ విడుదల అయిన నాటి నుంచి ఇప్పటి వరకూ సుమారుగా రూ.34 కోట్లు విలువ చేసే నగదు, ఆభరణాలు ఇతర వస్తువులు సీజ్‌ చేసినట్లు ముకేష్ కుమార్ మీనా వెల్లడించారు. ఎన్నికల షెడ్యూల్ వెల్లడైన వెంటనే కోడ్ అమల్లోకి వచ్చింది. కోడ్ అమల్లోకి వచ్చిన తర్వాత చేపట్టిన తనిఖీల్లో 11 కోట్ల రూపాయల నగదు, ఏడు కోట్ల విలువైన మద్యం, పది కోట్ల విలువ చేసే ఆభరణాలను సీజ్ చేసినట్లు ఎన్నికల ప్రధానాధికారి మీనా తెలిపారు. మొత్తంగా ఇప్పటి వరకూ 3300 ‌ఎఫ్ఐఆర్‌లు నమోదు చేసినట్లు తెలిపారు. అలాగే సీ- విజిల్ యాప్ ద్వారా 5500 కంప్లైంట్స్ వచ్చినట్లు ముకేష్ కుమార్ మీనా తెలిపారు.

మతపరమైన ప్రచారాలు, నగదు పంపిణీ, హోర్డింగులు, ఫ్లెక్సీలు, మద్యం పంపిణీ ఇలా అనేక అంశాలపై ఫిర్యాదులు అందినట్లు చెప్పారు. ఫిర్యాదుల పరిష్కారంలోనూ ఎన్నికల సంఘం వేగంగా స్పందిస్తున్నట్లు ఏపీసీఈవో ముకేష్ కుమార్ మీనా తెలిపారు. ఇప్పటి వరకూ 3 వేల 40 ఫిర్యాదులను పరిష్కారించామని చెప్పారు. ఇక ఎన్నికల నియమావళిని ఉల్లంఘిస్తున్నారని మీ దృష్టికి వస్తే.. సీ విజిల్ యాప్ ద్వారా ఫిర్యాదు చేయవచ్చని సూచించారు. ఫిర్యాదు అందిన వెంటనే ఎన్నికల సంఘం అధికారులు సత్వర పరిష్కారానికి చర్యలు తీసుకుంటారని చెప్పారు.