బోరుబావిలో పడిన 2 ఏళ్ల బాలుడు.. 20 గంటల ఆపరేషన్ తర్వాత సురక్షితంగా వెలికితీత

బోరుబావుల్లో చిన్నారులు పడిన ఘటనలు మనం ఎన్నో చూస్తూ ఉంటాం. అందులో పడి ఎంతో మంది చనిపోవడం.. రోజుల తరబడి రెస్క్యూ బృందాలు తవ్వుతూ చివరికి బాధితులను రక్షించిన సంఘటనలు ఉన్నాయి. ఇలాంటి ఘటనలు ఎన్ని జరిగినా.. అధికారులు ఎన్ని హెచ్చరికలు జారీ చేసినా.. నిరుపయోగంగా ఉన్న బోర్లను కొందరు రైతులు పూడ్చి వేయడం లేదు. ఫలితంగా అందులో రైతులు, చిన్న పిల్లలు పడుతున్న ఘటనలు తీవ్ర ఆందోళన కలిగిస్తున్నాయి. తాజాగా కర్ణాటకలో ఇలాంటిదే మరొక ఘటన చోటు చేసుకుంది. పొలంలో ఉన్న బోరు బావిలో రెండేళ్ల చిన్నారి పడిపోయాడు. అతడి ఏడుపు, ఆర్తనాదాలు విన్న స్థానికులు అధికారులకు సమాచారం అందించారు. దీంతో రంగంలోకి దిగిన రెస్క్యూ టీమ్స్ గంటల తరబడి కష్టపడి.. ఎట్టకేలకు ఆ బాలుడిని సురక్షితంగా బయటికి తీశారు. దీంతో అంతా ఊపిరి పీల్చుకున్నారు.

కర్ణాటకలోని విజయపుర జిల్లాలో జరిగిన ఈ సంఘటన స్థానికులను తీవ్ర భయాందోళనలకు గురి చేసింది. లచయానా గ్రామానికి చెందిన సతీశ్‌ ముజగొండ అనే వ్యక్తి తన ఇంటికి సమీపంలో ఉన్న 4 ఎకరాల పొలంలో బోరు వేశాడు. అయితే అందులో నుంచి నీరు రాకపోవడంతో దాన్ని ఉపయోగించడం మానేశారు. ఈ క్రమంలోనే సతీశ్ ముజగొండ కుమారుడు సాత్విక్.. బుధవారం సాయంత్రం పొలం వద్ద ఆడుకుంటూ బోరుబావి వద్దకు వెళ్లాడు. అక్కడి నుంచి ప్రమాదవశాత్తు ఆ బోరు బావిలో పడిపోయాడు. బోరుబావిలో పడిన తర్వాత అందులో ఉన్న చీకటికి ఆ రెండేళ్ల సాత్విక్ అరుపులు, కేకలు పెట్టాడు.

దీంతో అవి విన్న స్థానికులు.. బోరుబావిలో చిన్నారి పడిపోయాడని గుర్తించి.. సాత్విక్ తల్లిదండ్రులు, అధికారులు, రెస్క్యూ సిబ్బందికి సమాచారం అందించారు. ఈ క్రమంలోనే అధికారులు వెంటనే సంఘటనాస్థలానికి చేరుకుని సహాయక చర్యలు ప్రారంభించారు. బుధవారం సాయంత్రం 6.30 గంటలకు సహాయక చర్యలు మొదలుపెట్టారు. ఆ బోరుబావిలో సుమారు 16 అడుగుల లోతులో సాత్విక్ పడిపోయినట్లు అధికారులు గుర్తించారు. అనంతరం కెమెరాలను ఆ బోరుబావిలోకి పంపించి బాలుడు ఎలా ఉన్నాడో తెలుసుకున్నారు. ఇక బాలుడిని కాపాడేందుకు జేసీబీతో ఆ బోరుబావికి పక్కనే సమాంతరంగా 21 అడుగుల లోతు ఒక భారీ గొయ్యిని తవ్వారు.

 ఇక 20 గంటల సుదీర్ఘ రెస్క్యూ ఆపరేషన్ తర్వాత ఎట్టకేలకు సాత్విక్‌ను సురక్షితంగా బయటకు తీసుకువచ్చారు. ఆ తర్వాత ఆ బాలుడికి ప్రథమ చికిత్స అందించి.. దగ్గర్లో ఉన్న ఆస్పత్రికి తరలించారు. అక్కడ సాత్విక్‌కు చికిత్స అందిస్తున్నారు. బోరుబావిలో పడిన ఆ బాలుడు చేసిన ఆర్తనాదాలు, దానికి సంబంధించిన వీడియో ప్రస్తుతం సోషల్ మీడియాలో వైరల్‌గా మారింది. ఇక బోరుబావిలో పడిన చిన్నారికి పైపుల ద్వారా ఆక్సిజన్‌నుఅందించారు. ఇక సాత్విక్‌ సురక్షితంగా బయటికి రావాలని లచయానా గ్రామంలోని సిద్దలింగ మహారాజు ఆలయంలో తల్లిదండ్రులు, గ్రామస్థులు ప్రత్యేక పూజలు కూడా చేశారు.