గుంతకల్లు రైల్వే స్టేషన్‌లో అందుబాటులోకి రైల్ కోచ్ రెస్టారెంట్

సుదూర ప్రాంతాలకు వెళ్లాలనుకునే మధ్యతరగతి ప్రజలకు ఫస్ట్ ఛాయిస్ రైలు. అందుకే రైలును మిడిల్ క్లాస్ నేల విమానం అని సినీ రచయితలు కూడా పాటల్లో చెప్తూ ఉంటారు. మనదేశంలో ఎక్కువమంది వినియోగించే ప్రజా రవాణా వ్యవస్థ ఇదే. అయితే రైలు ప్రయాణం చేసేవారికి ప్రధానంగా ఎదురయ్య సమస్య ఆహారం. ఐఆర్‌సీటీసీ ద్వారా క్యాటరింగ్ సౌకర్యం ఉన్నప్పటికీ.. నచ్చిన ఫుడ్.. స్థానికంగా దొరికే టేస్టీ ఫుడ్ రుచి చూడాలని అందరూ అనుకుంటూ ఉంటారు. ఎక్కడైనా కొత్త ప్రదేశానికి వెళ్తే ఆ ప్రాంతంలోని ఫేమస్ ఫుడ్‌ను రుచి చూడాలని కోరుకుంటూ ఉంటారు. అలాంటి వారికి కోసం తీసుకువచ్చిందే రైలు కోచ్ రెస్టారెంట్.

 భారతీయ రైల్వే ఇప్పటికే పలు స్టేషన్లలో ఈ రైలు కోచ్ రెస్టారెంట్లను ఏర్పాటు చేసింది. వాడకంలో లేని రైలు బోగీలను ఆధునీకరించి.. వాటి సాయంతో ఈ రైల్ కోచ్ రెస్టారెంట్లను ఏర్పాటు చేస్తూ ఉంటారు. ప్రముఖ రైల్వే స్టేషన్‌లలో వీటిని ఏర్పాటు చేసి.. ఆ ప్రాంతంలో దొరికే ఫేమస్ ఫుడ్.. రైలు ప్రయాణికులకు అందుబాటులోకి తెస్తున్నారు. అలాంటి రైలు కోచ్ రెస్టారెంట్‌ ఇప్పుడు గుంతకల్లు రైల్వే స్టేషన్‌లో అందుబాటులోకి వచ్చింది.

గుంతకల్లు రైల్వే జంక్షన్ ప్రాంగణంలో ఏర్పాటు చేసిన రైల్ కోచ్ రెస్టారెంట్‌ను గుంతకల్లు డీఆర్ఎం వినీత్ సింగ్ ప్రారంభించారు. రైలు ప్రయాణికులకు మెరుగైన సౌకర్యాల కల్పనే తమ ధ్యేయమని ఆయన ఈ సందర్భంగా స్పష్టం చేశారు. రైలు బోగీల ద్వారా రైల్ కోచ్ రెస్టారెంట్ ఏర్పాటు చేసి.. అందంగా తీర్చిదిద్దిన సిబ్బందిని కొనియాడారు. అలాగే రైల్ కోచ్ రెస్టారెంట్ ప్రాంగణంలో చిన్నారుల కోసం బొమ్మలను ఏర్పాటు చేశారు. కిచెన్, ఫర్నీచర్ మొత్తానికి పెయింటింగ్‌లు వేసి అందంగా తీర్చిదిద్దారు. రైల్ కోచ్ రెస్టారెంట్ ద్వారా రైలు ప్రయాణికులతో పాటుగా స్థానికులకు రుచికరమైన, నాణ్యమైన ఆహారాన్ని అందివ్వాలనేదే తమ ఉద్దేశమని డీఆర్ఎం చెప్పారు.

ఇండియన్ రైల్వేస్ ఆదాయాన్ని పెంచేందుకు గానూ ఈ రైల్ కోచ్ రెస్టారెంట్లను ఏర్పాటు చేస్తున్నారు. రైలుబోగీలను ఆధునీకరించి ఇలా రైల్ కోచ్ రెస్టారెంట్ల మాదిరిగా తీర్చిదిద్దుతున్నారు. ఇక గుంతకల్లు రైల్వే స్టేషన్ జంక్షన్.. ఈ మార్గం మీదుగా చాలా రైళ్లు ప్రయాణిస్తుంటాయి. ఈ నేపథ్యంలో ఈ రైల్ కోచ్ రెస్టారెంట్ ప్రయాణికులకు ఉపయోగకరంగా ఉంటుందని రైల్వే అధికారులు చెప్తున్నారు. ప్రయాణికులు సైతం ఈ రైల్ కోచ్ రెస్టారెంట్ ఏర్పాటుపై హర్షం వ్యక్తం చేస్తున్నారు.