మళ్లీ రాజకీయాల్లోకి సంజయ్ దత్.. లోక్‌సభ ఎన్నికల్లో మాజీ సీఎంపై పోటీ?

బాలీవుడ్ అగ్రనటుడు సంజయ్ దత్ మరోసారి రాజకీయ ప్రవేశం చేయనున్నారా. ఈ లోక్‌సభ ఎన్నికల్లో మాజీ సీఎం ప్రత్యర్థిగా బరిలోకి దిగనున్నారు అని సోషల్‌ మీడియాలో వార్తలు తెగ హల్‌చల్ చేస్తున్నాయి. ఇప్పటికే ఈసారి ఎన్నికల్లో బాలీవుడ్ సెలబ్రిటీలతోపాటు క్రికెటర్లు పోటీకి దిగుతున్నారు. అయితే ఎన్నికల నామినేషన్లు కొనసాగుతుండటం, ఎన్నికల తేదీలు కూడా వస్తుండటంతో సంజయ్ దత్ ప్రచారం ఎక్కడివరకు వచ్చిందని ఆయన ఫ్యాన్స్ ఆందోళన చెందుతున్నారు. అయితే ఇలాంటి వార్తలకు చెక్ పెడుతూ సంజయ్ దత్ తాజాగా ట్విటర్ వేదికగా స్పందించారు.

64 ఏళ్ల సంజయ్ దత్.. తాను ఈ ఎన్నికల్లో పోటీ చేయడం లేదని.. ఏ పార్టీలో కూడా చేరడం లేదని పేర్కొన్నారు. ఒకవేళ తాను రాజకీయాల్లోకి వస్తే లేదా రావాలని నిర్ణయించుకున్నా.. స్వయంగా తానే ప్రకటిస్తానని ట్విటర్ వేదికగా స్పష్టం చేశారు. ఎలాంటి వార్తలు వచ్చినా నమ్మకూడదని వెల్లడించారు. రాజకీయాల్లోకి తాను వస్తున్నానని వస్తున్న పుకార్లకు ఫుల్‌స్టాప్ చెప్పాలనుకుంటున్నానని.. అందుకే ఇన్ని రోజులు జరుగుతున్న ప్రచారానికి తెర దించుతూ తానే స్వయంగా ఈ ప్రకటన చేశారు. ఈ క్రమంలనే దయచేసి తన గురించి వస్తున్న ప్రచారాల్ని నమ్మకండి అని పోస్ట్‌ చేశారు.

ఇక హర్యానా నుంచి సంజయ్‌దత్‌ పోటీ చేస్తారనే వార్తలు వెలువడ్డాయి. కాంగ్రెస్ పార్టీలో చేరి ఈ లోక్‌సభ ఎన్నికల్లో బరిలోకి దిగనున్నారని పుకార్లు షికార్లు చేశాయి. ఇటీవల సీఎం పదవికి రాజీనామా చేసిన బీజేపీ సీనియర్ నేత, మాజీ సీఎం మనోహర్ లాల్ ఖట్టర్‌కు ప్రత్యర్థిగా కర్నాల్ లోక్‌సభ నియోజకవర్గం నుంచి బరిలోకి దిగనున్నారనే వార్తలు జోరందుకున్నాయి. అయితే అందుకు ఒక కారణం కూడా ఉంది. సంజయ్‌ దత్‌కు హర్యానాతో ఉన్న అనుబంధమేనని కారణం. సంజయ్‌దత్‌ పూర్వీకుల గ్రామం యమునానగర్ జిల్లాలో ఉంది. అంతేకాకుండా గతంలో ఇండియన్ నేషనల్ లోక్ దళ్ నాయకుడు అభయ్ సింగ్ చౌతాలా ఎన్నికల్లో పోటీ చేయగా... ఆయన తరఫున ప్రచారం చేసేందుకు సంజయ్ దత్ హర్యానాకు వెళ్లారు.

దీంతోపాటు సంజయ్ దత్ తండ్రి, నటుడు, దివంగత సునీల్ దత్ పలుమార్లు కాంగ్రెస్ ఎంపీగా గెలిచారు. అంతేకాకుండా మన్మోహన్ సింగ్ ప్రభుత్వంలో కేంద్రమంత్రిగా పనిచేశారు. ఇక సంజయ్ దత్ సోదరి ప్రియా దత్ కూడా కాంగ్రెస్ ఎంపీగా పనిచేశారు. 2009 ఎన్నికల్లో సంజయ్ దత్.. ఉత్తర్‌ప్రదేశ్‌లోని లక్నో లోక్‌సభ నియోజకవర్గం నుంచి సమాజ్‌వాదీ పార్టీ అభ్యర్థిగా మొదట బరిలో ఉన్నారు. అయితే ఆయుధాల చట్టం కింద సంజయ్ దత్‌కు పడిన జైలు శిక్షను సస్పెండ్ చేసేందుకు కోర్టు నిరాకరించడంతో పోటీ నుంచి తప్పుకున్నాడు. ఆ తర్వాత సమాజ్‌వాదీ పార్టీ ప్రధాన కార్యదర్శిగా నియమితులైనప్పటికీ ఆ పార్టీకి రాజీనామా చేసి సినిమాల్లోకి వెళ్లారు.