గాల్లో ఊడిపోయిన విమానం ఇంజిన్ కవర్.. 10 వేల అడుగుల ఎత్తులో ప్రయాణికుల ఆర్తనాదాలు

ఇటీవలి కాలంలో విమానాల్లో జరిగే సంఘటనలు తీవ్ర ఆందోళన కలిగిస్తున్నాయి. ప్రయాణికులు, ఎయిర్ లైన్స్ సిబ్బంది, ఎయిర్ లైన్స్ సంస్థలు, పైలట్లు చేస్తున్న చిన్న చిన్న పొరపాట్లు, తప్పిదాలు తీవ్ర విమర్శలకు దారి తీస్తున్నాయి. తాజాగా అలాంటిదే ఓ భయంకరమైన సంఘటన చోటు చేసుకుంది. గాల్లో ఎగురుతున్న విమానానికి సంబంధించి ఒక్కసారిగా ఇంజిన్ కవర్ ఊడిపోయింది. పక్కనే ఉన్న రెక్కలకు చిక్కుకుంది. అయితే ఆ విషయాన్ని విమానంలో ఉన్న ప్రయాణికులు గుర్తించి.. సిబ్బందిని అప్రమత్తం చేశారు. దీంతో పైలట్‌కు సమాచారం అందించగా.. ఆ విమానాన్ని ఎమర్జెన్సీ ల్యాండింగ్ చేశారు. దీంతో ఎలాంటి ప్రమాదం జరగకపోవడంతో అందులో ఉన్న ప్రయాణికులు ఊపిరి పీల్చుకున్నారు. ఈ సంఘటన అమెరికాలో చోటు చేసుకుంది.

డెనివర్‌ ఇంటర్నేషనల్‌ ఎయిర్‌పోర్టు నుంచి హ్యూస్టన్‌ ఎయిర్‌పోర్టుకు ది సౌత్‌వెస్ట్‌ ఎయిర్‌లైన్స్‌కు చెందిన బోయింగ్‌ 737-800 విమానం బయలుదేరింది. కొద్దిసేపు ప్రయాణించిన తర్వాత 10300 అడుగుల ఎత్తుకు చేరిన సమయంలో ఒక్కసారిగా ఈ విమానం ఇంజిన్‌పై ఉండే కవర్ ఊడిపోయింది. అది కాస్తా రెక్కలకు ఉన్న ఫ్లాప్స్‌కు తట్టుకుని చిక్కుకుంది. ఈ షాకింగ్ ఘటన జరిగిన సమయంలో ఆ బోయింగ్ విమానంలో 135 మంది ప్రయాణికులు, ఆరుగురు సిబ్బంది సహా మొత్తం 141 మంది ఉన్నారు. అయితే విమానం ఇంజిన్ కవర్ ఊడిపోయినట్లు గుర్తించిన పైలట్లు.. ఆ విమానాన్ని ఎమర్జెన్సీ ల్యాండింగ్‌ చేశారు.

అనంతరం ఆ విమానంలోని ప్రయాణికులను దించి వేరే విమానాన్ని రప్పించి వారిని హ్యూస్టన్‌ ఎయిర్‌పోర్టుకు పంపించారు. విమానం కవర్‌ ఊడిపోయిన తర్వాత గాల్లో తేలియాడుతున్న దృశ్యాలను ఆ విమానంలోని ప్రయాణికులు వీడియోలు తీశారు. ఆ వీడియోను సోషల్‌ మీడియాలో పోస్ట్ చేయడంతో ఆ వీడియో తెగ వైరల్ అవుతోంది. అయితే ఆ విమానాన్ని ఎమర్జెన్సీ ల్యాండింగ్‌ చేయనున్నట్లు అందులోని ప్రయాణికులకు పైలట్లు వివరిస్తున్నట్లు వినిపిస్తోంది.

సాధారణంగా కమర్షియల్ ఫ్లైట్‌లలో ఈ ఇంజిన్ కవర్లు కనిపించవు. ఈ ఇంజిన్ కవర్ల స్థానంలో రేకువంటి కవర్‌తో కప్పి ఉంచుతారు. ఈ ఇంజిన్ కవర్ ఉండటం వల్ల బయట నుంచి వచ్చే చెత్త, ఇతర వస్తువులు ఇంజిన్లలోకి చేరి పాడు కాకుండా కాపాడతాయి. అంతేకాకుండా.. ఈ ఇంజిన్ కవర్లు విమానం అధికంగా డ్రాగ్‌కు, ఓవర్‌ హీట్‌కు గురికాకుండా రక్షిస్తాయి. ఇక సౌత్‌వెస్ట్‌ ఎయిర్‌లైన్స్‌కు చెందిన బోయింగ్ విమానంలో ఈ సమస్య తలెత్తడంతో ఈ ఘటనపై ఫెడరల్‌ ఏవియేషన్‌ అథారిటీ- ఎఫ్‌ఏఏ స్పందించింది. ఆ బోయింగ్ విమానం సురక్షితంగా ఎయిర్‌పోర్టులో దిగిందని.. ఈ ఘటనపై దర్యాప్తు చేపట్టనున్నట్లు వెల్లడించింది.

అయితే వారం రోజుల్లోనే బోయింగ్‌ 737-800 విమానాల్లో సమస్యలు రావడం ఇది రెండోసారి కావడం ప్రయాణికులను తీవ్ర ఆందోళనకు గురి చేస్తోంది. టెక్సాస్‌ నుంచి బయల్దేరిన మరో బోయింగ్ విమానం ఇంజిన్‌లో గత వారం మంటలు చెలరేగాయి. చివరికి అది సేఫ్‌గా ల్యాండ్‌ అయిన తర్వాత ఎయిర్‌పోర్ట్ ఫైర్ సిబ్బంది రంగంలోకి దిగి ఆ మంటలను ఆర్పివేశారు. ఆ ఘటనపైనా ఎఫ్‌ఏఏ దర్యాప్తు కొనసాగుతోంది.