సస్పెండ్ అయినా బుద్ధి మారని మాల్దీవుల మంత్రి.. భారత పతాకాన్ని అవమానిస్తూ పోస్ట్

భారత వ్యతిరేక, చైనా అనుకూల వ్యక్తిగా పేరు ఉన్న మాల్దీవులు అధ్యక్షుడు మహ్మద్ ముయిజ్జూ గతేడాది అధికారంలోకి వచ్చినప్పటి నుంచి అన్నీ భారత వ్యతిరేక విధానాలనే అనుసరిస్తున్నారు. ఒకవైపు మాల్దీవుల్లో పరిస్థితులు దిగజారిపోతున్నా తన పంతం మాత్రం వీడటం లేదు. అయితే దౌత్య పరమైన వివాదం ఉన్నప్పటికీ.. ఈ ఆర్థిక ఏడాదికి సంబంధించి మాల్దీవులకు అవసరమైన వస్తువులను సరఫరా చేసేందుకు భారత్ అంగీకరించింది. దీనికి మాల్దీవులు ధన్యవాదాలు కూడా తెలిపింది. అది జరిగి రెండు రోజులు కూడా కాకముందే ఆ దేశ మాజీ మంత్రి మరియం షియునా మరో వివాదానికి తెరతీశారు. గతంలో లక్షద్వీప్‌లో ప్రధాని నరేంద్ర మోదీపై ఇష్టం వచ్చినట్లు వ్యాఖ్యలు చేసినపుడు తీవ్ర విమర్శలు వెల్లువెత్తడంతో మరియం షియునాను మంత్రి వర్గం నుంచి తొలగించారు. అయినప్పటికీ తాజాగా మరోసారి భారత్‌ పట్ల అగౌరవంగా ప్రవర్తించడం మరింత మండిపాటుకు గురైంది. అసలు ఏం జరిగిందంటే?

సస్పెండ్ అయిన మాల్దీవుల మంత్రి మరియం షియునా భారత జాతీయ జెండాను అగౌరవపరిచే విధంగా సోషల్ మీడియాలో ఒక ఫోటో షేర్ చేయడంతో నెటిజన్ల నుంచి తీవ్ర వ్యతిరేకత వ్యక్తం అయింది. దీంతో మరియం షియునా ఎట్టకేలకు క్షమాపణలు చెప్పారు. వెంటనే ఆ పోస్ట్‌ను కూడా డిలీట్ చేశారు. మాల్దీవుల్లో మరికొన్ని రోజుల్లో పార్లమెంటు ఎన్నికలు జరగనున్నాయి. ఈ ఎన్నికలకు ముందు భారత త్రివర్ణ పతాకంపై అశోక చక్రం స్థానంలో ప్రతిపక్ష పార్టీ ప్రచారానికి సంబంధించిన పోస్టర్‌ను ఉంచి మరియం షియునా సోషల్ మీడియా పోస్ట్ చేశారు. మాల్దీవుల్లో అధికారంలో ఉన్న అధ్యక్షుడు మహ్మద్ ముయిజ్జూ పార్టీ సభ్యురాలైన మరియం షియునా.. ఆ ఫోటోను పోస్ట్ చేసి పార్లమెంటు ఎన్నికల్లో తమ పార్టీకి ఓటు వేయాలని ఓటర్లకు పిలుపునిచ్చారు. ఇదే ఇప్పుడు భారత్ మాల్దీవుల మధ్య మరో వివాదానికి కేంద్ర బిందువు అయింది.

ఆ ఫోటోను షేర్ చేస్తూ మాల్దీవుల్లో ప్రతిపక్షంలో ఉన్న ఎండీపీ భారీ ఓటమివైపు వెళ్తోందని.. దీంతో మాల్దీవుల ప్రజలు వారితో ఓడిపోవడానికి ఇష్టపడరు అంటూ ఆ పోస్ట్‌లో ఉంది. ఈ క్రమంలోనే మరియం షియునా చేసిన పోస్ట్ పెను వివాదానికి దారి తీసింది. ఈ పోస్ట్‌పై ముఖ్యంగా భారత నెటిజన్లు తీవ్రస్థాయిలో మండిపడ్డారు. తాను చేసిన పోస్ట్ తీవ్ర వివాదానికి కారణం అవుతోందని గుర్తించిన మరియం షియునా.. దాన్ని తొలగించారు. అయితే అప్పటికే జరగాల్సిన నష్టం మొత్తం జరిగిపోయింది. మరియం షియునాపై కఠిన చర్యలు తీసుకోవాలని.. మాల్దీవులు అధ్యక్షుడు మహ్మద్ ముయిజ్జూను డిమాండ్ చేశారు.

ఈ క్రమంలోనే ఎట్టకేలకు మాల్దీవుల మంత్రి మరియం షియునా ట్విటర్ వేదికగా స్పందించారు. తాను ఇటీవల చేసిన పోస్ట్‌లో సమాచారం వల్ల ఏదైనా గందరగోళం ఏర్పడినందుకు తన హృదయపూర్వక క్షమాపణలు తెలియజేస్తున్నానని పేర్కొన్నారు. మాల్దీవుల్లో ఉన్న ప్రతిపక్ష పార్టీ ఎండీపీకి కౌంటర్‌గా తాను ఆ ఫోటో షేర్ చేసినట్లు చెప్పారు. అయితే ఆ పోస్ట్ భారత జెండాను పోలి ఉంది.. ఇది పూర్తిగా అనుకోకుండా జరిగినదని తాను చెప్పదలచకుంటున్నట్లు తెలిపారు. ఈ పోస్ట్ వల్ల ఎవరైనా అపార్థం చేసుకుంటే వారికి హృదయపూర్వకంగా చింతిస్తున్నానని వెల్లడించారు.

అయితే ఈ ఏడాది జనవరిలో భారత ప్రధాని నరేంద్ర మోదీ లక్షద్వీప్‌లో పర్యటించిన తర్వాత మాల్దీవులు తీవ్ర విమర్శలు చేసింది. అందులో అప్పుడు ఆ దేశ మంత్రిగా ఉన్న మరియం షియునా కూడా ఉన్నారు. అప్పుడు తీవ్ర విమర్శలు వెల్లువెత్తడంతో మరియం షియునాతోపాటు మరో ఇద్దరు మాల్దీవులు మంత్రులు మల్షా షరీఫ్, అబ్దుల్లా మహ్జూమ్ మజిద్‌లపై వేటు పడింది. ఈ నేపథ్యంలోనే భారత్‌కు వ్యతిరేకంగా సోషల్ మీడియాలో చేసిన పోస్ట్‌పై మరియం షియానాపై విమర్శలు రావడం రెండోసారి కావడం గమనార్హం.