ఏపీలోని ఆ ఊర్లో దసరా రోజే శ్రీరామనవమి.. అప్పుడే రాములోరి కళ్యాణం

చైత్రమాసం శుద్ధనవమి రోజున ప్రపంచమంతా శ్రీరామ నవమి వేడుకలవు జరుపుకుంటుంది. జగదేకవీరుడైన శ్రీ రామచంద్రుడి కళ్యాణోత్సవంతో ఆ రోజున ప్రతి ఊరు మురిసిపోతుంది. శ్రీరామనవమి రోజు అన్ని గ్రామాల్లో రామాలయాలు భక్తులతో సందడిగా ఉంటాయి. అయితే ఇందుకు పూర్తి భిన్నంగా దసరా రోజున శ్రీరామచంద్రుని కళ్యాణం చేసే గ్రామం అంబేద్కర్ కోనసీమ జిల్లాలో ఉంది. అంబేద్కర్ కోనసీమ జిల్లా భీమ భక్తుని పాలెంలో దసరా రోజున శ్రీరామనవమి జరుపుకుంటారు. ఆ రోజే సీతారాముల కళ్యాణం జరిపిస్తారు.

అమలాపురం పట్టణానికి సమీపంలో ఉన్న భీమ భక్తుని పాలెంలో శ్రీరామనవమిని కేవలం పానకాల ఉత్సవంగా మాత్రమే జరుపుకుంటారు. ఊర్లో ఉన్న రామాలయంలో పానకాలు పంచిపెడతారు. ఇక రాములోరి కళ్యాణం మాత్రం దసరా రోజున ఘనంగా నిర్వహిస్తారు. ఇది ఎప్పటి నుంచో కొనసాగుతున్న ఆచారం. అయితే ఇందుకు కారణం కూడా ఉందడోయ్. గతంలో ఈ గ్రామంలో నివసించే వారంతా ప్రధానంగా పెంకుటిల్లు నేత కార్మికులు. వీరికి వేసవికాలంలోనే పని ఎక్కువగా ఉండేది. దీంతో ఎండాకాలంలో వీరంతా పనుల కోసం బయటి ఊళ్లకు వెళ్తుండేవారు. గ్రామంలో ఎవరు ఉండకపోవడంతో శ్రీరామనవమి రోజున ఊర్లో ఉన్న కొద్దిమంది మాత్రం శ్రీరాముడికి పూజలు చేసి పానకాలు పంచి పెడుతుంటారు.

ఇక దసరా నాటికి పనుల కోసం బయట ఊళ్లకు వలస వెళ్లిన ఊరిజనమంతా తిరిగి సొంతూరికి చేరుకునేవారు. అందుకే దసరా రోజు సీతారాముల కళ్యాణం నిర్వహించి శ్రీరాములు వారి పట్టాభిషేకం ఘనంగా నిర్వహించేవారు. అయితే కాలాలు మారినా కూడా ఆ ఊరి జనం ఇప్పటికీ అదే ఆచారం ఫాలో అవుతున్నారు, పెద్దల నుంచి వచ్చిన సంప్రదాయాన్ని కొనసాగిస్తున్నారు. శ్రీరామనవమి రోజున పానకాలు పంచిపెట్టి.. విజయదశమి వస్తే ఘనంగా శ్రీరామ కళ్యాణం నిర్వహిస్తున్నారు. ఈ రకమైన ఆచారంతో భీమభక్తుని పాలెం తెలుగురాష్ట్రాలలో ప్రత్యేకంగా నిలుస్తోంది.