పవన్ కళ్యాణ్ హెలికాప్టర్‌లో సాంకేతిక సమస్య

 జనసేన అధినేత పవన్ కళ్యాణ్ ఎన్నికల ప్రచారానికి మరోసారి అవాంతరం ఎదురైంది. పవన్ కళ్యాణ్ ప్రయాణించాల్సిన హెలికాప్టర్ లో సాంకేతికత సమస్య తలెత్తింది. పవన్ కళ్యాణ్ హెలికాప్టర్‌లో కూర్చొన్న తరవాత టేకాఫ్ సమయంలో ఇంజిన్‌లో సమస్య తలెత్తింది.దీంతో పవన్ ఎన్నికల ప్రచారాన్ని వాయిదా వేశారు. ఈ విషయాన్ని జనసేన పార్టీ వెల్లడించింది. ముందుగా నిర్ణయించిన షెడ్యూల్ ప్రకారం.. సోమవారం తాడేపల్లిగూడెం, ఉంగుటూరు సభల్లో పవన్ కళ్యాణ్ పాల్గొనాల్సి ఉంది. ఇందుకోసం పిఠాపురం నుంచి ఆయన తాడేపల్లి గూడెనికి బయల్దేరారు. అయితే పవన్ కళ్యాణ్ హెలికాప్టర్లో కూర్చున్న తర్వాత ఇంజిన్‌లో సాంకేతిక సమస్య వచ్చినట్లు సిబ్బంది గుర్తించారు.

హెలికాప్టర్ టేకాఫ్ సమయంలో ఇంజిన్‌లో సమస్య తలెత్తినట్లు సిబ్బంది గుర్తించారు. దీంతో వెంటనే హెలికాప్టర్ ఆపివేయించారు. అలాగే పవన్ పర్యటనను రద్దు చేశారు. ఈ క్రమంలోనే తాడేపల్లిగూడెం, ఉంగుటూరు సభలు వాయిదా వేస్తున్నట్లు జనసేన అధికారికంగా ప్రకటించింది. ఆ రెండు నియోజక వర్గాలలో సభలను మరొక రోజు నిర్వహిస్తామని జనసేన మీడియా విభాగం తెలిపింది. పవన్ కళ్యాణ్ ఎన్నికల ప్రచారం ప్రారంభించిన తర్వాత ఇప్పటికే ఒకసారి ప్రచారానికి అంతరాయం కలిగింది. పవన్ కళ్యాణ్ అనారోగ్యానికి గురికావటంతో ప్రచారానికి బ్రేక్ పడింది. ఆ తర్వాత కోలుకున్న పవన్ తిరిగి ఎన్నికల ప్రచారం ప్రారంభించారు.

అయితే పవన్ కళ్యాణ్ ఇన్‌ఫ్లూయెంజాతో బాధపడుతున్నారని.. క్రేన్ గజమాలలు, ఫోటోలు, సెల్ఫీలు వద్దంటూ జనసేన నాయకత్వం కార్యకర్తలకు సూచించింది. రోజూ ఏదో ఒక సమయంలో పవన్ కళ్యాణ్‌కు జ్వరం వస్తోందని అందుకే ఈ జాగ్రత్తలు తీసుకుంటూ ఎన్నికల ప్రచారం నిర్వహిస్తారని తెలిపింది.

రేపే పవన్ కళ్యాణ్ నామినేషన్

మరోవైపు జనసేనాని రేపు పిఠాపురంలో నామినేషన్ వేయనున్నారు. ఉదయం 10 గంటలకు చేబ్రోలు నుంచి గొల్లప్రోలు మీదుగా పిఠాపురంలోని పాదగయ వరకూ పవన్ కళ్యాణ్ వేలమంది కార్యకర్తలు, అభిమానులు, మద్దతుదారులతో ర్యాలీ నిర్వహిస్తారు. పాదగయలో శ్రీపాద వల్లభుడిని దర్శించుకుని ప్రత్యేక పూజలు చేస్తారు. అనంతరం అక్కడి నుంచి ఆర్వో కార్యాలయానికి వెళ్లి నామినేషన్ దాఖలు చేస్తారు. నామినేషన్ కార్యక్రమం పూర్తైన తర్వాత సాయంత్రం ఉప్పాడ కొత్తపల్లిలో నిర్వహించే బహిరంగ సభకు పవన్ కళ్యాణ్ హాజరుకానున్నారు.