శ్రీకాళహస్తి ఎమ్మెల్యేపై మాజీ అనుచరుడి సంచలన ఆరోపణలు

శ్రీకాళహస్తి సిట్టింగ్ ఎమ్మె్ల్యే, ప్రస్తుతం వైసీపీ అభ్యర్థి బియ్యపు మధుసూదన్ రెడ్డిపై ఆయన మాజీ అనుచరుడు సంచలన ఆరోపణలు చేశారు. ఎమ్మెల్యే మాజీ అనుచరుడు హేమచంద్రారెడ్డి శ్రీకాళహస్తి ఆలయం వద్ద దీనిపై ప్లకార్డులు ప్రదర్శించారు. ఎమ్మెల్యే చెబితేనే గతంలో గుడిలో వెండి పాత్రలు దొంగిలించానంటూ తీవ్ర ఆరోపణలు చేశారు హేమచంద్రారెడ్డి. శ్రీకాళహస్తి ఆలయంలోని వెండిపై సమగ్ర విచారణ జరిపించాలని.. ఎమ్మెల్యే అవినీతి మీద దర్యాప్తు జరిపించాలని ప్లకార్డులు ప్రదర్శించారు. అలాగే ఎమ్మెల్యే కుటుంబసభ్యులతో తనకు ప్రాణహాని ఉందని ఆరోపించారు.

ఎమ్మెల్యే, ఆయన కుటుంబసభ్యులు చెప్తేనే.. తాను గుడిలోని వెండిని దొంగిలించి బెంగళూరులో వారు చెప్పినచోట అందజేశానని హేమచంద్రారెడ్డి చెప్పారు. తన తప్పును తెలుసుకుని శివయ్యను క్షమాపణ కోరేందుకు ఇక్కడకు వచ్చానన్నారు. అలాగే ఎమ్మెల్యే కుటుంబసభ్యులతో తనకు ప్రాణహాని ఉందని ఆరోపించారు. గుడిలోని వెండి మీద, తనకు ప్రాణహాని ఉందన్న విషయంపైనా ఎస్పీని కలిసి ఫిర్యాదు చేశానని చెప్పారు. అయితే ఇప్పటి వరకూ ఎలాంటి విచారణ జరగలేదని హేమచంద్రారెడ్డి చెప్పారు.

ఎమ్మెల్యే చెబితేనే ఆలయంలో వెండి దొంగిలించా.. మాజీ అనుచరుడి ఆరోపణలు

ఎమ్మెల్యే చెప్తే గుడిలోని వెండి సామాన్లను దొంగిలించి.. బెంగళూరులో భారతి అనే మహిళకు అప్పగించినట్లు హేమచంద్రారెడ్డి చెప్పారు ప్రతిగా తనకు పది లక్షలు ఇచ్చారని అన్నారు.13 ఏళ్లుగా ఎమ్మెల్యే వెంట ఉన్నానని.. ఆయన పైకి కనిపించేంత మంచివాడు కాదంటూ ఆరోపించారు. అలాగే గుడిలోని వెండి మీద.. లిక్కర్ స్కామ్ మీద దర్యాప్తు జరిపించాలని హేమచంద్రారెడ్డి డిమాండ్ చేశారు. బియ్యపు మధుసూదన్ రెడ్డిని గతంలో విమర్శించిన తన మిత్రుడు కూడా చనిపోయాడని.. తనకు కూడా ప్రాణహాని ఉందని ఆరోపించారు. అయితే తాను ఆత్మహత్య చేసుకునేంత పిరికివాడిని కానని.. తనకు ఏదైనా జరిగితే అందుకు ఎమ్మెల్యేదే బాధ్యత అని ఆరోపించారు. అలాగే మరో వారం పదిరోజుల్లో డీకేటీ భూముల కుంభకోణానికి సంబంధించి కీలక వివరాలు వెల్లడిస్తానని హేమచంద్రారెడ్డి అన్నారు.

కాసేపటికే మాటమార్చిన హేమచంద్రారెడ్డి

అయితే కాసేపటికే హేమచంద్రారెడ్డ మాట మార్చాడు. ఎమ్మెల్యే మీద తాను చేసిన ఆరోపణలు అన్నీ.. అబద్ధాలేనని తెలిపాడు. సొంతపని చేయాల్సిందిగా ఎమ్మెల్యేను అడిగానని.. ఆయన అంగీకరించకపోవటంతోనే కోపంతో బియ్యపు మధుసూదన్ రెడ్డి మీద ఆరోపణలు చేశానంటూ మరో వీడియో రిలీజ్ చేశాడు. ఎమ్మెల్యే మీద తాను చేసిన ఆరోపణలు అన్నీ అవాస్తవాలేనంటూ ఈ వీడియోలో చెప్పాడు.