టీడీపీ ప్రచార రథానికి నిప్పు.. పీలేరులో ఉద్రిక్తత
Andhra Pradesh Telugu | Suryaa Desk | Published : Sat, Apr 27, 2024, 08:47 PM
అన్నమయ్య జిల్లాలో దుండగులు దారుణానికి ఒడిగట్టారు. వాల్మీకిపురం మండలం విట్టలం వద్ద తెలుగు దేశం పార్టీ ప్రచార వాహనంపై పెట్రోల్‌ పోసి నిప్పు పెట్టారు. వాహనంలో డ్రైవర్‌ ఉండగానే దుండగులు నిప్పు పెట్టి అక్కడి నుంచి పరారయ్యారు. ఈ ఘటనలో వాహనం పూర్తిగా దగ్ధమైంది. శనివారం ఉదయం నంబర్‌ ప్లేట్‌ లేని బైక్‌పై వచ్చిన ఇద్దరు దుండగులు ప్రచార రథంపై పెట్రోల్‌ పోసి నిప్పు పెట్టారు. ఈ ప్రమాదంలో డ్రైవర్‌ తీవ్రంగా గాయపడ్డారు. గమనించిన స్థానికులు అతడిని ఆసుపత్రికి తరలించి చికిత్స అందిస్తున్నారు.
ఈ విషయం తెలుసుకున్న పీలేరు టీడీపీ అభ్యర్థి నల్లారి కిషోర్ కుమార్ రెడ్డ సతీమణి అక్కడికి చేరుకున్నారు. ఆమె తెలుగు దేశం పార్టీ నాయకులు జాతీయ రహదారిపై బైఠాయించి ధర్నా చేపట్టారు. దీంతో కొద్దిసేపు ఉద్రిక్త వాతావరణం కనిపించింది. స్థానిక సీఐ పులిశేఖర్‌ టీడీపీ శ్రేణులకు సర్ది చెప్పి నిందితులను పట్టుకుంటామని హామీ ఇవ్వడంతో ఆందోళన విరమించారు. దాదాపు 2 కి.మీ. మేర వాహనాలు నిలిచిపోవడంతో స్థానిక పోలీసుల ఆధ్వర్యంలో సిబ్బంది చర్యలు చేపట్టారు.
|
|