మీకు ఓటరు స్లిప్‌ అందలేదా.. అయితే రెండు సినిమా టికెట్లు ఫ్రీ

ప్రస్తుతం దేశవ్యాప్తంగా జరుగుతున్న సార్వత్రిక ఎన్నికలను సమర్థవంతంగా నిర్వహించేందుకు కేంద్ర ఎన్నికల సంఘం అన్ని చర్యలు తీసుకుంటోంది. ఈ క్రమంలోనే రాష్ట్రాల పరిధిలో ఓటింగ్ శాతాన్ని పెంచేందుకు ఎన్నో అవగాహన కార్యక్రమాలను చేపడుతోంది. ప్రజలను ఓటు వేసేలా రకరకాల ప్రచారం నిర్వహిస్తోంది. అయితే ఎన్నికలకు ముందే ఓటర్లకు ఓటరు స్లిప్‌లను ఎన్నికల సంఘం అధికారులు పంపిణీ చేస్తున్నారు. కానీ కొందరికి మాత్రం ఓటరు స్లిప్‌లు అందడం లేదు. దీంతో వారు ఓటు వేయకుండా ఓటింగ్‌కు దూరంగా ఉంటున్నారు.

అయితే ఇలా ఓటరు స్లిప్‌లు అందలేదని ఫిర్యాదు చేస్తే వారికి ఉచితంగా సినిమా టికెట్లు ఇస్తామని ఎన్నికల సంఘం తెలిపింది. ఓటింగ్ శాతాన్ని పెంచేందుకే తాము ఇలాంటి చర్యలు చేపట్టినట్లు మధ్యప్రదేశ్‌లోని ఇండోర్ జిల్లా అధికార యంత్రాంగం వెల్లడించింది. ఇండోర్‌ లోక్‌సభ నియోజకవర్గానికి ఈ నెల 13 వ తేదీన.. ఎన్నికలు జరగనున్నాయి. ఇందులో భాగంగానే ఇండోర్ నియోజకవర్గంలో ఇంటింటికీ మే 4 నుంచి 8 వ తేదీ వరకు ఓటరు స్లిప్‌లను జిల్లా ఎన్నికల అధికారులు పంపిణీ చేయనున్నారు. అయితే మే 8 వ తేదీ లోగా స్థానిక బీఎల్‌ఓలు ఓటరు స్లిప్‌లను ఓటర్లకు అందించకపోతే తమకు ఫిర్యాదు చేయాలని ఇండోర్ అధికారులు తెలిపారు.

వాట్సాప్ లేదా ఫోన్‌ చేసి ఓటర్ స్లిప్ రాలేదని ఫిర్యాదులు చేయవచ్చని ఇండోర్ జిల్లా ఎన్నికల అధికారి కలెక్టర్ ఆశిష్ సింగ్ ఓటర్లకు విజ్ఞప్తి చేశారు. అలా ఫిర్యాదులు చేసిన వారికి బహుమతిగా ఇండోర్ నగరంలో ఏ సినిమా థియేటర్‌లోనైనా నిసిమా చూసేందుకు రెండు సినిమా టికెట్లను ఉచితంగా ఇవ్వనున్నట్లు తెలిపారు. అయితే అలా ఫిర్యాదు చేసిన వారికి ఓటరు స్లిప్ కూడా అందిస్తామని చెప్పారు. ఆ ఫిర్యాదు నిజమేనని తేలితే సంబంధిత బీఎల్ఓపై చర్యలు తీసుకుంటామని వెల్లడించారు.

ఓటర్ స్లిప్‌లు అందని వారు తమ అసెంబ్లీ నియోజకవర్గం, పోలింగ్ స్టేషన్ సహా అన్ని వివరాలతో జిల్లా ఎన్నికల హెల్ప్‌లైన్‌కు వాట్సాప్ చేయవచ్చని పేర్కొన్నారు. వాట్సాప్ నంబర్ 9399338398 కు మెసేజ్ గానీ లేదా ల్యాండ్‌లైన్ నంబర్ 0731-2470104, 0731-2470105 లకు మే 10 వ తేదీ వరకు ఫోన్ చేసి ఫిర్యాదు చేయవచ్చని స్పష్టం చేశారు. ఇలా చేస్తే ఓటరు స్లిప్ రాని వారు కూడా తర్వాత తీసుకుని ఓటు వేస్తే.. ఓటింగ్ శాతం పెరుగుతుందని అధికారులు ఈ నిర్ణయం తీసుకున్నారు. ఎన్నికల అధికారులు తీసుకున్న నిర్ణయం పట్ల హర్షం వ్యక్తం అవుతోంది.