సీఎం జగన్‌కు మూడో లేఖ రాసిన షర్మిల.. తొమ్మిది ప్రశ్నలకు సమాధానం చెప్పాలంటూ

ఆంధ్రప్రదేశ్ కాంగ్రెస్ పార్టీ అధ్యక్షురాలు వైఎస్ షర్మిల ముఖ్యమంత్రి వైఎస్ జగన్ మోహన్ రెడ్డికి మూడో లేఖ రాశారు. ఇవాళ ధరలు - చార్జీలు పెరుగుదలపై 'నవ సందేహాల' పేరుతో ఈ లేఖను పంపారు. ఈ ప్రశ్నలకు ముఖ్యమంత్రి జగన్ మోహన్ రెడ్డి సమాధానం చెప్పాలని డిమాండ్ చేశారు. రోజుకో అంశంపై షర్మిల సీఎం జగన్‌కు షర్మిల లేఖలు రాస్తున్నారు. మూడో లేఖలో ప్రధానంగా ధరలు, ఛార్జీల అంశాలన్ని ప్రస్తవించారు. ప్రధానంగా ధరలు పెరుగుదలతో ఆంధ్రప్రదేశ్ ప్రజలపై పడిన ఆర్థిక భారాన్ని తగ్గించే ఉపశమన చర్య ఈ ఐదేళ్లలో ఒక్కటి తీసుకోలేదు ? ఎందుకు ? అని ప్రశ్నించారు షర్మిల.

రైతులకు గిట్టుబాటు ధరతో సంబంధం లేకుండా రూ.3వేల కోట్లతో ధరల స్థిరీకరణ నిధి అని చెప్పి ఎందుకు అమలు చేయలేదో చెప్పాలన్నారు షర్మిల. విద్యుత్ ఛార్జీలు పెంచబోమని వాగ్ధానం చేసి.. ప్రజల మీద 13 వందల కోట్ల భారాన్ని ఎందుకు మోపారని ప్రశ్నించారు. రాష్ట్రంలో పెట్రోల్, డీజిల్ మీద రూ.500 కోట్లు, ఆర్టీసీ ఛార్జీల ద్వారా రూ.700 కోట్లు, మద్యంపై రూ.18 వందల కోట్ల మేర ధరలు పెంచి ప్రజలపై ఎందుకు మోపారో చెప్పాలన్నారు. పెట్రోల్,డీజిల్ ధరలు పెరిగినప్పుడు రాష్ట్ర ప్రభుత్వ పన్నుల కింద తగ్గించే అవకాశం ఉన్నా.. ఆ దిశగా ఎందుకు ప్రయత్నాలు చేయలేదని ప్రశ్నించారు.

రాష్ట్రవ్యాప్తంగా యూనివర్సిటీలలో ప్రమాణాలు పెంచకుండా విద్యార్థుల ఫీజులను 2850 కి ఎందుకు పెంచారని షర్మిల ప్రశ్నించారు. ఇసుక ధరలను 5 రెట్లు పెంచి నిర్మాణ రంగాన్ని దెబ్బతీశారు..40 లక్షల మంది కార్మికుల జీవనోపాధి పై ఎందుకు దెబ్బ కొట్టారో చెప్పాలన్నారు. ఈ ఏడాదిలోనే రూ.10 వేల కోట్ల పన్నులు పెంచారని.. అదే స్థాయిలో రూ.47 వేల కోట్ల అప్పులు తెచ్చారు.. అయినా అభివృద్ధి శూన్యం.. దీనికి నైతిక భాధ్యత ఎవరిదని ప్రశ్నించారు. వైఎస్ రాజశేఖర్ రెడ్డి హయాంలో రేషన్ షాపుల ద్వారా 11 నిత్యావసర వస్తువులు ఇచ్చే వాళ్లు.. ఇప్పుడు బియ్యం తప్పా పప్పు, చింతపండు, చక్కెర, కందిపప్పు లాంటివి ఎందుకు ఇవ్వడం లేదని ప్రశ్నించారు.