హోటల్ రూమ్ బుక్ చేసిన నటి ప్రణీత్ హట్టే.. తీరా వెళ్లిచూస్తే షాకిచ్చిన యాజమాన్యం

ఆమె మరాఠీ ఒక హీరోయిన్. హీరోయిన్ అంటే మహిళ కాదు.. ట్రాన్స్‌జెండర్. మహారాష్ట్రకు చెందిన ఆమె.. తొలి ట్రాన్స్‌జెండర్ హీరోయిన్ అయిన ప్రణీత్ హట్టే తనకు జరిగిన ఒక చేదు అనుభవాన్ని ఇన్‌స్టాగ్రామ్‌లో పంచుకుంది. తాను ఓ ఈవెంట్‌లో పాల్గొనేందుకు నాసిక్ వెళ్లాల్సి ఉండగా.. ముందుగానే అక్కడ ఒక హోటల్‌లో రూమ్ బుక్ చేసినట్లు పేర్కొంది. ఇక సమయానికి అక్కడికి వెళ్లి తన రూమ్ గురించి అడగ్గా.. వారు ఇచ్చిన సమాధానంతో తాను షాక్ అయినట్లు వెల్లడించింది. తనకు రూం ఇచ్చేందుకు ఆ హోటల్ యాజమాన్యం ఒప్పుకోలేదని పేర్కొంది.

అందుకు కారణం తాను ఒక ట్రాన్స్ జెండర్ అయినందువల్లేనని తెలిపింది. దీంతో తాను ముందుగా బుక్ చేసుకున్న హోటల్ రూం బుకింగ్‌ను సదరు హోటల్ యాజమాన్యం రద్దు చేసిందని తీవ్ర ఆవేదన వ్యక్తం చేశారు. కొంతమంది వ్యక్తులు తమలాంటి ట్రాన్స్‌జెండర్‌ వారి పట్ల ప్రవర్తిస్తున్న తీరుపై ఆమె తీవ్ర అసహనం వ్యక్తం చేశారు. ఈవెంట్‌లో పాల్గొనేందుకు తాను నాసిక్ వెళ్లినపుడు ఈ సంఘటన జరిగిందని మే 9 వ తేదీన ఇన్‌స్టాగ్రామ్‌లో ఒక వీడియోను పోస్ట్ చేసింది.

తాను ట్రాన్స్‌జండర్‌ అనే ఒకే ఒక్క కారణంతో హోటల్ యజమానులు తన రూమ్‌ బుకింగ్‌ను రద్దు చేశారని ఆ వీడియోలో పేర్కొంది. ఇప్పుడు తాను ఎక్కడికి వెళ్లాలి అంటూ ప్రణీత్ హట్టే ప్రశ్నించారు. ఈ వీడియో కాస్తా సోషల్ మీడియాలో తెగ వైరల్ అవుతోంది. దీంతో నెటిజన్లు ప్రణీత్ హట్టేకు మద్దతుగా కామెంట్లు చేస్తున్నారు. ఆమెను రూం ఇవ్వడానికి నిరాకరించిన ఆ హోటల్ యాజమాన్యంపై తీవ్ర విమర్శలు గుప్పిస్తున్నారు.

ఇక ప్రణీత్ హట్టే అభిమానులు ఆమెకు మద్దతుగా.. హోటల్ యాజమాన్యంపై తీవ్రంగా విరుచుకుపడుతున్నారు. తాను ఇప్పుడే ఆ హోటల్ యాజమాన్యానికి ఫోన్ చేశానని ఒక నెటిజన్ తెలిపారు. వారు చేసిన పనికి వారు ఖచ్చితంగా సిగ్గుపడి ఉంటారని పేర్కొన్నారు. ఈ సంఘటనను ఇలాగే వదిలేయకూడదని.. దీనిపై పోలీసులకు ఫిర్యాదు చేయాలని మరొకరు ప్రణీత్ హట్టేకు మరొకరు కామెంట్ చేశారు. ఇలాంటి హోటల్‌లను మూసివేయాలని నెటిజన్లు డిమాండ్ చేస్తున్నారు. ఇక మరాఠీ నటి ప్రణీత్ హట్టే.. ‘కరభారి లయభరి’ అనే మరాఠీ సీరియల్‌లో గంగ పాత్రలో నటించి మంచి గుర్తింపు తెచ్చుకుంది. అంతేకాకుండా నవాజుద్దీన్ సిద్ధిఖీ సినిమా ‘హడ్డీ’లో కూడా ఆమె కనిపించింది.