పెళ్లిపై ఓ చిన్నారి,,,వివాహం చేసుకుంటానని బదులిచ్చిన రాహుల్ గాంధీ

దేశంలోనే మోస్ట్ ఎలిజిబుల్ బ్యాచిలర్‌లలో ఒకరైన కాంగ్రెస్ అగ్రనేత రాహుల్ గాంధీ పెళ్లి గురించి ఎప్పుడూ చర్చ జరుగుతూనే ఉంది.పెళ్లి ఎప్పుడు చేసుకుంటారని రాహుల్ గాంధీని ప్రశ్నిస్తూ ఉండటం... దీనికి ఆయన సమాధానం దాటవేయడం షరామామూలే. తాజాగా, రాయ్‌బరేలిలో ఎన్నికల ప్రచారం నిర్వహిస్తోన్న రాహుల్ గాంధీ తన పెళ్లి గురించి ఆసక్తికర వ్యాఖ్యలు చేశారు. రాహుల్ గాంధీని ఓ చిన్నారి ‘మీరు పెళ్లెప్పుడు చేసుకుంటారు’ అని అడిగితే ఆయన నవ్వుతూ బదులిచ్చారు. ‘బహుశా ఇదే సరైన సమయం ఏమో.. త్వరలోనే వివాహం చేసుకుంటాను" అని కాంగ్రెస్ యువరాజు అన్నారు.

గతేడాది జైపూర్ మహారాణి కాలేజీ విద్యార్థులతో రాహుల్ గాంధీ ముచ్చటించారు. ఈ సమయంలో ఆయన పెళ్లి గురించి ఓ విద్యార్ధిని ప్రశ్నించింది. ‘మీరు అందంగా ఉంటారు.. చూడటానికి చాలా బాగుంటారు.. అయినా మీరు ఎందుకు పెళ్లి చేసుకోలేదు.. ’ అని అడిగింది. దీనికి రాహుల్ బదులిస్తూ.. తన పనులు, పార్టీ వ్యవహారాల్లో పూర్తిగా నిమగ్నమైనందునే పెళ్లి వైపు ఆలోచన వెళ్లలేదని వెల్లడించారు. అలాగే, ఓ ఇటాలియన్ పత్రికకు ఇచ్చిన ఇంటర్వ్యూలోనూ వివాహం, పిల్లల గురించి ఆసక్తికర వ్యాఖ్యలు చేశారు. తాను ఇప్పటి వరకు పెళ్లి ఎందుకు చేసుకోలేదో తెలియదన్న ఆయన.. పిల్లలు మాత్రం కావాలని ఉందని చెప్పారు..ఇప్పటి వరకూ పెళ్లి ఎందుకు చేసుకోలేదన విషయం తనకే విచిత్రంగా ఉంటుందని పేర్కొన్నారు. చాలా పనులు చేయాల్సి ఉందన్న రాహుల్ తనకు పిల్లలు కావాలని ఉందని పేర్కొన్నారు.

కేరళలోని వాయనాడ్‌తో పాటు ఉత్తర్ ప్రదేశ్‌లోని రాయబరేలీ నుంచి రాహుల్ గాంధీ పోటీచేస్తున్న విషయం తెలిసిందే. రాయబరేలీ నుంచి ప్రాతినిధ్యం వహిస్తోన్న సోనియా గాంధీ రాజ్యసభకు వెళ్లడంతో కాంగ్రెస్ కంచుకోటగా గుర్తింపు పొందిన ఈ స్థానంలో రాహుల్ గాంధీ బరిలో నిలిచారు. అమేధీలో 2004 నుంచి వరుసగా మూడుసార్లు విజయం సాధించిన ఆయన.. 2019 ఎన్నికల్లో కేంద్ర మంత్రి స్మృతి ఇరానీ చేతిలో ఓటమి చవిచూశారు.