తెనాలి ఓటరు చెప్పకనే చెప్పారు.. వైసీపీ వాళ్లు సిగ్గుపడాలి: వైఎస్ షర్మిల

ఏపీలో పార్లమెంట్, అసెంబ్లీ ఎన్నికల పోలింగ్ ముగిసింది. చెదురు మెుదురు ఘటనలు మినహా పోలింగ్ ప్రశాంతంగా సాగింది. కొన్ని చోట్ల సాయంత్రం 6 గంటల వరకు క్యూలైన్లలో నిల్చొన్న ఓటర్లు రాత్రి 10 గంటల వరకు ఓటేశారు. సోమవారం ఉదయం తెనాలిలోని ఓ పోలింగ్ బూత్ వద్ద ఉద్రిక్తత నెలకొంది. అధికార వైసీపీ ఎమ్మెల్యే అన్నాబత్తుని శివకుమార్ ఓటు వేయడానికి పోలింగ్ స్టేషన్‌కు వెళ్లాడు. అయితే అప్పటికే అక్కడ భారీ క్యూలైన్ ఉండగా.. అదేమీ పట్టించుకోని శివ కుమార్ ఓటేసేందుకు నేరుగా పోలింగ్ బూత్‌లోకి వెళ్లేందుకు ప్రయత్నించాడు. దీంతో ఓ ఓటర్ ఆయన అలా వెళ్లటంపై తీవ్ర అభ్యంతరం వ్యక్తం చేసాడు.

కోపోద్రిక్తుడైన ఎమ్మెల్యే సదరు ఓటర్‌ సుధాకర్‌పై దాడికి దిగాడు. అయితే ఆ ఓటర్ కూడా ఏమాత్రం తగ్గలేదు. తనను కొట్టిన ఎమ్మెల్యే శివ కుమార్‌పై ఎదురుదాడికి దిగాడు. అందరూ చూస్తుండగానే ఆయన చెంప చెల్లుమనిపించాడు. వెంటనే ఎమ్మెల్యే అనుచరులు సుధాకర్‌పై మూకుమ్మడిగా దాడి చేసారు. ఈ ఘటన దేశవ్యాప్తంగా చర్చనీయాంశమైంది. నేషనల్ మీడియాలోనూ విస్తృతంగా ప్రచారం జరిగింది.

ఈ ఘటనపై ఏపీ కాంగ్రెస్ అధ్యక్షురాలు వైఎస్ షర్మిల స్పందించారు. వైసీపీ అభ్యర్థి చెంప చెల్లుమనిపించి ఓటరు చెపక్కనే చెప్పారని ట్వీట్ చేశారు. అరాచకం సృష్టించే రౌడీ మూకలకు ప్రజలు ఎప్పుడూ బుద్ధిచెబుతూనే ఉంటారన్నారు. ఇలాంటి వాళ్లకు ప్రజలే సరిగ్గా బుద్ది చెబుతారని ట్వీట్‌లో పేర్కొన్నారు. 'తెనాలిలో మదమెక్కిన వైకాపా అభ్యర్థి చెంపచెళ్లుమనిపించిన ఓటరు చెప్పకనే చెప్పారు. అధికారమదంతో, అహంకారం, అరాచకం సృష్టించే రౌడీ మూకలకు ప్రజలు ఎప్పుడూ బుద్ధిచెబుతూనే ఉంటారు, ఎటొచ్చి ఓటుతో కాకుండా చెప్పులతో, చెంపచెళ్లుమనేటట్లు చేసుకుంటున్నందుకు వైసీపీ వాళ్ళు సిగ్గుపడాలి. ఇలాంటి వాళ్లకు ప్రజలే సరిగ్గా బుద్ధి చెప్తారు.' అని షర్మిల వెల్లడించారు.

కాగా, మద్యం మత్తులో తనను దుర్భాషలాడటం, కించపరచటం వల్లే చేయిచేసుకున్నానని ఎమ్మెల్యే శివకుమార్‌ ఆ తర్వాత వివరణ ఇచ్చారు. దీనిపై సుధాకర్‌ కూడా స్పందించారు. ఓటేసేందుకు ఎమ్మెల్యే కుటుంబం వరకు వెళితే తాను పట్టించుకునే వాడిని కాదని.. కానీ, ఆయన వెంట పదుల సంఖ్యలో అనుచరులు వెళ్లటంవల్లే, అందరినీ క్యూలో రావాలని కోరినట్లు చెప్పారు. బాధ్యతగా ఉండాల్సిన ఎమ్మెల్యే తాను చేసిన తప్పును కప్పిపుచ్చుకునేందుకు తాను మద్యం మత్తులో ఉన్నానని, అసభ్యంగా మట్లాడానని నిందలు వేయటం సరికాదన్నారు.