నేపాల్ యువరాణి.. భారత మహారాజాను పెళ్లి చేసుకొని.. ‘మహారాణి’ మాధవి రాజే గురించి తెలుసా

కేంద్ర మంద్రి జ్యోతిరాదిత్య సింధియా తల్లి, ‘రాజమాత’ మాధవి రాజే సింధియా కన్నుమూశారు. ఆమె గత కొన్ని రోజులుగా వెంటిలేటర్‌పై చికిత్స పొందుతున్నారు. బుధవారం (మే 15) ఉదయం 9:28 గంటలకు తుదిశ్వాస విడిచారు. కొంత కాలంగా న్యుమోనియా, సెప్సిస్‌తో బాధ పడుతున్న మాధవి రాజేను ఢిల్లీలోని ఎయిమ్స్ ఆసుపత్రిలో చేర్పించి చికిత్స అందిస్తున్నారు. మాధవి రాజే సింధియా గ్వాలియర్ రాజకుటుంబానికి మాజీ రాజమాత. ఆమె అంత్యక్రియలను గ్వాలియర్‌లో నిర్వహించనున్నట్లు కుటుంబసభ్యులు తెలిపారు. రాజమాత మృతి పట్ల ప్రగాఢ సానుభూతి తెలియజేస్తే పలువురు ప్రముఖులు సంతాపం తెలియజేస్తున్నారు.

నేపాల్ రాజకుటుంబానికి చెందిన మాధవి రాజే.. మధ్యప్రదేశ్‌కు చెందిన ‘మహారాజా’ మాధవరావు సింధియా- IIని వివాహం చేసుకున్నారు. కాంగ్రెస్ పార్టీలో కీలక నేతగా ఉన్న మాధవరావు సింధియా 2001లో ఉత్తర్ ప్రదేశ్‌లో జరిగిన విమాన ప్రమాదంలో కన్నుమూశారు. ఆయన కేంద్ర పౌర విమానయాన శాఖ మంత్రిగా పనిచేశారు. మాధవి రాజే తన దయాగుణంతో ఎంతో మంది అభిమానులను సంపాదించుకున్నారు. వేలాది మంది నిరుపేద పిల్లలు, మహిళలకు విద్య, వైద్య సేవలు అందించారు. 24 ఛారిటీ ట్రస్ట్‌లను స్థాపించి సేవలు అందించారు. ఆ సంస్థలకు ఆమె చైర్‌పర్సన్‌గా పనిచేశారు.

బాలికల కోసం మాధవి రాజే సింధియా ‘సింధియాస్ కన్యా విద్యాలయం’ ఏర్పాటు చేశారు. ఈ విద్యాలయం గవర్నర్ల బోర్డు అధిపతిగా పనిచేశారు. ప్యాలెస్ మ్యూజియంలో మహారాజా మాధవరావు సింధియా II గ్యాలరీని ఏర్పాటు చేశారు. జ్యోతిరాదిత్య సింధియా ప్రస్తుతం మోదీ కేబినెట్‌లో పౌర విమానయాన శాఖ మంత్రిగా పనిచేస్తున్నారు. ఆయన తల్లి మాధవి రాజే మృతి పట్ల పలువురు మంత్రులు, బీజేపీ నేతలు సంతాపం వ్యక్తం చేశారు. ‘శ్రీ జ్యోతిరాదిత్య సింధియా జీ తల్లి మాధవి రాజే సింధియా జీ మృతి వార్త చాలా బాధాకరం. ఆమె ఆత్మకు శాంతి చేకూరాలని ప్రార్థిస్తున్నాను’ అని కేంద్ర మంత్రి నితిన్ గడ్కరీ తన సంతాపాన్ని వ్యక్తం చేశారు.

బీహార్ ఉప ముఖ్యమంత్రి సామ్రాట్ చౌదరి నివాళులు అర్పిస్తూ.. ‘చాలా బాధగా ఉంది. భగవంతుడు వారి ఆత్మకు శాంతిని ప్రసాదించుగాక. ఈ దుఃఖ సమయంలో విమానయాన శాఖ మంత్రి జ్యోతిరాదిత్య, ఆయన కుటుంబ సభ్యులకు నా సానుభూతి తెలియజేస్తున్నాను’ అని పోస్టు చేశారు.