స్టేజీపైనే సింగర్‌కు హగ్‌లు, ముద్దులు ఇచ్చిన మహిళా పోలీస్.. తర్వాత ఏం జరిగిందంటే

 మనకు ఇష్టమైన సెలబ్రిటీ కనిపిస్తే ఆనందంతో గంతులేస్తాం. వీలైతే వారిని కలవడమో, ఫోటో తీసుకోవడమో, షేక్ హ్యాండ్ తీసుకోవడమో చేస్తాం. అది అభిమానం అనిపించుకుంటుంది. కానీ కొందరు మాత్రం తమ అభిమాన సెలబ్రిటీ కనిపిస్తే ప్రపంచాన్ని మైమరిచిపోయి.. ప్రవర్తిస్తూ ఉంటారు. ఇలాగే ప్రవర్తించిన ఓ మహిళా పోలీస్.. అత్యుత్సాహం ప్రదర్శించారు. తనకు ఇష్టమైన సింగర్‌ను చూడగానే అదే స్టేజీపై అనుచిత ప్రవర్తనకు పాల్పడ్డారు. స్టేజీపైనే ఆ సింగర్‌కు హగ్‌లు, ముద్దులు ఇచ్చేశారు. అయితే డ్యూటీలో ఉండగానే.. పోలీస్ యూనిఫాంలో ఆ మహిళా పోలీస్ అలా చేయడం ప్రస్తుతం తీవ్ర విమర్శలకు దారి తీస్తోంది. ఈ సంఘటన అస్సాంలో చోటు చేసుకుంది.

పాపులర్ అస్సామీ సింగర్ జుబీన్ గార్గ్.. దిబ్రూగఢ్ జిల్లాలోని చబువా పోలీస్ స్టేషన్‌ పరిధిలో తాజాగా ఓ షో నిర్వహించారు. ఈ షోకు సెక్యూరిటీగా చబువా పోలీస్ స్టేషన్‌ సిబ్బంది ఉన్నారు. అయితే ఆ పోలీస్ సిబ్బందిలో మిల్లిప్రభ చుటియా అనే మహిళా హోంగార్డు చేసిన ప్రవర్తన తీవ్ర విమర్శలకు దారి తీసింది. జుబీన్ గార్గ్ షో జరుగుతుండగానే మధ్యలో.. మిల్లిప్రభ చుటియా వేదికపైకి ఎక్కారు. ఆపై జుబీన్ గార్గ్ వైపు వెళ్లిన ఆమె ఆయనతో కొద్దిసేపు మాట్లాడారు. తనకు ఇష్టమైన సింగర్ కావడంతో ఆయనను కలిసిన ఉత్సాహంలో ఏం చేస్తుందో ఆమెకే అర్థం కాలేదు.

జుబీన్ గార్గ్‌ను ముద్దు పెట్టుకున్న మిల్లిప్రభ చుటియా.. ఆ తర్వాత హగ్ చేసుకున్నారు. ఆ తర్వాత ఆయన కాళ్లకు నమస్కారం కూడా చేశారు. అయితే ఆ సమయంలో మిల్లిప్రభ చుటియా పోలీస్ యూనిఫాం ధరించి ఉండటమే ప్రస్తుత వివాదానికి కారణం అయింది. ఇది కాస్తా అక్కడ ఉన్నవారు తమ సెల్‌ఫోన్లలో వీడియోలు తీసుకుని సోషల్ మీడియాలో పోస్ట్ చేశారు. అది కాస్త తీవ్ర దుమారానికి కారణం అయింది.

ఈ ఘటనపై తీవ్ర విమర్శలు వెల్లువెత్తడంతో మిల్లిప్రభ చుటియాపై ఉన్నతాధికారులు చర్యలు తీసుకున్నారు. విధుల్లో ఉండగా.. స్టేజీపై అసభ్యంగా ప్రవర్తించడంతో ఆమెపై సస్పెన్షన్ వేటు వేశారు. అయితే ఈ ఘటన సోషల్ మీడియాలో బాగా ట్రెండ్ అవుతుండటంతో నెటిజన్లు కామెంట్ల వర్షం కురిపిస్తున్నారు. కొందరు మిల్లిప్రభ చుటియాకు మద్దతుగా కామెంట్లు పెడుతుండగా.. మరికొందరు మాత్రం ఆమెకు వ్యతిరేకంగా విమర్శలు గుప్పిస్తున్నారు. అభిమానం ఉంటే చూపించుకోోవాలి గానీ మరీ ఇలా చేయడం ఏంటని మండిపడుతున్నారు. అయితే ఈ కార్యక్రమం ఈ నెల 10 వ తేదీన జరిగినట్లు తెలుస్తోంది.