లిఫ్ట్ కూలి.. రాగి గనుల్లో చిక్కుకున్న 14 మంది అధికారులు

గనిలో తనిఖీలకు వెళ్లిన అధికారులు.. ప్రమాదవశాత్తూ అందులో చిక్కుకున్నారు. వారు లోపలికి వెళ్లి తిరిగి లిఫ్ట్‌లో పైకి వస్తుండగా.. అది ఒక్కసారిగా కుప్పకూలింది. దీంతో 14 మంది లోపలే ఉండిపోయారు. ఈ ప్రమాద ఘటన రాజస్థాన్‌లోని ఝన్‌ఝన్ జిల్లాలోని రాగి గనుల్లో మంగళవారం రాత్రి చోటుచేసుకుంది. సిబ్బందిని తరలించేందుకు ఉపయోగించే లిఫ్ట్‌ కూలిపోయింది. దీంతో హిందూస్థాన్‌ కాపర్‌ లిమిటెడ్‌కు చెందిన విజిలెన్స్‌ బృందం సిబ్బంది, అధికారులు 14 మంది గనిలో చిక్కుకుపోయారు. లోపలి చిక్కుకున్న వారిని రక్షించేందుకు సహాయక చర్యలు చేపట్టారు.

ఆ అధికారుల వద్దకు సహాయక బృందం చేరుకుందని నీమ్‌కా థానా జిల్లా ఎస్పీ ప్రవీణ్‌ నాయక్‌ వెల్లడించారు. కొలిహాన్‌ గనిలో 2 వేల మీటర్ల లోతులో సిబ్బంది చిక్కుకున్నట్లు పోలీసులు పేర్కొన్నారు విజిలెన్స్‌ బృందం, అధికారులు గనిలో నుంచి పైకి వస్తుండగా షాఫ్ట్‌కు ఉండే తీగ తెగిపోయింది. దీంతో 14 మంది గనిలో చిక్కుకుపోయారు. వీరిలో ముగ్గురు సురక్షితంగా బయటకు వచ్చినట్టు వెల్లడించారు. మిగతా 11 మందిని తీసుకొచ్చే ప్రయత్నాలు కొనసాగుతున్నాయని అధికారులు చెప్పారు. ప్రస్తుతం వారంతా క్షేమంగా ఉన్నారని, ఎగ్జిట్ గేటు ద్వారా లోపలికి వైద్యులు, నర్సులతో కూడిన 8 మంది బృందాన్ని పంపారు. అత్యవసరమైతే ఆస్పత్రికి తరలించడానికి 9 అంబులెన్స్‌లను సిద్ధంగా ఉంచినట్టు తెలిపారు.

కోల్‌కతా నుంచి వచ్చిన విజిలెన్స్‌ బృందం, మైనింగ్ అధికారులు తనిఖీలకు వెళ్లి తిరిగొస్తుండగా ఈ ఘటన చోటుచేసుకుంది. లోపలి చిక్కుకున్నవారిలో చీఫ్ విజిలెన్స్ ఆఫీసర్ ఉపేంద్ర పాండే, ఖేత్రి కాపర్ కాంప్లెక్స్ యూనిట్ హెడ్ జీడీ గుప్తా, కోలిహన్ మైన్స్ డిప్యూటీ జనరల్ మేనేజర్ ఏకే శర్మతో పాటు ఓ జర్నలిస్ట్, ఫోటోగ్రాఫర్ కూడా ఉన్నాడని అధికారులు పేర్కొన్నారు. ‘అధికార యంత్రాంగం పూర్తి అప్రమత్తంగా ఉంది.. రెస్క్యూ టీంతో కలిసి పనిచేస్తోంది.. ఇప్పటి వరకూ ఎవరూ గాయపడినట్టు నివేదికలు రాలేదు.. అందరూ క్షేమంగా బయటకు వస్తారు’ అని స్థానిక ఎమ్మెల్యే ధర్మపాల్ గుర్జార్ అన్నారు. ఖేత్రి రాగి గనుల్లో 1967 నుంచి తవ్వకాలు జరుగుతున్నాయి.