రూ.3500 సాయం అడిగింది నేనే.. నా అకౌంట్ హ్యాక్ కాలేదు: రేణూ దేశాయ్

నటి రేణూ దేశాయ్ సోషల్ మీడియాలో చాలా యాక్టివ్‏గా ఉంటారు. తన పిల్లలు అకిరా, ఆద్యలకు సంబంధించిన వీడియోలు, అప్‌డేట్స్ తన ఫాలోవర్స్‌తో పంచుకుంటారు. కొన్ని అంశాల పైనా తన అభిప్రాయాలను వెల్లడిస్తుంటారు. పవన్ కళ్యాణ్ అభిమానులు కొంత మంది కూడా.. ‘వదినా.. వదినా..’ అంటూ రేణూతో ఆప్యాయంగా సంభోదిస్తూ తమ అభిప్రాయాలను కామెంట్ల రూపంలో తెలియజేస్తుంటారు. అయితే, ఇటీవల కొన్ని రోజులుగా ఆమె సోషల్ మీడియా అకౌంట్ నుంచి ఎలాంటి అప్‌డేట్స్ లేవు. ఇదే సమయంలో రూ. 3500 కావాలని కోరుతూ రేణు దేశాయ్ ఇన్‌స్టా ఖాతాలో ఓ మెసేజ్ పోస్టు అయ్యింది. క్యూఆర్ కోడ్ కూడా షేర్ చేశారు. ఈ పోస్టు చేసిన 5 నిమిషాల్లోనే కొంత మంది అభిమానులు స్పందించారు. డబ్బు ట్రాన్స్‌ఫర్ చేశారు.

ఇంకొంత మంది అభిమానులు మాత్రం రేణు దేశాయ్ అకౌంట్ హ్యాక్ అయ్యుండవచ్చని అనుమానాలు వ్యక్తం చేశారు. ఈ వీడియో వైరల్ అయిన నేపథ్యంలో రేణూ దేశాయ్ స్పందించారు. వివరణ ఇస్తూ ఓ వీడియో విడుదల చేశారు. అసలేం జరిగింది?

రూ 3500 సాయం అడిగింది నేనే.. రేణూ దేశాయ్‌కి ఏం అవసరం వచ్చింది? ఇన్ స్టాలో ఆ పోస్టు పెట్టింది తానేనని రేణు దేశాయ్ తెలిపారు. తన అకౌంట్ హ్యాక్ కాలేదని స్పష్టం చేశారు. ఫుడ్ పాయిజన్ కారణంగా తనకు కొద్ది రోజులుగా ఆరోగ్యం బాలేదని రేణు దేశాయ్ చెప్పారు. అందుకే వీడియో చేయలేకపోయానని వివరణ ఇచ్చారు. అయితే, అంత పెద్ద స్టార్‌కి, పవన్ కళ్యాణ్ మాజీ భార్యకు కేవలం రూ. 3500 విరాళం అవసరం ఏమొచ్చిందనే అనుమానం రావొచ్చు. రేణూ దీనికి పూర్తి క్లారిటీ ఇచ్చారు.

 ‘నేను రెగ్యులర్‌గా కొంత మొత్తాన్ని డొనేట్ చేస్తాను. నా సంపాదనలో కొంత భాగాన్ని ఇందుకోసం కేటాయించాను. అయితే, అప్పుడప్పుడూ కాస్త ఎక్కువ అవసరం పడుతుంది. నాకూ కూడా కొన్ని లిమిట్స్ ఉంటాయి. నా డబ్బునంతా డొనేషన్స్‌కు ఇచ్చేస్తే.. నా పిల్లల కోసం కావాలి కదా..! అందువల్ల నా వరకు సాయం చేశాక.. ఇంకా బ్యాలెన్స్ కావాలంటే ఫాలోవర్స్‌ను అడుగుతున్నాను’ అని రేణూ దేశాయ్ చెప్పుకొచ్చారు. చిన్న పిల్లల కోసం, పెంపుడు జంతువులు, ఆవుల సంరక్షణ కోసం రేణూ దేశాయ్ తన సంపాదనలో నెల నెలా కొంత మొత్తాన్ని విరాళంగా ఇస్తారట. ఆవుల కోసం సొంతంగా ఓ షెడ్డును కూడా నిర్మిస్తున్నారట. ఏడాదిన్నర లోగా ఆ షెడ్డు నిర్మాణం పూర్తవుతుందని ఆమె తెలిపారు. అప్పుడు తానే అధికారికంగా విరాళాలు సేకరిస్తానని రేణూ దేశాయ్ చెప్పారు.

‘నా పట్ల ప్రేమ, కేర్ చూపించిన ప్రతి ఒక్కరికీ ధన్యవాదాలు. నా రిక్వెస్ట్‌కు 5 నిమిషాల్లోనే స్పందించారు. మానవత్వంతో స్పందించి రూ. 3500 పంపించిన అందరికీ ధన్యవాదాలు’ అని రేణు దేశాయ్ అన్నారు. పవన్ కళ్యాణ్ సూపర్ హిట్ సినిమా ‘బద్రి’తో టాలీవుడ్‌కు పరిచయమైన రేణు దేశాయ్.. తన తొలి సినిమాతోనే తెలుగు ప్రేక్షకుల గుండెల్లో స్థానం సంపాదించుకున్నారు. ఆ తర్వాత కూడా కొన్ని సినిమాల్లో నటించిన రేణు దేశాయ్.. పెళ్లి తర్వాత సినిమాలకు పూర్తిగా దూరమయ్యారు. ఇటీవలే తిరిగి రీఎంట్రీ ఇచ్చారు. మాస్ మాహారాజా రవితేజ నటించిన టైగర్ నాగేశ్వరరావు సినిమాతో తన రెండో ఇన్నింగ్స్ ప్రారంభించారు. టీవీ షోలలోనూ పాల్గొంటున్నారు.