మా నేతలతో మీ ఆఫీసుకొస్తా... ఎంతమందిని అరెస్ట్ చేస్తారో చేసుకోండి: బీజేపీకి కేజ్రీవాల్ సవాల్
national | Suryaa Desk | Published : Sat, May 18, 2024, 09:02 PM
ఆప్ ఎంపీ స్వాతి మలివాల్‌పై ఢిల్లీ సీఎం అరవింద్ కేజ్రీవాల్ సహాయకుడు బిభవ్ కుమార్ దాడి అంశం రాజకీయ ప్రకంపనలు సృష్టిస్తోంది. ఈ కేసులో బిభవ్‌ను శనివారం ఢిల్లీ పోలీసులు అరెస్ట్ చేశారు. ఈ అరెస్ట్‌పై కేజ్రీవాల్ ఘాటుగా స్పందించారు. బిభవ్ కుమార్‌ను కుట్రపూరితంగా అరెస్ట్ చేయించారంటూ కేజ్రీవాల్ ఆరోపించారు. ఇదంతా బీజేపీ గేమ్ ప్లాన్ అని, ఆప్‌ని ఆ పార్టీ పదేపదే వెంటాడుతోందని మండిపడ్డారు. ఏం కుట్రలు చేసినా తమ పార్టీని అణిచివేయలేరని పునరుద్ఘాటించారు. ఇప్పటికే సంజయ్‌ సింగ్‌ని జైల్లో పెట్టించిన బీజేపీ ఇప్పుడు బిభవ్ కుమార్‌పై కక్షగట్టిందని ఆయన దుయ్యబట్టారు.
ఇదే సమయంలో కాషాయ పార్టీకి కేజ్రీవాల్ ఛాలెంజ్ చేశారు. రేపు (ఆదివారం) తన పార్టీ ముఖ్య నేతలతో కలిసి బీజేపీ ప్రధాన కార్యాలయానికి వస్తానని, ఎంత మందిని అరెస్ట్ చేస్తారో చూస్తానంటూ సవాల్ విసిరారు. జైల్ భరోకి పిలునిచ్చిన ఢిల్లీ సీఎం... మే 19న మధ్యాహ్నం 12 గంటలకు అంతా కలిసి బీజేపీ ప్రధాన కార్యాలయానికి వెళ్తామని ప్రకటించారు. ప్రధాని నరేంద్ర మోదీపై కేజ్రీవాల్ విరచుకుపడ్డారు. ‘ప్రధాన మంత్రి.. మా నేతలను ఒక్కొక్కరిగా అరెస్ట్ చేయిస్తున్నారు.. అందర్నీ ఒకేసారి అరెస్ట్ చేయండి’ అని ధ్వజమెత్తారు.
‘పేదల కోసం మొహల్లా క్లినిక్‌లు, ప్రభుత్వ పాఠశాలలు, 24 గంటల విద్యుత్ సౌకర్యం కల్పించడం మేము చేసిన నేరమా.. అందుకే మమ్మల్ని జైల్లో వేస్తున్నారు’ అని నిలదీశారు. ‘మీరు ఎంత మంది ఆప్ సభ్యులను జైల్లో పెట్టినా.. ఈ దేశం అంతకు 100 రెట్లు ఎక్కువ మందిని తయారుచేస్తుంది’ అని పేర్కొన్నారు.
|
|