ఛీ, ఛీ ఇదేం కక్కుర్తి.. సీసీ కెమెరాలకు దొరికిపోయారుగా

చిత్తూరు జిల్లా కుప్పంలో విచిత్రమైన దొంగతనం జరిగింది. ఐస్‌క్రీమ్‌ల కోసం కక్కుర్తి పడిన కొందరు యువకులు పెద్ద సీన్ క్రియేట్ చేశారు. ఏకంగా కత్తితో బెదిరించి ఐస్‌క్రీమ్‌లు ఎత్తుకెళ్లారు.. ఈ సీన్ మొత్తం దగ్గరలో ఉన్న సీసీ కెమెరాల్లో రికార్డయ్యాయి. మణికంఠ అనే వ్యక్తి కుప్పంలోని హెచ్‌పీ రోడ్డులో ఐస్‌‌క్రీమ్స్‌ షాపు నడుపుతున్నాడు. బుధవారం గంగమాంబ అమ్మవారి విశ్వరూప దర్శనానికి భక్తులు భారీగా తరలివచ్చారు. ఆ చుట్టుపక్కల ప్రాంతమంతా జనాలతో రద్దీగా కనిపిస్తోంది.

ఈ జనాల రద్దీని ఆసరాగా తీసుకున్న కొంతమంది యువకులు మణికంఠ ఐస్‌క్రీమ్ షాపు దగ్గరకు వచ్చారు. వచ్చీ రాగానే షాపులో ఫ్రిజ్‌లో ఉన్న ‌డోర్‌ ఓపెన్‌ చేసి తలా ఒక ఐస్‌క్రీం తీసుకుని తిన్నారు. ఇంకా ఐస్‌ క్రీమ్‌లు కావాలని చెప్పగా.. మణికంఠ ఇచ్చాడు. ఆ ఐస్‌క్రీమ్‌లను తీసుకున్న యువకులు అక్కడి నుంచి వెళ్లబోయారు. ఐస్‌క్రీమ్‌లకు డబ్బులు ఇవ్వమని మణికంఠ అడిగాడు.. వెంటనే వారిలో ఓ యువకుడు వేట కత్తి తీసుకుని బెదిరింపులకు దిగాడు. ఆ యువకుడు తీసిన కత్తి చూస్తే ఎవ్వరైనా బెదరాల్సిందే.. వెనక్కి తగ్గాల్సిందే. ఆ షాపు యజమాని భయంతో వణికిపోయాడు.

'మమ్మల్నే డబ్బులు అడుగుతావా.. నరికేస్తాం' అంటూ బెదరించారు. ఆ యువకులు దాదాపు రూ.4 వేలు విలువ చేసే ఐస్‌ క్రీమ్స్‌ పెట్టెలతో అక్కడి నుంచి వెళ్లిపోయారు. ఈ సీన్ మొత్తం దగ్గరలో ఉన్న సీసీ కెమెరాల్లో రికార్డయ్యాయి. కత్తితో బెదిరించడంతో షాపు యజమాని మణికంఠ భయపడి ఏమీ చేయలేకపోయాడు. వెంటనే ఐస్‌క్రీమ్స్‌ చోరీపై కుప్పం అర్బన్‌ పోలీసు స్టేషన్‌లో ఫిర్యాదు చేశారు. ఐస్‌క్రీమ్‌ల కోసం కత్తితో బెదిరించిన ఈ ఘటన స్థానికంగా చర్చనీయాంశమైంది. సీసీఫుటేజ్ ఆధారంగా ఆ యువకుల్ని గుర్తించే పనిలో ఉన్నారు.