తిరుమల శ్రీవారి బ్రేక్ దర్శనం అంటే ఆశపడ్డ భక్తులు.. రూ.20వేలు ఇచ్చారు

తిరుమల శ్రీవారి దర్శనం కోసం ప్రతి రోజూ వేలాదిమంది భక్తులు తరలివస్తుంటారు. గతవారం నుంచి కొండపై భక్తుల రద్దీ పెరిగింది.. ఈ క్రమంలో మళ్లీ దళారులు దందా మొదలుపెట్టారు. తాజాగా శ్రీవారి దర్శనం పేరుతో భక్తుల్ని మోసగించి అడ్డంగా దొరికిపోయారు. ఉమ్మడి తూర్పుగోదావరి జిల్లా రామచంద్రాపురానికి చెందిన శివరామకృష్ణ తిరుమల వెళ్లాలని ప్లాన్ చేసుకున్నారు. శివరామకృష్ణ శ్రీవారి దర్శన టికెట్ల కోసం తిరుపతికి చెందిన దళారులు పూలశేఖర్, అమర్‌నాథ్, వినోద్‌ కుమార్‌ను సంప్రదించారు.

ఈ ముగ్గురు తిరుమలలోని లక్ష్మీశ్రీనివాస మ్యాన్‌పవర్‌ కార్పొరేషన్‌లో ఒప్పంద కార్మికులుగా విధులునిర్వహిస్తున్నారు. వీరు దర్శన టికెట్ల పేరుతో భక్తులను మోసం చేస్తున్నారు. ఈ క్రమంలో భక్తుడి నుంచి రూ.20 వేలు తీసుకుని మోసం చేయడంతో.. బాధితుడు వెంటనే తిరుమల విజిలెన్స్‌ అధికారులను సంప్రదించారు. దర్శన టికెట్ల పేరుతో మోసం చేశారని ఫిర్యాదు చేయడంతో.. తిరుమల టూటౌన్‌ పోలీసులు కేసు నమోదుచేశారు. వారిని త్వరలోనే అదుపులోకి తీసుకుంటామని పోలీసులు తెలిపారు.

తిరుమల శ్రీవారి దర్శనం, ఆర్జిత సేవల పేరుతో కొందరు దళారులు భక్తుల్ని మోసం చేస్తున్నారు. ముందుగానే డబ్బులు వసూలు చేసి దర్శనం, సేవల టికెట్లు ఇవ్వకుండా బురిడీ కొట్టిస్తున్నారు. ఇలాంటి దళారుల విషయంలో జాగ్రత్తగా ఉండాలని టీటీడీ, విజిలెన్స్, పోలీసులు ఎప్పటికప్పుడు అప్రమత్తం చేస్తూనే ఉన్నారు. అయినా సరే కొందరు భక్తులు దళారుల్ని నమ్మి నిండా మునుగుతున్నారు. దళారుల మాటలు నమ్మొద్దని.. టీటీడీ ప్రతి నెలా ఆన్‌లైన్‌లో ఆర్జిత సేవలు, దర్శన టికెట్లు విడుదల చేస్తుందని.. వెబ్‌సైట్, యాప్ ద్వారా భక్తులు టికెట్లు బుక్ చేసుకోవాలని అధికారులు సూచిస్తున్నారు.